మ‌రోసారి బుచ్చిబాబుతో చ‌ర‌ణ్ మూవీ?

రామ్ చ‌ర‌ణ్(Ram Charan) నటిస్తున్న పాన్ ఇండియా మూవీ పెద్ది విడుదలకు సిద్ధమవుతున్న వేళ, డైరెక్ట‌ర్ బుచ్చిబాబు సాన‌(Buchi Babu Sana) చేసిన తాజా వ్యాఖ్యలు టాలీవుడ్‌లో చర్చనీయాంశంగా మారాయి. ఉప్పెన(Uppena)తో డైరెక్ట‌ర్ గా ప్రత్యేక గుర్తింపు తెచ్చుకున్న బుచ్చిబాబు, ఇప్పుడు రామ్ చరణ్‌తో కలిసి తెరకెక్కించిన పెద్ది సినిమాపై పూర్తి నమ్మకంతో ఉన్నట్లు కనిపిస్తున్నారు. ప్రమోషన్స్‌లో భాగంగా మాట్లాడుతూ, చరణ్‌తో మరోసారి పని చేయాలనే తన ఆసక్తిని స్పష్టంగా వెల్లడించారు. ఈసారి తాను సిద్ధం చేస్తున్న కథ ఇప్పటి వరకు ప్రేక్షకులు ఊహించని విధంగా ఉంటుందని ఆయన చెప్పడం సినీ వర్గాల్లో ఆసక్తిని పెంచుతోంది.

బుచ్చిబాబు చెప్పిన ప్రకారం, ఇప్పటికే ఒక కొత్త కథను రామ్ చరణ్‌కు వినిపించారట. కథ విన్న వెంటనే చరణ్ చాలా ఎగ్జైటెడ్‌గా రియాక్ట్ అయ్యార‌ని, ఈ కాంబినేషన్ మరోసారి రిపీట్ కావడం దాదాపు ఖాయమే అన్న సంకేతాలు కూడా ఇచ్చారు. ముఖ్యంగా ఈ ప్రాజెక్ట్ ప్రస్తుత ట్రెండ్‌కు భిన్నంగా ఉండబోతోందని, పూర్తిగా కొత్త ప్రపంచాన్ని ప్రేక్షకుల ముందుకు తీసుకువస్తుందని చెప్పడంతో సోషల్ మీడియాలో ఊహాగానాలు మొదలయ్యాయి. ఇది ఫాంటసీ జానర్‌లోనా, సైకాలజికల్ థ్రిల్లర్‌గా ఉంటుందా, లేక హాలీవుడ్ తరహా యాక్షన్ డ్రామానా అన్న చర్చలు ఇప్పటికే మొదలయ్యాయి.

ఇక ప్రస్తుతం అందరి దృష్టి మాత్రం పెద్ది సినిమాపైనే కేంద్రీకృతమైంది. గ్రామీణ నేపథ్యంతో స్పోర్ట్స్ డ్రామాగా రూపొందిన ఈ సినిమా జూన్ 4న ప్రేక్షకుల ముందుకు రానుంది. ఇప్పటికే విడుదలైన ప్రచార కంటెంట్‌కు మంచి స్పందన రావడంతో అభిమానుల్లో అంచనాలు మరింత పెరిగాయి. రామ్ చరణ్ కెరీర్‌లో మరో ప్రత్యేక సినిమాగా నిలిచే అవకాశాలు ఉన్నాయని ట్రేడ్ వర్గాలు భావిస్తున్నాయి. అదే సమయంలో బుచ్చిబాబు-చరణ్ కాంబినేషన్ మళ్లీ రిపీట్ కానుందన్న వార్త మెగా అభిమానుల్లో కొత్త ఉత్సాహాన్ని తీసుకొచ్చింది.