మలయాళ స్టార్ హీరో నివీన్ పాలీ కొత్త సినిమాకు “విజయం” టైటిల్ ఖరారు

హీరో నివీన్ పాలీ, డైరెక్టర్ ఆల్ఫోన్స్ పుత్రన్ కాంబోకు పాన్ ఇండియా స్థాయిలో క్రేజ్ ఉంది. వీరు కలిసి చేసిన నేరం, ప్రేమమ్ చిత్రాలు ఘన విజయాలు సాధించాయి. ఇలాంటి క్రేజీ కాంబో 12 ఏళ్ల తర్వాత కలిసి సినిమా చేస్తున్నారంటే అంచనాలు ఏ స్థాయిలో ఉంటాయో అర్థం చేసుకోవచ్చు. ఈ అంచనాల మధ్య నివీన్ పాలీ, ఆల్ఫోన్సో పుత్రన్ కొత్త సినిమాకు “విజయం” అనే టైటిల్ అనౌన్స్ చేశారు. ఈ సినిమాను సినీ హోలిక్స్, పాలీ జూనియర్ పిక్చర్స్ బ్యానర్స్ పై టాన్సన్ టోనీ, సునీల్ రమది నిర్మిస్తున్నారు.

కేరళ ఎర్నాకుళంలోని పద్మ థియేటర్ లో అభిమానుల సందడి మధ్య “విజయం” సినిమా టైటిల్ అనౌన్స్ మెంట్ వీడియోను రిలీజ్ చేశారు. ఎంటర్ టైనింగ్ గా రూపొందించిన ఈ వీడియో ఇప్పటికే సోషల్ మీడియాలో మంచి రెస్పాన్స్ తెచ్చుకుంటోంది. ఇది హీరో నివీన్ పాలీకి 50వ సినిమా కావడం విశేషం. రేసింగ్ నేపథ్యంగా సాగే ఈ చిత్రానికి రచన దర్శకత్వంతో పాటు ఎడిటింగ్ బాధ్యతలు కూడా ఆల్ఫోన్స్ పుత్రన్ నిర్వహిస్తున్నారు. ఈ సినిమాకు సంబంధించిన కాస్ట్ అండ్ క్రూ, ఇతర డీటెయిల్స్ త్వరలో మేకర్స్ ప్రకటించనున్నారు.