భారత్లో శాటిలైట్ సేవలకు బ్రేక్ పడలేదు.. వార్తలు కొట్టిపారేసిన ‘స్టార్లింక్’
- Published By: Phanindra
- June 13, 2026 / 07:57 AM IST
భారతదేశంలో శాటిలైట్ ఇంటర్నెట్ సేవల ప్రారంభానికి ఆటంకాలు ఎదురవుతున్నాయంటూ వస్తున్న అంతర్జాతీయ, దేశీయ నివేదికలను, ఊహాగానాలను ఎలాన్ మస్క్కు చెందిన ‘స్టార్లింక్’ (Starlink) సంస్థ తీవ్రంగా ఖండించింది. భారత ప్రభుత్వంతో తమ చర్చలు నిలిచిపోయాయంటూ జరుగుతున్న ప్రచారంలో ఎలాంటి వాస్తవం లేదని స్పష్టం చేసింది. కేంద్ర ప్రభుత్వంతో తమ సంప్రదింపులు సానుకూల వాతావరణంలో, ఫలప్రదంగా సాగుతున్నాయని.. దేశంలో హై-స్పీడ్ శాటిలైట్ ఇంటర్నెట్ విప్లవాన్ని తీసుకువచ్చేందుకు తాము ఇప్పటికే కీలక దశకు చేరుకున్నామని కంపెనీ అధికారికంగా వెల్లడించింది.
భారత మార్కెట్లో వ్యాపార కార్యకలాపాలు ప్రారంభించేందుకు కావాల్సిన ప్రాథమిక లైసెన్సులను ఇప్పటికే దక్కించుకున్నామని స్టార్లింక్ (Starlink) ప్రతినిధులు స్పష్టం చేశారు. కేవలం అనుమతులు మాత్రమే కాకుండా, దేశీయంగా సేవలను తక్షణమే ప్రారంభించడానికి అవసరమైన క్షేత్రస్థాయి సాంకేతిక ఏర్పాట్లను (గ్రౌండ్ ఇన్ఫ్రాస్ట్రక్చర్), గేట్వేలను కూడా సన్నద్ధం చేసినట్లు తెలిపారు. సాంప్రదాయ టెలికాం నెట్వర్క్ సిగ్నల్స్ అసలు అందని మారుమూల గ్రామాలు, కొండ ప్రాంతాలు, దట్టమైన అడవులకు సైతం అంతరిక్షం నుంచి నేరుగా అత్యంత వేగవంతమైన అంతర్జాల సేవలను అనుసంధానించడమే తమ ప్రధాన లక్ష్యమని పేర్కొంది. దేశంలోని డిజిటల్ డివైడ్ను తొలగించే ఈ కనెక్టివిటీ ప్లాన్కు భారత ప్రభుత్వ ఉన్నత వర్గాల నుంచి ఎంతో ప్రోత్సాహకరమైన స్పందన లభించిందని కంపెనీ (Starlink) వివరించింది.
జాతీయ భద్రతకు ప్రాధాన్యం: డేటా లోకలైజేషన్కు గ్రీన్ సిగ్నల్
భారతదేశ సార్వభౌమత్వం, జాతీయ భద్రత, రక్షణ నిబంధనల విషయంలో కేంద్ర ప్రభుత్వం విధించిన కఠినమైన రూల్స్ అన్నింటికీ తాము పూర్తిగా కట్టుబడి ఉన్నామని స్టార్లింక్ (Starlink) స్పష్టం చేసింది. భారత భద్రతా సంస్థలు లేవనెత్తిన ఆందోళనలను, సందేహాలను నివృత్తి చేసేందుకు.. భారతీయ చట్టాలకు లోబడి తాము ఒక సరికొత్త ‘ఆపరేటింగ్ మోడల్’ను డిజైన్ చేసినట్లు కంపెనీ వెల్లడించింది.
స్టార్లింక్ నయా ఆపరేటింగ్ మోడల్
ఈ సరికొత్త విధానం ప్రకారం.. భారతీయ కస్టమర్లకు సంబంధించిన ఇంటర్నెట్ డేటా ట్రాఫిక్ మొత్తం ఎట్టి పరిస్థితుల్లోనూ విదేశీ సర్వర్లకు వెళ్లదు. కేవలం భారతదేశంలోనే ఏర్పాటు చేసిన లోకల్ హబ్స్, దేశీయ డేటా సెంటర్ల ద్వారా మాత్రమే ఈ నెట్వర్క్ రన్ (Starlink) అవుతుంది. తద్వారా స్థానిక డేటా భద్రతకు నూటికి నూరు శాతం గ్యారెంటీ ఉంటుందని, అత్యవసర పరిస్థితుల్లో స్థానిక నియంత్రణకు వీలుంటుందని స్పష్టం చేసింది.
భారతదేశం వంటి భారీ మార్కెట్లో శాటిలైట్ బ్రాడ్బాండ్ సేవలను విజయవంతంగా ప్రారంభించడం తమకు అత్యంత ప్రాధాన్యతతో కూడుకున్న అంశమని, ఇందుకోసం ప్రభుత్వ తుది అనుమతుల (Final Clearance) ప్రక్రియ కోసం ఆసక్తిగా ఎదురుచూస్తున్నామని కంపెనీ (Starlink) పేర్కొంది. జాతీయ భద్రతపై ఏమాత్రం రాజీ పడకుండా, డేటా స్థానికీకరణ నిబంధనలను తూచా తప్పకుండా పాటిస్తూ అత్యంత పారదర్శకంగా సేవలు అందించేందుకు సిద్ధంగా ఉన్నామని స్టార్లింక్ స్పష్టమైన ప్రకటన చేయడంతో.. గత కొన్ని రోజులుగా ఈ ప్రాజెక్టు భవితవ్యంపై టెలికాం వర్గాల్లో నెలకొన్న అనిశ్చితికి తాత్కాలికంగా తెరపడినట్లయింది.
