ద‌స‌రా బ‌రిలో వెంకీ, బాల‌య్య‌

2026 దసరా సీజన్ టాలీవుడ్‌లో భారీ బాక్సాఫీస్ పోరుకు వేదికగా మారే అవకాశాలు కనిపిస్తున్నాయి. ప్రస్తుతం ఇండస్ట్రీ వర్గాల్లో వినిపిస్తున్న ప్రచారం ప్రకారం నందమూరి బాలకృష్ణ(Nandamuri Balakrishna) హీరోగా గోపీచంద్ మలినేని(Gopichand Malineni) తెరకెక్కిస్తున్న మాస్ యాక్షన్ ఎంటర్‌టైనర్, అలాగే వెంకటేష్(Venkatesh)- త్రివిక్రమ్ శ్రీనివాస్(Trivikram Srinivas) కాంబినేషన్‌లో రూపొందుతున్న ఆదర్శ కుటుంబం(Aadarsha Kutumbam) దాదాపు ఒకే రిలీజ్ విండోను టార్గెట్ చేస్తున్నట్లు తెలుస్తోంది. అధికారిక ప్రకటనలు ఇంకా వెలువడకపోయినా అక్టోబర్ 16 దసరా సీజన్‌పై రెండు సినిమాల దృష్టి ఉందనే వార్తలు ట్రేడ్ సర్కిల్స్‌లో చర్చకు దారితీశాయి. ఈ పరిస్థితుల్లో పండగ బరిలో స్టార్ హీరోల మధ్య మరో ఆసక్తికర పోటీ చూడొచ్చనే అంచనాలు వ్యక్తమవుతున్నాయి.

ఈ క్లాష్‌ను ప్రత్యేకంగా మార్చేది రెండు సినిమాల జానర్‌ల మధ్య ఉన్న వ్యత్యాసమే. బాలకృష్ణ సినిమా పూర్తిస్థాయి మాస్ ఎలిమెంట్స్, యాక్షన్ ఎపిసోడ్స్, అభిమానులను అలరించే ఎలివేషన్లతో ముందుకు వస్తుండగా, వెంకటేష్-త్రివిక్రమ్ ప్రాజెక్ట్ కుటుంబ ప్రేక్షకులను టార్గెట్ గా చేసుకున్న ఎమోషనల్ ఎంటర్‌టైనర్‌గా రూపొందుతోందని సమాచారం. దీంతో బాక్సాఫీస్ వద్ద కేవలం ఇద్దరు స్టార్ హీరోల మధ్యే కాకుండా మాస్ వర్సెస్ ఫ్యామిలీ ఎంటర్‌టైనర్ అనే ఆసక్తికర సమీకరణం కూడా కనిపిస్తోంది. ముఖ్యంగా త్రివిక్రమ్‌కు ఈ సినిమా ఎంతో కీలకంగా మారిందని, భవిష్యత్ ప్రాజెక్టుల మార్కెట్ వ్యూహాలపై కూడా దీని ప్రభావం ఉండొచ్చని సినీ వర్గాలు భావిస్తున్నాయి.

మరోవైపు దసరా సీజన్ బాలకృష్ణకు గతంలో మంచి ఫలితాలు అందించిన సందర్భాలు ఉండటంతో అభిమానుల్లో ప్రత్యేక ఆసక్తి నెలకొంది. త్వరలో రిలీజ్‌ కానున్న ప్రచార కంటెంట్‌లో రిలీజ్ డేట్‌పై స్పష్టత వస్తే ఈ క్లాష్‌పై మరింత చర్చ జరిగే అవకాశం ఉంది. రెండు సినిమాలు నిజంగానే ఒకే సీజన్‌లో బరిలోకి దిగితే థియేటర్ల కేటాయింపు నుంచి ఓపెనింగ్స్ వరకు ప్రతి అంశం హాట్ టాపిక్‌గా మారనుంది. ప్రస్తుతం మాత్రం దసరా 2026 బాక్సాఫీస్ రేసులో వెంకటేష్, బాలకృష్ణ సినిమాలే ప్రధాన ఆకర్షణగా నిలుస్తున్నాయి.