AP Liquor Case: సిట్‌కే లంచాల ఎర.. ఏపీ మద్యం కుంభకోణంలో ట్విస్ట్

ఆంధ్రప్రదేశ్‌లో సంచలనం సృష్టించిన మద్యం కుంభకోణం కేసులో మరో దిగ్భ్రాంతికరమైన విషయం వెలుగులోకి వచ్చింది. ఈ కేసులో ప్రధాన నిందితులుగా ఉన్న వైసీపీ నేతలు, ఏకంగా దర్యాప్తు చేస్తున్న సిట్ అధికారులకే లంచం ఇచ్చి కేసు నుంచి తప్పించుకోవాలని చూసిన వైనం బయటపడింది. గత వైసీపీ ప్రభుత్వ హయాంలో APSBCL డిపోల నుండి ప్రభుత్వ మద్యం దుకాణాలకు మద్యం సరఫరా చేసే రవాణా కాంట్రాక్టుల్లో భారీ అవినీతి జరిగిందని ఆరోపణలు వచ్చాయి. సుమారు రూ.200 కోట్ల నుంచి రూ.400 కోట్ల మేర దోచుకున్నట్లు ప్రాథమిక విచారణలో తేలింది. ఈ నేపథ్యంలోనే గత నెల 10న సీఐడీ కేసు నమోదు చేసింది.

ఈ కుంభకోణంలో మాజీ మంత్రి కారుమూరి నాగేశ్వరరావు, ఆయన కుమారుడు కారుమూరి సునీల్‌కుమార్, కోడలు కీర్తి నిందితులుగా ఉన్నారు. ఈ కేసులో తమ పేర్లు తొలగించుకోవడానికి, దర్యాప్తును ప్రభావితం చేయడానికి వారు ఒక పక్కా స్కెచ్ వేశారు. ఇందుకోసం సిట్ అధికారులను మేనేజ్ చేయాలని భావించి, కాకు మునికుమార్ అనే మధ్యవర్తిని రంగంలోకి దించారు. సిట్ అధికారులు గత నెల 24న సుదర్శన్ కన్స్ట్రక్షన్స్ ప్రతినిధి వల్లూ సందీప్‌ను విచారించినప్పుడు అసలు విషయం బయటపడింది. మద్యం రవాణా కాంట్రాక్టు కోసం తాను కారుమూరి కుటుంబానికి రూ. 9 కోట్లు కమిషన్ ఇచ్చానని, ఈ కేసు నుంచి తప్పించుకోవడానికి వారు మునికుమార్ ద్వారా సిట్ అధికారులకు లంచం ఇచ్చేందుకు ప్రయత్నిస్తున్నారని సందీప్ వెల్లడించారు.

దీనిని ధృవీకరించుకోవడానికి సిట్ అధికారులు మునికుమార్‌ను విచారించగా, అతను నేరాన్ని అంగీకరించాడు. కారుమూరి సునీల్ తనకు రూ. 25 లక్షలు ఇచ్చి సిట్ అధికారులకు లంచంగా ఇవ్వమని కోరినట్లు అతను వాంగ్మూలం ఇచ్చాడు. అయితే, తనకు అధికారులతో పరిచయం లేకపోయినా, ఉన్నట్లు నమ్మించి ఆ డబ్బు తీసుకున్నానని, అధికారులకు ఇచ్చానని అబద్ధం చెప్పానని మునికుమార్ వెల్లడించారు. ఈ వ్యవహారంపై సిట్ సభ్యుడు ఆర్‌.శ్రీహరిబాబు ఫిర్యాదు చేయడంతో, విజయవాడ సూర్యారావుపేట పోలీసులు కారుమూరి సునీల్ కుమార్, మునికుమార్‌లపై కేసు నమోదు చేశారు.

వైసీపీ హయాంలో మద్యం రవాణా కాంట్రాక్టులను తమకు అనుకూలమైన సిగ్మా లాజిస్టిక్స్, ప్రసాద్ ట్రాన్స్‌పోర్ట్ లకు కట్టబెట్టారు. తొలుత కేసు రవాణాకు రూ.13 ఉంటే, దానిని అడ్డగోలుగా రూ.34కు పెంచారు. కోస్తా, ఉత్తరాంధ్ర జిల్లాల్లో ఈ రవాణా సబ్-కాంట్రాక్టులను కారుమూరి సునీల్ తన గుప్పిట్లో ఉంచుకున్నారు. హైదరాబాద్‌లో కార్యాలయం తెరిచి, ప్రతి జిల్లాలో వైసీపీ అనుచరులకే ఈ పనులు అప్పగించారు. సిగ్మా లాజిస్టిక్స్ నుంచి కారుమూరి కుటుంబ సభ్యుల ఖాతాల్లోకి భారీగా నిధులు మళ్లినట్లు దర్యాప్తులో ఆధారాలు లభించాయి.

ఈ ఘటన ఆంధ్రప్రదేశ్ రాజకీయాల్లో పెను సంచలనంగా మారింది. దర్యాప్తు అధికారులనే ప్రలోభపెట్టే స్థాయికి నిందితులు వెళ్లడం అంటే, వ్యవస్థలను మేనేజ్ చేయగలమనే వారి ధీమాను సూచిస్తోంది. సాక్షులను బెదిరించడం, దర్యాప్తును నీరుగార్చడానికి ప్రయత్నించడం వంటి చర్యలు కేసు తీవ్రతను మరింత పెంచుతున్నాయి. సిట్ అధికారులు పారదర్శకంగా వ్యవహరించి, ఈ లంచం కుట్రను బయటపెట్టడం ద్వారా వ్యవస్థపై నమ్మకాన్ని నిలబెట్టారు. ప్రస్తుతం ఈ కేసులో ముమ్మర దర్యాప్తు సాగుతోంది. రాజకీయ పలుకుబడితో కేసు నుంచి తప్పుకోవాలనుకున్న కారుమూరి కుటుంబానికి ఈ కొత్త లంచం కేసు మరిన్ని ఇబ్బందులు తెచ్చిపెట్టేలా ఉంది.