‘నా జీవితం తెల్లకాగితం’.. పద్మశ్రీ మురళీ మోహన్ ఎమోషనల్ కామెంట్స్
- Published By: Rambabu Varma
- June 30, 2026 / 06:09 AM IST
పద్మశ్రీ పురస్కారం అందుకున్న సందర్భంగా ప్రముఖ నటుడు, నిర్మాత మురళీ మోహన్కు ఫిలిం క్రిటిక్స్ అసోసియేషన్ హైదరాబాద్ ఫిలిం ఛాంబర్లో ఘన సన్మానం నిర్వహించింది. ఈ కార్యక్రమంలో సినీ ప్రముఖులు, పాత్రికేయులు, ఫిలిం క్రిటిక్స్ అసోసియేషన్ సభ్యులు పాల్గొని ఆయన సినీ, సామాజిక సేవలను కొనియాడారు. ఈ సందర్భంగా మాట్లాడిన మురళీ మోహన్ తన సినీ ప్రయాణం, వ్యాపార జీవితం, వ్యక్తిగత విలువలను గుర్తు చేసుకున్నారు. “నా జీవితం ఒక తెల్లకాగితం. దానిపై ఎక్కడా ఒక మచ్చ కూడా పడలేదు. ఇకపై కూడా పడనివ్వను” అని అన్నారు. జీవితంలో తాను నిజాయితీని మాత్రమే నమ్ముకున్నానని, ఎలాంటి వివాదాలకు తావివ్వకుండా ముందుకు సాగానని చెప్పారు. తన జీవితాన్ని మలిచిన నలుగురిని ఎప్పటికీ మర్చిపోలేనని మురళీ మోహన్ తెలిపారు. హీరోగా తొలి అవకాశం ఇచ్చిన నిర్మాత అట్లూరి పూర్ణచంద్రరావు, తన సినీ ప్రయాణానికి అండగా నిలిచిన దర్శకుడు దాసరి నారాయణరావు, ఆర్థిక ప్రణాళికపై విలువైన సలహా ఇచ్చిన శోభన్ బాబు, అలాగే తన జీవితాన్ని ప్రభావితం చేసిన మరో గురువును కృతజ్ఞతతో గుర్తు చేసుకున్నారు. “ఆ నలుగురి వల్లే నేను ఈ స్థాయికి చేరుకున్నాను” అని అన్నారు.
తన అసలు పేరు రాజాబాబు అని, సినీ రంగంలోకి వచ్చిన తర్వాతే ‘మురళీ మోహన్’గా పేరు మారిందని తెలిపారు. ఆ పేరే తనకు ప్రత్యేక గుర్తింపును తీసుకొచ్చిందన్నారు. సినీ రంగంలో నటుడిగా మాత్రమే కాకుండా నిర్మాతగా కూడా ఎన్నో మంచి చిత్రాలను నిర్మించానని చెప్పారు. రియల్ ఎస్టేట్ రంగంలో కూడా ఎప్పుడూ నీతి, నిజాయితీతోనే వ్యాపారం చేశానని మురళీ మోహన్ పేర్కొన్నారు. సంపాదించిన ప్రతి రూపాయిని జాగ్రత్తగా వినియోగించానని, ఎవరినీ మోసం చేయకుండా వ్యాపారం చేయడమే తన విజయానికి కారణమని చెప్పారు. సామాజిక సేవ గురించి మాట్లాడుతూ, తాను చేసిన సహాయాలను ఎప్పుడూ ప్రచారం చేసుకోలేదన్నారు. “కుడి చేత్తో చేసిన సాయం ఎడమ చేతికి తెలియకూడదనే సిద్ధాంతాన్ని నమ్మాను. అందుకే ప్రచారం కోసం ఎప్పుడూ ప్రయత్నించలేదు” అని చెప్పారు.
విద్యాదానాన్ని అత్యంత గొప్ప సేవగా భావిస్తూ వేలాది మంది విద్యార్థులకు ఆర్థిక సహాయం అందించిన విషయాన్ని కూడా గుర్తు చేశారు. సినీ పాత్రల గురించి స్పందిస్తూ, జీవితంలో కొన్ని పాత్రలు చేయలేకపోయాననే అసంతృప్తి తనకు ఎప్పుడూ లేదన్నారు. అయితే తాగుబోతు పాత్రలు మాత్రం చేయకూడదని ఒక దశలో నిర్ణయించుకున్నానని చెప్పారు. ప్రస్తుతం తన నటనతో రూపొందిన ‘బ్రేకింగ్ న్యూస్’ చిత్రం త్వరలో విడుదల కానుందని వెల్లడించారు. తన కుటుంబం గురించి మాట్లాడుతూ, తన కుమారుడికి సినిమాలపై ఆసక్తి లేదని, కుమార్తెకు నటిగా మంచి భవిష్యత్తు ఉండేదని భావించినప్పటికీ ఆమె కూడా సినీ నటిగా రావాలనే ఆసక్తి చూపలేదని తెలిపారు. కార్యక్రమంలో ఫిలిం క్రిటిక్స్ అసోసియేషన్ గౌరవ అధ్యక్షుడు ప్రభు, అధ్యక్షుడు బత్తుల జె.వి. ప్రసాద్రావు, ప్రధాన కార్యదర్శి సురేష్ కొండేటి, ఉపాధ్యక్షులు జనార్ధన్, అబ్దుల్, సీనియర్ జర్నలిస్టులు, సినీ ప్రముఖులు పాల్గొని మురళీ మోహన్ సేవలను కొనియాడారు. పద్మశ్రీ పురస్కారం ఆయన సినీ, సామాజిక సేవలకు తగిన గుర్తింపుగా నిలిచిందని అభినందించారు.
ఇవి కూడా చదవండి
