కార్మికుల బిడ్డలకు డాక్టర్ కల.. రూ. 24 వేలకే ఎంబీబీఎస్ సీటు! ఈఎస్ఐసీలో అరుదైన అవకాశం!
- Published By: Vishal
- May 3, 2026 / 07:25 PM IST
ESIC Medical College : వైద్య వృత్తిని చేపట్టాలనేది లక్షలాది మంది విద్యార్థుల కల. అయితే, నేటి రోజుల్లో మెడికల్ సీటు సాధించడం ఒక ఎత్తు అయితే, భారీ ఫీజులు భరించి చదవడం మరో ఎత్తు. సామాన్య కార్మిక కుటుంబాలకు చెందిన విద్యార్థులకు ఈ ఆర్థిక భారం ఒక పెద్ద సవాలుగా మారుతోంది. ఇటువంటి పరిస్థితుల్లో కార్మిక కుటుంబాల్లోని మెరిట్ విద్యార్థులకు అండగా నిలిచేందుకు ఎంప్లాయీస్ స్టేట్ ఇన్సూరెన్స్ కార్పొరేషన్ (ESIC) ఒక అద్భుతమైన మార్గాన్ని సుగమం చేస్తోంది. తమ పరిధిలో పనిచేసే కార్మికుల పిల్లలకు అత్యంత తక్కువ ఫీజుతో నాణ్యమైన వైద్య విద్యను అందించడం ద్వారా వారి కలలను నిజం చేస్తోంది.
కేవలం రూ. 24 వేలతో వైద్య విద్య..
సాధారణ ప్రైవేట్ వైద్య కళాశాలల్లో ఎంబీబీఎస్ చదవాలంటే ఏటా లక్షల రూపాయలు చెల్లించాల్సి ఉంటుంది. కానీ ఈఎస్ఐసీ తన పరిధిలో పనిచేసే కార్మికుల పిల్లల కోసం ఈ అవకాశాన్ని కేవలం రూ. 24 వేల వార్షిక ఫీజుకే కల్పిస్తోంది. ఈ పథకం ద్వారా ఆర్థిక స్తోమత తక్కువగా ఉన్నప్పటికీ, చదువులో ప్రతిభ కనబరిచే విద్యార్థులు ఎలాంటి ఆర్థిక ఇబ్బందులు లేకుండా డాక్టర్ కావడానికి బాటలు పడుతున్నాయి. ఈఎస్ఐసీ దేశవ్యాప్తంగా సొంతంగా 19 వైద్య కళాశాలలను అత్యాధునిక బోధనాసుపత్రులను నిర్వహిస్తోంది. వీటి ద్వారా మొత్తం 695 సీట్లను కార్మికుల పిల్లల కోసం ప్రత్యేకంగా కేటాయించింది. ఇందులో భాగంగానే తెలంగాణలోని సనత్నగర్ ఈఎస్ఐసీ వైద్య కళాశాలలో 52 సీట్లు అందుబాటులో ఉంచారు.
అర్హతలు ఎంపిక ప్రక్రియ..
ఈ అవకాశాన్ని పొందడానికి కొన్ని ప్రత్యేక నిబంధనలు ఉన్నాయి. నెలకు రూ. 21 వేల లోపు వేతనం పొందుతున్న కార్మికుల పిల్లలు ఈ ‘ఐపీ’ (Insured Persons) కోటా కింద దరఖాస్తు చేసుకోవడానికి అర్హులు. అంతేకాకుండా, విధి నిర్వహణలో గాయపడి వైకల్యం పొందిన వారు లేదా మరణించిన కార్మికుల పిల్లలకు కూడా ఈ కోటా కింద ప్రత్యేక ప్రాధాన్యత లభిస్తుంది. ఈ సీటు పొందాలంటే విద్యార్థులు తప్పనిసరిగా ‘నీట్ (యూజీ)-2026’ పరీక్షకు హాజరు కావాలి. దరఖాస్తుదారులు ఈఎస్ఐసీ అధికారిక వెబ్సైట్ ద్వారా ‘వార్డ్ ఆఫ్ ఐపీ’ (Ward of IP) సర్టిఫికేట్ పొందాల్సి ఉంటుంది.
దరఖాస్తు విధానం – కీలక గడువు..
విద్యార్థులు తమ వ్యక్తిగత వివరాలు, తల్లిదండ్రుల ఉద్యోగ సమాచారం, నీట్ అడ్మిట్ కార్డ్, మార్కుల షీట్ వంటి పత్రాలను ఆన్లైన్లో అప్లోడ్ చేయాలి. ఈ వివరాలను ఈఎస్ఐసీ డేటాబేస్తో ధృవీకరించుకున్నాక అధికారులు ‘వార్డ్ ఆఫ్ ఐపీ’ సర్టిఫికేట్ను జారీ చేస్తారు. ఈ సర్టిఫికేట్ ఉన్నవారు మాత్రమే నీట్ కౌన్సెలింగ్లో ఈ కోటా కింద పాల్గొనేందుకు వీలవుతుంది. మెరిట్ రిజర్వేషన్ నిబంధనల ఆధారంగా సీట్ల కేటాయింపు ఉంటుంది. ఫీజుతో పాటు ఇతర హాస్టల్, మెస్ సెక్యూరిటీ డిపాజిట్ ఛార్జీలను విద్యార్థులు అదనంగా చెల్లించాల్సి ఉంటుంది. ఈ ఏడాది సీటు పొందాలనుకునే అర్హులైన అభ్యర్థులందరూ ఈ నెల 28వ తేదీ లోపు దరఖాస్తు ప్రక్రియను పూర్తి చేయాలని ఈఎస్ఐసీ అధికారులు స్పష్టం చేశారు. కార్మిక కుటుంబాల విద్యార్థులు ఈ అరుదైన అవకాశాన్ని సద్వినియోగం చేసుకోవాలని విజ్ఞప్తి చేస్తున్నారు.
