రీరిలీజ్ కు రెడీఅవుతున్న ఆరుగురు ప‌తివ్ర‌త‌లు

టాలీవుడ్‌లో రీరిలీజ్ ట్రెండ్ జోరుగా కొనసాగుతున్న వేళ మరో క్లాసిక్ ఫ్యామిలీ ఎంటర్‌టైనర్ ప్రేక్షకుల ముందుకు రానుంది. డైరెక్ట‌ర్ ఈవీవీ సత్యనారాయణ(EVV Satyanarayana) రూపొందించిన ఆరుగురు పతివ్రతలు(aaruguru pativratalu) సినిమాను మళ్లీ థియేటర్లలో రిలీజ్ చేయనున్నట్లు చిత్రబృందం అధికారికంగా ప్రకటించింది. స్పెష‌ల్ పోస్టర్‌తో ఈ విషయాన్ని వెల్లడించగా, రిలీజ్ డేట్ ను త్వరలో ప్రకటించనున్నట్లు తెలిపింది. ఈ ప్రకటనతో ఈవీవీ అభిమానులతో పాటు అప్పట్లో ఈ సినిమాను ఆస్వాదించిన ప్రేక్షకుల్లో మరోసారి ఆసక్తి నెలకొంది. ఫ్యామిలీ కథలకు తనదైన వినోదాన్ని జోడించే ఈవీవీ శైలి కారణంగా ఈ సినిమా రీ రిలీజ్ కూడా మంచి ఆదరణ పొందే అవకాశాలపై చర్చ మొదలైంది.

2004లో విడుదలైన ఈ సినిమా వైవాహిక జీవితంలోని విభిన్న కోణాలను వినోదాత్మకంగా ఆవిష్కరించి ప్రత్యేక గుర్తింపు సంపాదించింది. ఆరుగురు మహిళల జీవితాలను కేంద్రంగా తీసుకుని, వారి కుటుంబాల్లో జరిగే సంఘటనలు, అపార్థాలు, ఎమోష‌న్స్ ను కామెడీతో మేళవిస్తూ కథను ముందుకు తీసుకెళ్లిన తీరు ప్రేక్షకులను ఆకట్టుకుంది. అంతేకాదు, ఒకేసారి పలువురు కొత్త నటీనటులను పరిచయం చేయడం కూడా ఈ సినిమాకు ప్రత్యేక ఆకర్షణగా నిలిచింది. ఎల్.బి. శ్రీరామ్(LB Sriram), చలపతి రావు(Chalapathi Rao) తదితరుల నటనతో పాటు కమలాకర్(kamalakar) అందించిన సంగీతం కూడా సినిమా విజయానికి తోడ్పడింది.

ఇటీవలి కాలంలో పాత హిట్ సినిమాలకు వస్తున్న స్పందనను దృష్టిలో పెట్టుకుని ఈ సినిమాను కూడా కొత్త టెక్నికల్ క్వాలిటీతో ప్రేక్షకుల ముందుకు తీసుకురానున్నారు. ముఖ్యంగా ఈవీవీ కామెడీని పెద్ద తెరపై మరోసారి ఆస్వాదించాలని ఎదురు చూస్తున్న ప్రేక్షకులకు ఇది మంచి అవకాశం కానుంది. అల్లరి నరేష్(Allari Naresh) పుట్టినరోజు సందర్భంగా విడుద‌ల‌ చేసిన రీ రిలీజ్ పోస్టర్ సోషల్ మీడియాలో వైరల్ అవుతుండటంతో సినిమాపై అంచనాలు మరింత పెరిగాయి. ఇప్పుడు అందరి దృష్టి అధికారిక విడుదల తేదీపైనే ఉండగా, మరోసారి థియేటర్లలో ఈవీవీ మ్యాజిక్ ఎంతవరకు పనిచేస్తుందో చూడాలనే ఆసక్తి సినీ అభిమానుల్లో కనిపిస్తోంది.