రోనాల్డో ఆట ఎక్కడ..? జట్టుకు మైనస్ అవుతున్నాడా..?

ఫిఫా వరల్డ్ కప్ 2026 (FIFA World Cup 2026) లో పోర్చుగల్ ఫుట్‌బాల్ ఐకాన్ క్రిస్టియానో రోనాల్డో(Ronaldo) ఆటతీరుపై అంతర్జాతీయంగా పెద్ద ఎత్తున చర్చ నడుస్తోంది. డీఆర్ కాంగోతో జరిగిన గ్రూప్ స్టేజ్ తొలి మ్యాచ్‌లో పోర్చుగల్ 1-1తో డ్రా చేసుకోవడంపై క్రీడా విశ్లేషకులు అసంతృప్తి వ్యక్తం చేస్తున్నారు. 52 ఏళ్ల తర్వాత ప్రపంచకప్‌లోకి అడుగుపెట్టిన కాంగో జట్టుపై పోర్చుగల్ సులువుగా గెలుస్తుందని భావించినప్పటికీ, మైదానంలో మాత్రం రోనాల్డో తన పాత ఫామ్‌లో కనిపించకపోవడం అభిమానులను తీవ్ర నిరాశకు గురిచేసింది.

అతని చిరకాల ప్రత్యర్థి లియోనెల్ మెస్సీ అల్జీరియాపై హాట్రిక్ గోల్స్‌తో టోర్నీని ఘనంగా ప్రారంభించగా, రోనాల్డో మాత్రం కనీసం ఒక్క గోల్ కూడా చేయలేకపోయాడు. ప్రస్తుతం 41 ఏళ్ల వయసులో ఉన్న రోనాల్డో ప్రపంచంలోనే అత్యంత ఫిట్‌గా ఉండే అథ్లెట్లలో ఒకరైనప్పటికీ, వయసు ప్రభావం అతని ఆటపై స్పష్టంగా కనిపిస్తోందని విశ్లేషణలు వస్తున్నాయి. ఫ్రాన్స్ మాజీ స్ట్రైకర్ థియరీ హెన్రీ ఈ మ్యాచ్‌పై స్పందిస్తూ.. రోనాల్డో కేవలం తాను గోల్ చేయాలనే తాపత్రయంతో తోటి ఆటగాడు బ్రూనో ఫెర్నాండెజ్ వెళ్లే మార్గానికి అడ్డుపడ్డాడని, దీనివల్ల పోర్చుగల్‌కు దక్కాల్సిన స్పష్టమైన గోల్ అవకాశం చేజారిపోయిందని విమర్శించారు.

ఈ వయసులో రోనాల్డో తాను స్వయంగా స్కోర్ చేయడం కంటే.. జట్టులోని ఇతర యువ ఆటగాళ్లకు గోల్స్ చేసే అవకాశాలను (Spaces) సృష్టించడంపై దృష్టి పెట్టాలని హెన్రీ హితవు పలికారు. ఈ నేపథ్యంలో పోర్చుగల్ జట్టు రోనాల్డోపై అతిగా ఆధారపడుతోందా? లేదా అతనే జట్టుకు ఒక భారంగా మారుతున్నాడా? అనే ప్రశ్నలు తలెత్తుతున్నాయి. అయితే రోనాల్డో లాంటి దిగ్గజ ప్లేయర్ ఫామ్‌లోకి రావడానికి ఎంతో సమయం పట్టదని, రాబోయే గ్రూప్ మ్యాచ్‌లలో అతను ఖచ్చితంగా పుంజుకుంటాడని అభిమానులు ఆశిస్తున్నారు. పోర్చుగల్ తన తదుపరి మ్యాచ్‌లలో జూన్ 23న ఉజ్బెకిస్తాన్‌తో, జూన్ 28న కొలంబియాతో తలపడనుంది. రౌండ్ ఆఫ్ 32కి అర్హత సాధించాలంటే పోర్చుగల్ ఈ మ్యాచ్‌లలో ఖచ్చితంగా గెలవాల్సి ఉంటుంది.