ప్రధాని మోదీ ‘ప్రజాగ్రహ సభ’కు షాక్ ఇచ్చిన పీఎంఓ!
- Published By: Vasishta
- May 2, 2026 / 08:42 PM IST
దేశ ప్రధానిగా వరుసగా మూడోసారి బాధ్యతలు చేపట్టిన తర్వాత నరేంద్ర మోదీ తొలిసారిగా తెలంగాణ గడ్డపై అడుగుపెడుతున్నారు. ఈ నెల 10న జరగనున్న ఈ పర్యటన ఇప్పుడు రాజకీయ వర్గాల్లో హాట్ టాపిక్ గా మారింది. ఒకవైపు కోట్ల రూపాయల విలువైన అభివృద్ధి పనులకు శంకుస్థాపనలు, ప్రారంభోత్సవాలు.. మరోవైపు రాజకీయ వ్యూహప్రతివ్యూహాల మధ్య ఈ పర్యటన సాగుతోంది. అయితే, పర్యటనకు ముందే చోటుచేసుకున్న ఒక అనూహ్య పరిణామం రాష్ట్ర బీజేపీని ఇరకాటంలో పడేసింది.
మే 10వ తేదీన హైదరాబాద్ చేరుకోనున్న ప్రధాని మోదీ, రాష్ట్ర రాజధానితో పాటు పరిసర ప్రాంతాలకు సంబంధించిన పలు కీలక అభివృద్ధి ప్రాజెక్టులను జాతికి అంకితం చేయనున్నారు. రైల్వే లైన్ల విస్తరణ, జాతీయ రహదారుల నిర్మాణం, మరికొన్ని మౌలిక సదుపాయాల కల్పనకు సంబంధించిన పనులను ఆయన ప్రారంభించనున్నారు. ప్రధాని హోదాలో వస్తున్న మోదీ పర్యటనను అటు రాష్ట్ర ప్రభుత్వం, ఇటు బీజేపీ శ్రేణులు ప్రతిష్టాత్మకంగా భావిస్తున్నాయి. ముఖ్యంగా మూడోసారి ప్రధానిగా బాధ్యతలు స్వీకరించిన తర్వాత తెలంగాణకు వస్తుండటంతో, ఈ పర్యటన ద్వారా రాష్ట్రంపై కేంద్రానికి ఉన్న చిత్తశుద్ధిని చాటిచెప్పాలని బీజేపీ నేతలు భావించారు.
రాష్ట్రంలో అధికారంలో ఉన్న కాంగ్రెస్ ప్రభుత్వం, ప్రధాన ప్రతిపక్షమైన బీఆర్ఎస్ లక్ష్యంగా ఈ పర్యటనను భారీ రాజకీయ వేదికగా మార్చుకోవాలని రాష్ట్ర బీజేపీ శాఖ వ్యూహం రచించింది. ఇందులో భాగంగా ప్రధాని పాల్గొనే బహిరంగ సభకు ‘ప్రజాగ్రహ సభ’ అని నామకరణం చేసింది. గత ప్రభుత్వాల వైఫల్యాలను, ప్రస్తుత ప్రభుత్వ లోపాలను ఎండగట్టడమే లక్ష్యంగా ఈ పేరును ఖరారు చేశారు. అయితే, ఈ పేరుపై ప్రధానమంత్రి కార్యాలయం (PMO) తీవ్ర అభ్యంతరం వ్యక్తం చేసింది. అభివృద్ధి కార్యక్రమాలకు వస్తున్న ప్రధాని పాల్గొనే సభకు రాజకీయ సభలలాగా ‘ప్రజాగ్రహ సభ’ అనే పేరు పెట్టడం సముచితం కాదని పీఎంఓ స్పష్టం చేసింది. ప్రభుత్వ అధికారిక కార్యక్రమాలతో ముడిపడి ఉన్న పర్యటనలో ఇటువంటి పేర్లు ప్రోటోకాల్ కు, సందర్భానికి విరుద్ధమని సూచించడంతో రాష్ట్ర బీజేపీ నేతలు ఒక్కసారిగా షాక్ కు గురయ్యారు. పీఎంఓ ఆదేశాలతో చేసేదేమీ లేక ‘ప్రజాగ్రహ సభ’ అనే పేరును తక్షణమే ఉపసంహరించుకుంటున్నట్లు ప్రకటించారు.
పేరు మార్చినప్పటికీ, ప్రధాని మోదీ పర్యటన రాజకీయ ఉద్దేశం మాత్రం స్పష్టంగా కనిపిస్తోంది. రాష్ట్రంలో బలపడుతున్న కాంగ్రెస్ కు అడ్డుకట్ట వేయడం, అదే సమయంలో కేడర్ లో నూతనోత్సాహాన్ని నింపడం మోదీ ప్రసంగం వెనుక ఉన్న ప్రధాన ఉద్దేశం. తెలంగాణ బీజేపీ నేతలు చెప్తున్న దాని ప్రకారం.. మోదీ తన ప్రసంగంలో రాష్ట్ర అభివృద్ధికి కేంద్రం ఇస్తున్న నిధులను వివరిస్తూనే, స్థానిక రాజకీయ పరిస్థితులపై తనదైన శైలిలో విమర్శలు చేసే అవకాశం ఉంది. ప్రధాని పర్యటనను విజయవంతం చేసేందుకు రాష్ట్ర వ్యాప్తంగా భారీగా జన సమీకరణ చేసే పనిలో రాష్ట్ర బీజేపీ నాయకత్వం నిమగ్నమైంది.
మొత్తానికి ప్రధాని మోదీ మే 10 పర్యటన అభివృద్ధి, రాజకీయాల కలయికగా సాగనుంది. సభ పేరు మార్పు వ్యవహారం కొంత చర్చకు దారితీసినప్పటికీ, ప్రధాని ఇచ్చే సందేశం తెలంగాణ భవిష్యత్తు రాజకీయాలపై ఎటువంటి ప్రభావం చూపుతుందనేది ఇప్పుడు ఆసక్తికరంగా మారింది.
