బాబీపై ఆ ఒత్తిడి ప‌డనుందా?

మెగాస్టార్ చిరంజీవి(Chiranjeevi) హీరోగా దర్శకుడు బాబీ కొల్లి(Bobby Kolli) తెరకెక్కిస్తున్న మెగా158(Mega158)పై టాలీవుడ్‌లో భారీ స్థాయిలో చర్చ సాగుతోంది. వాల్తేరు వీరయ్య(Waltair veerayya) స‌క్సెస్ త‌ర్వాత‌ ఈ కాంబినేషన్ మరోసారి రిపీట్ అవుతుండటంతో అభిమానుల్లో అంచనాలు మరింత పెరిగాయి. ముఖ్యంగా సంక్రాంతి 2027ను టార్గెట్ చేస్తూ సినిమాను వేగంగా పూర్తి చేయాలనే ప్లాన్ ఇప్పుడు ఇండస్ట్రీలో హాట్ టాపిక్‌గా మారింది. మొదట అనుకున్న సమయానికి షూటింగ్ ప్రారంభం కాకపోవడంతో ప్రాజెక్ట్ షెడ్యూల్ కొంత వెనక్కి వెళ్లినప్పటికీ, మే చివరి వారం నుంచి రెగ్యులర్ షూటింగ్ ను స్పీడ్‌గా ముందుకు తీసుకెళ్లేందుకు మేకర్స్ సిద్ధమవుతున్నట్లు తెలుస్తోంది.

ఈసారి బాబీకి ప్రధాన సవాలు కేవలం భారీ కమర్షియల్ కథను హ్యాండిల్ చేయడం మాత్రమే కాదు, తక్కువ సమయంలో భారీ ప్రొడక్షన్‌ను సమర్థవంతంగా పూర్తి చేయడమనే చెప్పాలి. మెగాస్టార్ సినిమా అంటే భారీ యాక్షన్ బ్లాక్స్, పండుగ వాతావరణాన్ని గుర్తు చేసే సాంగ్స్, స్టార్ క్యాస్ట్ కాంబినేషన్స్, ఫ్యాన్స్‌ను ఆకట్టుకునే మాస్ ఎలివేషన్స్ తప్పనిసరిగా ఉండాల్సిందే. ఇవన్నీ ఒకేసారి సమన్వయం చేస్తూ క్వాలిటీని కాపాడటం డైరెక్ట‌ర్ కు పెద్ద పరీక్షగా మారనుంది. ముఖ్యంగా నటీనటుల కాల్షీట్స్, భారీ సెట్స్, ప్రొడక్షన్ ప్లానింగ్‌లో చిన్న ఆలస్యం జరిగినా రిలీజ్ డేట్‌పై ప్రభావం పడే అవకాశముందని ట్రేడ్ వర్గాలు విశ్లేషిస్తున్నాయి.

ఇక పోస్ట్ ప్రొడక్షన్ దశలోనే అసలు ఒత్తిడి కనిపించే అవకాశం ఉందని సినీ వర్గాలు భావిస్తున్నాయి. భారీ బడ్జెట్ కమర్షియల్ సినిమాలకు అవసరమైన ఎడిటింగ్, వీఎఫ్ఎక్స్, రీరికార్డింగ్ వంటి పనులు సాధారణంగా ఎక్కువ సమయం తీసుకుంటాయి. కానీ ఈసారి సంక్రాంతి డెడ్‌లైన్ కారణంగా ఆ పనులను వేగంగా పూర్తి చేయాల్సి రావొచ్చు. ఇటీవల కొన్ని పెద్ద సినిమాలు హడావుడి షెడ్యూల్స్ వల్ల టెక్నికల్ క్వాలిటీ విషయంలో విమర్శలు ఎదుర్కొన్న నేపథ్యంలో మెగా158పై కూడా అలాంటి చర్చ మొదలైంది. అయితే వాల్తేరు వీరయ్యతో మాస్ ఆడియన్స్ అభిరుచిని బాగా అర్థం చేసుకున్న దర్శకుడిగా బాబీ ఇప్పటికే తన సామర్థ్యాన్ని నిరూపించుకున్నాడు. అదే నమ్మకంతో ఈ ప్రాజెక్ట్‌పై అభిమానులు భారీ అంచనాలు పెట్టుకున్నారు.