రాజ‌కీయాల్లోకి ధ‌నుష్‌?

తమిళ సినీ పరిశ్రమలో నటుడిగా మాత్రమే కాకుండా దర్శకుడు, నిర్మాత, గాయకుడిగా కూడా తన ప్రత్యేక ప్రతిభను చాటుకున్న ధ‌నుష్‌(Dhanush) పేరు ఇప్పుడు మరోసారి రాజకీయాల నేపథ్యంలో వార్తల్లో నిలిచింది. ఇటీవల తమిళనాడులో సినీ ప్రముఖుల రాజకీయ ప్రవేశాలపై చర్చలు జరుగుతున్న తరుణంలో, ధనుష్ ఫ్యూచ‌ర్ లో పాలిటిక్స్ లోకి వచ్చే అవకాశాలపై ఊహాగానాలు ఊపందుకున్నాయి. ముఖ్యంగా సినీ రంగం నుంచి రాజకీయ రంగంలోకి అడుగుపెట్టిన పలువురు నాయకులు రాష్ట్ర రాజకీయాల్లో ప్రభావం చూపిన నేపథ్యంలో, ధనుష్ పేరు కూడా ఈ లిస్ట్ లో వినిపించడం ఆసక్తిని రేకెత్తిస్తోంది.

ఈ చర్చలకు మరింత బలం చేకూర్చేలా ధనుష్ తండ్రి, ప్రముఖ డైరెక్ట‌ర్ క‌స్తూరి రాజా(Kasthuri Raja) ఇటీవల చెన్నైలో జరిగిన ఒక కార్యక్రమంలో చేసిన వ్యాఖ్యలు దృష్టిని ఆకర్షించాయి. రాజకీయాలు ప్రజాసేవకు ఒక వేదిక అని పేర్కొన్న ఆయన, సమాజానికి మేలు చేయాలనే సంకల్పం ఉన్నవారు రాజకీయాల్లోకి రావడంలో తప్పేమీ లేదన్నారు. ఈ సందర్భంగా తన కుటుంబ సభ్యుల భవిష్యత్తు గురించి మాట్లాడిన కస్తూరి రాజా, తన కుమారులు ధనుష్, సెల్వ రాఘ‌వ‌న్(Selvaraghavan) వంటి వారు రాజకీయ రంగాన్ని ఎంచుకునే అవకాశాన్ని కొట్టిపారేయలేమని వ్యాఖ్యానించారు.

ప్రస్తుతం ధనుష్ తన సినీ ప్రాజెక్టులతో బిజీగా ఉన్నప్పటికీ, ఆయన రాజకీయ భవిష్యత్తుపై వస్తున్న చర్చలు అభిమానుల్లో ఆసక్తిని పెంచుతున్నాయి. అయితే రాజకీయ ప్రవేశంపై ధనుష్ స్వయంగా ఎలాంటి అధికారిక ప్రకటన చేయలేదు. అయినప్పటికీ, కస్తూరి రాజా వ్యాఖ్యలతో ఈ అంశం మరోసారి కోలీవుడ్ వర్గాల్లో హాట్ టాపిక్‌గా మారింది. రాబోయే కాలంలో ధనుష్ తన కెరీర్‌ను పూర్తిగా సినిమాలకే పరిమితం చేస్తారా, లేక ప్రజా జీవితంలోనూ కొత్త అధ్యాయాన్ని ప్రారంభిస్తారా అన్నది ఆసక్తికరంగా మారింది.