ప్రధానమంత్రి పర్యటనకు కట్టుదిట్టమైన ఏర్పాట్లు : సీఎస్ రామకృష్ణారావు ఆదేశాలు

ప్రధాన మంత్రి నరేంద్ర మోదీ (Narendra Modi) ఈనెల 10న రాష్ట్రంలో పర్యటించనున్న నేపథ్యంలో అన్ని శాఖల అధికారులు సమన్వయంతో తగిన ఏర్పాట్లు చేయాలని ప్రభుత్వ ప్రధాన కార్యదర్శి కె.రామకృష్ణారావు (K. Ramakrishna Rao) ఆదేశాలు జారీ చేశారు. ప్రధాని పర్యటనకు చేపట్టాల్సిన ఏర్పాట్లపై డాక్టర్ బిఆర్ అంబేడ్కర్ సచివాలయంలో ప్రభుత్వ ప్రధాన కార్యదర్శి కె.రామకృష్ణా రావు సమీక్షా సమావేశం నిర్వహించారు. ఈ పర్యటనలో ప్రధానమంత్రి పలు అభివృద్ధి కార్యక్రమాలను ప్రారంభించడమేకాక సికింద్రాబాద్ పరేడ్ గ్రౌండ్ (Secunderabad Parade Ground) లో జరిగే బహిరంగ సభలో పాల్గొననున్నారు. అందుకు అనుగుణంగా బ్లూ బుక్ ప్రకారం తగిన భద్రతా ఏర్పాట్లు, శాంతిభద్రతలు, ట్రాఫిక్, బందోబస్త్ ఏర్పాట్లు చేయాలని పోలీసు శాఖకు ప్రధాన కార్యదర్శి సూచించారు. బేగంపేట్ విమానాశ్రయం (Begumpet Airport), హెలిప్యాడ్లతోపాటు అన్ని వేదికల వద్ద తగినన్ని అగ్నిమాపక వాహనాలు ఏర్పాటు చేయాలని ఫైర్ సర్వీసెస్ అధికారులను, అవసరమైన వైద్య సదుపాయాలు ఏర్పాటు చేయాలని ఆరోగ్య శాఖ అధికారులను ఆదేశించారు. ప్రధానమంత్రి కాన్వాయ్ పర్యటించే మార్గాలలో రోడ్లను పరిశీలించాలని, ఏవైనా మరమ్మతులు ఉంటే యుద్దప్రాతిపదికన పూర్తి చేయాలని పోలీసు, జీహెచఎంసీ, రోడ్లు, భవనాల శాఖల అధికారులను, నిరంతరాయంగా విద్యుత్ సరఫరా చేయాలని విద్యుత్ శాఖను ఆదేశించారు. అన్ని శాఖలు సమన్వయంతో పనిచేయాలని, ప్రధానమంత్రి పర్యటన విజయవంతమయ్యేలా చూడాలని సూచించారు.