చెన్నైలో మరో భారీ పోరు..!
- Published By: techteam
- May 2, 2026 / 12:02 PM IST
ఐపీఎల్ 2026లో భాగంగా మరో భారీ పోరుకు సమయం ఆసన్నమైంది. చెరో ఐదుసార్లు ఛాంపియన్లుగా నిలిచిన చెన్నై సూపర్ కింగ్స్, ముంబై ఇండియన్స్ జట్లు నేడు చెన్నైలోని ప్రతిష్టాత్మక చేపాక్ స్టేడియంలో తలపడనున్నాయి. రాత్రి 7:30 గంటలకు ప్రారంభమయ్యే ఈ మ్యాచ్ ఇరు జట్లకు చావో రేవో లాంటిది. రుతురాజ్ గైక్వాడ్ నేతృత్వంలోని చెన్నై, హార్దిక్ పాండ్యా సారథ్యంలోని ముంబై ఈ సీజన్లో తమ పట్టు నిలుపుకోవాలంటే ఈ విజయం చాలా కీలకం.
ఈ సీజన్లో ఇప్పటికే ఏప్రిల్ 23న జరిగిన మొదటి పోరులో చెన్నై జట్టు ముంబైని వారి సొంత గడ్డపైనే చిత్తు చేసింది. ఆ మ్యాచ్లో సంజూ శామ్సన్(Sanju Samson) మెరుపు సెంచరీతో (101 నాటౌట్) చెన్నై 207 పరుగులు చేయగా, అఖీల్ హోసేన్ ధాటికి ముంబై కేవలం 104 పరుగులకే కుప్పకూలింది. 103 పరుగుల భారీ తేడాతో ఓడిన ముంబై, నేడు దానికి ప్రతీకారం తీర్చుకోవాలని పట్టుదలతో ఉంది. ఐపీఎల్ చరిత్రలో ఈ రెండు జట్ల మధ్య రికార్డులు ఎప్పుడూ ఆసక్తికరంగానే ఉంటాయి.
ఇప్పటివరకు జరిగిన 42 మ్యాచుల్లో ముంబై 22 విజయాలతో స్వల్ప ఆధిక్యంలో ఉండగా, చెన్నై 20 మ్యాచుల్లో గెలిచింది. విశేషమేమిటంటే, చెన్నై(Chennai) హోమ్ గ్రౌండ్ అయిన చేపాక్లో కూడా ముంబైకే మంచి రికార్డ్ ఉంది. అక్కడ జరిగిన మ్యాచుల్లో ముంబై 6 సార్లు గెలవగా, చెన్నై కేవలం 4 సార్లు మాత్రమే విజయం సాధించింది. ఈ సీజన్ ఇరు జట్లకు ఆశాజనకంగా సాగడం లేదు. ప్రస్తుతం పాయింట్ల పట్టికలో చెన్నై 8 మ్యాచుల్లో 3 విజయాలతో 7వ స్థానంలో ఉండగా, ముంబై 8 మ్యాచుల్లో కేవలం 2 విజయాలతో 9వ స్థానంలో ఉంది. ప్లే-ఆఫ్స్ ఆశలు సజీవంగా ఉండాలంటే ఈ మ్యాచ్లో గెలుపు ఇద్దరికీ తప్పనిసరి. మరి ఈ రాత్రి ‘చేపాక్’ కోటపై విజయం ఎవరిని వరిస్తుందో వేచి చూడాలి.
