కాగితపు కరెన్సీ రద్దు ప్రచారం అవాస్తవం: ఆర్బీఐ
- Published By: Phanindra
- June 13, 2026 / 07:44 AM IST
భారతీయ రిజర్వ్ బ్యాంక్ (ఆర్బీఐ) రాబోయే జూన్ 30వ తేదీ నాటికి ప్రస్తుతం చలామణిలో ఉన్న కాగితపు కరెన్సీ నోట్లను (Paper Currency) పూర్తిగా ఉపసంహరించుకోనుందంటూ సోషల్ మీడియాలో జరుగుతున్న ప్రచారాన్ని కేంద్ర ప్రభుత్వం, ఆర్బీఐ తీవ్రంగా ఖండించాయి. కాగితపు నోట్లను రద్దు చేసి, వాటి స్థానంలో ప్లాస్టిక్ కరెన్సీని ప్రవేశపెడుతున్నారనే వార్తల్లో ఏమాత్రం వాస్తవం లేదని అధికారులు కుండబద్దలు కొట్టారు. ప్రస్తుతం ప్రజల వద్ద చలామణిలో ఉన్న అన్ని రకాల కాగితపు నోట్లు యథాతథంగా చట్టబద్ధమైన కరెన్సీగానే (లీగల్ టెండర్) కొనసాగుతాయని, వాటిని వెనక్కి తీసుకునే ఉద్దేశం ఏదీ ప్రభుత్వం వద్ద లేదని వారు తేల్చిచెప్పారు.
గత కొద్ది రోజులుగా సామాజిక మాధ్యమాల్లో ఈ కరెన్సీ మార్పిడికి సంబంధించి పలు వీడియోలు వైరల్గా మారాయి. సామాన్య ప్రజల్లో గందరగోళం సృష్టించేందుకు కొందరు సైబర్ నేరగాళ్లు ఏకంగా ప్రధానమంత్రి నరేంద్ర మోడీ పేరును, స్వరాన్ని వాడుకోవడం గమనార్హం. ఆర్టిఫిషియల్ ఇంటెలిజెన్స్ (ఏఐ) సాంకేతికతను ఉపయోగించి ప్రధాని వాయిస్ను అచ్చుగుద్దినట్లు సృష్టించి (డీప్ఫేక్), ప్లాస్టిక్ నోట్ల (Paper Currency) రాకను ఆయన స్వయంగా ప్రకటిస్తున్నట్లుగా నకిలీ వీడియోలను రూపొందించినట్లు సంబంధిత అధికారులు గుర్తించారు. దేశ ఆర్థిక వ్యవస్థపై దుష్ప్రభావం చూపే ఇలాంటి తప్పుడు ప్రచారాలను, డీప్ఫేక్ వీడియోలను చూసి ప్రజలు ఆందోళన చెందాల్సిన అవసరం లేదని సూచించారు.
ఈ పుకార్లకు ప్రధాన కారణం ఇటీవల రిజర్వ్ బ్యాంక్ ఆఫ్ ఇండియా చేసిన ఒక ప్రకటనగా తెలుస్తోంది. దేశంలో ప్లాస్టిక్ కరెన్సీ నోట్లను వినియోగించడం వల్ల భవిష్యత్తులో కలిగే లాభనష్టాలు, వాటి మన్నిక, ప్రింటింగ్ ఖర్చులు తదితర అంశాలపై ప్రస్తుతం కేవలం ఒక ప్రాథమిక దశలో మాత్రమే అధ్యయనం జరుగుతోందని ఆర్బీఐ గవర్నర్ సంజయ్ మల్హోత్రా ఇటీవల వెల్లడించారు. ఈ ప్రాథమిక పరిశీలనను వక్రీకరించిన కొందరు ఆకతాయిలు.. ఏకంగా జూన్ 30 నుంచే కాగితపు నోట్లు (Paper Currency) రద్దయి, ప్లాస్టిక్ నోట్లు మార్కెట్లోకి వస్తున్నాయంటూ సోషల్ మీడియాలో అసత్య సమాచారాన్ని వ్యాప్తి చేశారు. ప్లాస్టిక్ కరెన్సీ ప్రవేశపెట్టడంపై ఆర్బీఐ కేవలం ఒక అధ్యయనం మాత్రమే చేస్తోందని, దీనిపై ఇప్పటివరకు ఎలాంటి తుది నిర్ణయం తీసుకోలేదని అధికారిక వర్గాలు స్పష్టతనిచ్చాయి.
కరెన్సీ రద్దు, కొత్త నోట్ల (Paper Currency) ముద్రణ లాంటివి అత్యంత కీలకమైన ఆర్థిక నిర్ణయాలని, దానికి సంబంధించి ఏవైనా మార్పులు ఉంటే కేంద్ర ప్రభుత్వం లేదా భారతీయ రిజర్వ్ బ్యాంక్ తమ అధికారిక వెబ్సైట్లు, పత్రికా ప్రకటనల ద్వారా నేరుగా దేశ ప్రజలకు ముందుగానే తెలియజేస్తాయని అధికారులు వెల్లడించారు. వాట్సాప్, ఫేస్బుక్ వంటి మాధ్యమాల్లో వచ్చే అనధికారిక, నిరాధారమైన సమాచారాన్ని గుడ్డిగా విశ్వసించవద్దని, దాన్ని ఇతరులకు షేర్ చేసి అనవసర భయాందోళనలు సృష్టించవద్దని కేంద్రం ప్రజలకు విజ్ఞప్తి చేసింది. కరెన్సీకి సంబంధించిన ఏ విషయానికైనా కేవలం ఆర్బీఐ అధికారిక వర్గాల నుంచి వచ్చే సమాచారాన్నే ప్రామాణికంగా తీసుకోవాలని స్పష్టం చేసింది.
