తెలంగాణ కేబినెట్ విస్తరణకు బ్రేక్?

తెలంగాణ రాజకీయాల్లో గత కొంతకాలంగా హాట్ టాపిక్‌గా నడుస్తున్న మంత్రివర్గ పునర్వ్యవస్థీకరణ ప్రక్రియకు ప్రస్తుతానికైతే బ్రేక్ పడినట్లు తెలుస్తోంది. ఢిల్లీ వేదికగా ఏఐసీసీ అగ్రనాయకత్వం, ఇటు రాష్ట్రంలో ముఖ్యమంత్రి రేవంత్ రెడ్డి ఎన్ని సమీక్షలు జరిపినప్పటికీ.. క్షేత్రస్థాయిలో ఉన్న సంక్లిష్ట రాజకీయ సమీకరణాలు ఈ ప్రక్రియకు గట్టిగా మోకాలడ్డుతున్నాయి. ఉన్న సమస్యలకు తోడు కొత్త సమస్యలను కొనితెచ్చుకోవడం ఇష్టం లేక, కాంగ్రెస్ హైకమాండ్ ఈ కేబినెట్ విస్తరణ అంశాన్ని ప్రస్తుతానికి పూర్తిగా పక్కన పెట్టేసినట్లు తెలుస్తోంది.

తెలంగాణ కాంగ్రెస్‌లో పైకి అంతా సజావుగానే ఉన్నట్లు కనిపిస్తున్నప్పటికీ.. అంతర్గతంగా నడుస్తున్న వర్గ పోరాటం ఊహించిన దానికంటే చాలా ఎక్కువగా ఉందనేది నగ్నసత్యం. ముఖ్యంగా, రాహుల్ గాంధీకి అత్యంత నమ్మకస్తురాలైన ఏఐసీసీ సీనియర్ నేత మీనాక్షి నటరాజన్ వ్యవహారం ఇప్పుడు పార్టీలో తీవ్ర చర్చనీయాంశంగా మారింది. మధ్యప్రదేశ్‌లో ఆమె రాజ్యసభ నామినేషన్ తిరస్కరణకు గురికావడంలో తెలంగాణకు చెందిన ఒక వర్గం నేతల పాత్ర ఉందన్న అనుమానాలు బలంగా వ్యక్తమవుతున్నాయి. అధిష్టానానికి అత్యంత సన్నిహితురాలైన నేతకే రాష్ట్రంలోని సొంత పార్టీ వర్గం నుండి సరైన మద్దతు లభించలేదనే టాక్ రాహుల్ గాంధీని తీవ్ర అసంతృప్తికి గురిచేసినట్లు సమాచారం. ఈ ఒక్క ఘటనతో తెలంగాణ కాంగ్రెస్ సీనియర్ల మధ్య ఉన్న విభేదాలు ఏ స్థాయికి చేరాయో హైకమాండ్‌కు స్పష్టమైన అవగాహన వచ్చింది.

నిజానికి ముఖ్యమంత్రి రేవంత్ రెడ్డి, ఏఐసీసీ పెద్దలు కలిసి తెలంగాణ కేబినెట్‌లో భారీ మార్పులు చేయాలని ఒక పక్కా ప్లాన్ సిద్ధం చేశారు. సరిగా పనిచేయని మంత్రులను కేబినెట్ నుండి తొలగించాలని, సామాజిక, ప్రాంతీయ సమీకరణాల ఆధారంగా కొత్తవారికి అవకాశం కల్పించాలని భావించారు. అసంతృప్త సీనియర్లను ప్రసన్నం చేసుకోవడానికి కార్పొరేషన్లు, నామినేటెడ్ పదవులను సర్దాలని నిర్ణయించారు. కానీ, మీనాక్షి నటరాజన్ ఎపిసోడ్ రేపిన సెగలతో సమీకరణాలు పూర్తిగా మారిపోయాయి. ఈ తరుణంలో మంత్రివర్గంలో చెయ్యి పెడితే, పదవులు దక్కని అసంతృప్త నేతలు తిరుగుబాటు జెండా ఎగురవేసే ప్రమాదం ఉందని అధిష్టానం గ్రహించింది. అది కాస్తా ప్రభుత్వ స్థిరత్వానికే ఎసరు తెచ్చే అవకాశం ఉందన్న విశ్లేషణలతో పాత ప్లాన్‌ను పూర్తిగా పక్కన పెట్టేసినట్లు విశ్లేషకులు భావిస్తున్నారు.

ఒకవైపు పార్టీని కంటికి రెప్పలా కాపాడుకుంటూనే, మరోవైపు పరిపాలనను ముందుకు తీసుకెళ్లాల్సిన కత్తిమీద సాము లాంటి పరిస్థితిని సీఎం రేవంత్ రెడ్డి ఎదుర్కొంటున్నారు. కేబినెట్ విస్తరణ చేపడితే.. ఆశావహుల సంఖ్య ఇక్కడ డజన్లలో ఉంది. ఉమ్మడి ఖమ్మం, కరీంనగర్, హైదరాబాద్, నిజామాబాద్ జిల్లాల నుండి సీనియర్లు, అలాగే ఇతర పార్టీల నుండి వలస వచ్చిన నేతలు మంత్రి పదవుల కోసం తీవ్ర ఒత్తిడి తెస్తున్నారు. ఈ తరుణంలో ఎవరికి ఇచ్చినా మరొకరు అసంతృప్తికి గురికావడం ఖాయం. అందుకే రేవంత్ రెడ్డి కూడా ఈ వివాదాన్ని తలకెత్తుకోవడం కంటే, “ఉన్న ముఠా తగాదాలను మరింత రచ్చ చేయకుండా యథాతథ స్థితిని కొనసాగించడమే శ్రేయస్కరం” అనే ముగింపునకు వచ్చినట్లు ఢిల్లీ వర్గాల సమాచారం. మరింత సరైన సమయం వచ్చే వరకు వేచి చూడడమే రాజనీతి అని ఆయన భావిస్తున్నారు.

తెలంగాణలో త్వరలోనే మంత్రివర్గ పునర్ వ్యవస్థీకరణ జరుగుతుందనే ప్రచారానికి ప్రస్తుతానికైతే బ్రేక్ పడినట్లే. ఒకవేళ అత్యవసరమై ఖాళీగా ఉన్న పోస్టులను భర్తీ చేయాల్సి వచ్చినా.. అది కేవలం నామమాత్రపు విస్తరణగానే ఉంటుంది తప్ప, ఎవరినీ మార్చే లేదా తొలగించే సాహసం హైకమాండ్ చేయకపోవచ్చు.