ఏపీలో సంచలనం, పాస్టర్ ఆనంద్ ఎస్సీ హోదా రద్దు..?

బాపట్ల(Bapatla) జిల్లా పిట్టలవానిపాలెం మండలానికి చెందిన పాస్టర్ చింతాడ ఆనంద్ పాల్ ఎస్సీ కుల ధ్రువీకరణ పత్రం చెల్లుబాటుపై గత కొంతకాలంగా సాగుతున్న ఉత్కంఠకు త్వరలోనే తెరపడనుంది. క్రైస్తవ మత ప్రచారకుడిగా ఉంటూ ఎస్సీ హోదాను అనుభవించడం రాజ్యాంగ విరుద్ధమంటూ దాఖలైన పిటిషన్లపై జిల్లా జాయింట్ కలెక్టర్ నేతృత్వంలోని జిల్లా స్థాయి స్కృటినీ కమిటీ (DLSC) నేడు తుది విచారణను వేగవంతం చేసింది. ఈ విచారణలో భాగంగా ఇరు వర్గాల వాదనలను విన్న జాయింట్ కలెక్టర్, పాస్టర్ ఆనంద్ మత మార్పిడికి సంబంధించిన పక్కా ఆధారాలను సేకరించారు.

ఆయన క్రైస్తవ మత పద్ధతుల్లో జీవిస్తున్నారని, పాస్టర్‌గా బాధ్యతలు నిర్వర్తిస్తున్నారని నిర్ధారిస్తూ తహసీల్దార్ మరియు ఆర్డీవోలు ఇచ్చిన నివేదికలను కమిటీ క్షుణ్ణంగా పరిశీలించింది. ఈ వ్యవహారంలో సుప్రీంకోర్టు గతంలో ఇచ్చిన చారిత్రాత్మక తీర్పు ఇప్పుడు పాస్టర్ ఆనంద్‌కు ప్రతిబంధకంగా మారింది. క్రైస్తవ మతాన్ని స్వీకరించిన వ్యక్తి హిందూ షెడ్యూల్డ్ కులాలకు (SC) కేటాయించిన రిజర్వేషన్లు మరియు ఇతర ప్రయోజనాలను పొందలేరని అత్యున్నత న్యాయస్థానం స్పష్టం చేసింది.

ఈ నిబంధనను ఉటంకిస్తూ, పిటిషనర్ రామిరెడ్డి గతంలోనే హైకోర్టులో(High Court) పోరాడి విజయం సాధించారు. హైకోర్టు ఆదేశాల మేరకు ఇప్పుడు జిల్లా యంత్రాంగం రంగంలోకి దిగి, ఆనంద్ పాల్ యొక్క ఎస్సీ హోదాను రద్దు చేసేందుకు అవసరమైన అన్ని పత్రాలను సిద్ధం చేసింది. జాయింట్ కలెక్టర్ తన నివేదికలో ఆనంద్ పాల్ ఎస్సీ హోదాను రద్దు చేయాలని స్పష్టంగా సిఫార్సు చేయబోతున్నట్లు అధికార వర్గాల ద్వారా తెలుస్తోంది. ఇక ఈ మొత్తం వ్యవహారంలో బాపట్ల జిల్లా కలెక్టర్ నిర్ణయమే అత్యంత కీలకం కాబోతోంది.

జాయింట్ కలెక్టర్ సమర్పించే తుది నివేదికను పరిశీలించిన అనంతరం, కలెక్టర్ అధికారికంగా ఎస్సీ సర్టిఫికేట్ రద్దు ఉత్తర్వులు జారీ చేయనున్నారు. ఈ ఉత్తర్వులు వెలువడిన వెంటనే, పాస్టర్ ఆనంద్ గతంలో ఎస్సీ హోదాను ఉపయోగించి పెట్టుకున్న కేసులు మరియు పొందిన ప్రభుత్వ ప్రయోజనాలన్నీ చట్టరీత్యా చెల్లకుండా పోతాయి. అంతేకాకుండా, ఆయన పొందిన పరిహారాన్ని ప్రభుత్వం తిరిగి వసూలు చేసే అవకాశం కూడా ఉంది. జిల్లా కలెక్టర్ కార్యాలయం నుండి ఏ క్షణమైనా ఈ సంచలన ఉత్తర్వులు వెలువడే అవకాశం ఉండటంతో బాపట్ల జిల్లాలో ఈ అంశంపై రాజకీయంగా, సామాజికంగా పెద్ద చర్చ నడుస్తోంది.