టాక్సిక్ రూమ‌ర్ల‌పై క్లారిటీ ఇచ్చిన కియారా

కన్నడ స్టార్ య‌ష్(Yash) నటిస్తున్న పాన్ ఇండియా ప్రాజెక్ట్ టాక్సిక్ చుట్టూ ఇటీవలి రోజులుగా వినిపిస్తున్న రూమర్లకు హీరోయిన్ కియారా అద్వానీ(Kiara Advani) స్వయంగా ఫుల్ స్టాప్ పెట్టింది. సినిమాలో తన పాత్రకు సంబంధించిన బోల్డ్ సీన్స్ తగ్గించాలని తాను మేకర్స్‌ను కోరిందన్న ప్రచారం పూర్తిగా అసత్యమని ఆమె స్పష్టం చేసింది. సోషల్ మీడియాలో ఈ విషయంపై క్లారిటీ ఇస్తూ, నిర్ధారణ లేని కథనాలను నమ్మవద్దని అభిమానులకు విజ్ఞప్తి చేసింది.

టీజర్ రిలీజైన తర్వాత టాక్సిక్ కంటెంట్‌పై ఊహాగానాలు వేగంగా పెరిగాయి. ముఖ్యంగా కియారా పాత్ర గ్లామర్ డోస్ విషయంలో వచ్చిన వార్తలు సోషల్ మీడియాలో వైరల్ కావడంతో, సినిమా టీమ్‌పై అనవసరమైన ఒత్తిడి పెరిగినట్లు కనిపించింది. అయితే కియారా రియాక్ట్ అవ‌డంతో ఈ గాసిప్‌లకు చెక్ పడినట్టైంది. అధికారిక సమాచారం లేకుండా ప్రచారం అవుతున్న వార్తలు ఎలా తప్పుదోవ పట్టిస్తాయో ఈ ఘటన మరోసారి చూపించింది.

డైరెక్ట‌ర్ గీతూ మోహ‌న్‌దాస్(Geetu Mohandas) తెరకెక్కిస్తున్న ఈ భారీ యాక్షన్ డ్రామా, కెవిఎన్ ప్రొడ‌క్ష‌న్స్(KVN Productions) బ్యానర్‌పై నిర్మితమవుతోంది. జూన్ 4న విడుదల కావాల్సిన ఈ సినిమా ప్రస్తుతం వాయిదా పడగా, కొత్త రిలీజ్ డేట్‌పై ఆసక్తి నెలకొంది. యష్- కియారా జోడీ మొదటిసారి స్క్రీన్ షేర్ చేసుకుంటుండటంతో, కంటెంట్ కంటే రూమర్లే హాట్ టాపిక్ కావడం ఇండస్ట్రీలో చర్చనీయాంశంగా మారింది.