Kiran Abbavaram: ఆ నమ్మకాన్ని ఎప్పుడూ వదులుకోదు
- Published By: Sravani
- March 22, 2026 / 05:00 PM IST
హైదరాబాద్లో జరిగిన తిమ్మరాజుపల్లి TV(Thimmarajupalli TV) గ్రాండ్ రివీల్ ఈవెంట్లో హీరో-నిర్మాత కిరణ్ అబ్బవరం(Kiran Abbavaram) తన మనసుకు ఎంతో దగ్గరైన ఈ ప్రాజెక్ట్పై ఆసక్తికర వ్యాఖ్యలు చేశారు. కొత్త టాలెంట్ను ప్రోత్సహించాలనే తన కల ఈ సినిమాతో నిజమైందని వెల్లడించిన ఆయన, కెరీర్ ప్రారంభ దశలోనే కొత్త కళాకారులతో సినిమా చేయాలనే ఆలోచన తనలో ఉండేదని గుర్తుచేశారు. అనేక అనిశ్చితులు ఎదురైనా, ఒకరోజు తాను ఎదిగి ఇతరులకు అవకాశాలు కల్పించే స్థాయికి చేరుతాననే నమ్మకాన్ని ఎప్పుడూ వదలలేదని చెప్పారు. తిమ్మరాజుపల్లి TV ఆ ఆలోచనకు ప్రతిఫలమని పేర్కొన్నారు.
ఈ సినిమా 1990ల గ్రామీణ నేపథ్యంలో సాగే ప్రయోగాత్మక కథగా రూపొందిందని కిరణ్ వివరించారు. ఆ కాలంలో టెలివిజన్ అరుదుగా ఉండటం, గ్రామాల్లో ప్రజలు ఒకేచోట చేరి టీవీ చూసే సంస్కృతి ఈ సినిమాలో ప్రధాన ఆకర్షణగా నిలుస్తుందని తెలిపారు. ఆ అమాయకత్వం, అనుబంధం, సామూహిక అనుభూతిని మళ్లీ తెరపై చూపించే ప్రయత్నం చేశామని కిరణ్ ఈ సందర్భంగా చెప్పారు. అదే సమయంలో సస్పెన్స్, ఎమోషన్స్ సమపాళ్లలో మిళితమై కథను మరింత ఆసక్తికరంగా తీర్చిదిద్దామని వెల్లడించారు.
డైరెక్టర్ మునిరాజ్(muniraj) కమర్షియల్ ఫార్ములాలకు లోబడకుండా నిజాయితీగా కథను తెరకెక్కించారని కిరణ్ ప్రశంసించారు. షూటింగ్ టైమ్ లో చిత్రబృందం గ్రామ వాతావరణంలోనే నివసిస్తూ, సౌకర్యాలను పక్కనపెట్టి పనిచేయడం ద్వారా రియాలిటీని కాపాడేందుకు కృషి చేసిందని తెలిపారు. ఈ సినిమా కొత్తగా ఇండస్ట్రీలోకి వస్తున్న కళాకారులకు వేదికగా నిలుస్తుందని ఆశాభావం వ్యక్తం చేసిన ఆయన, ఏప్రిల్ 17న విడుదల కానున్న ఈ సినిమా కుటుంబ ప్రేక్షకులు, ముఖ్యంగా 90ల తరం ప్రేక్షకులను బలంగా ఆకట్టుకుంటుందనే విశ్వాసాన్ని కిరణ్ అబ్బవరం వ్యక్తం చేశారు.
ఇవి కూడా చదవండి
