Sobhitha Dhulipala: బాలీవుడ్ పీఆర్‌ వ్యవస్థపై నటి శోభిత

బాలీవుడ్‌లో పెరుగుతున్న పీఆర్ సంస్కృతి పై చర్చలు ముదురుతున్న వేళ, టాలీవుడ్ నటి మరియు అక్కినేని కుటుంబ కోడలు శోభిత ధూళిపాళ(Sobhitha Dhulipala) తన అభిప్రాయాన్ని స్పష్టంగా వెల్లడించారు. ఇటీవల పలువురు సినీ ప్రముఖులు పీఆర్ స్టంట్స్ గురించి స్పందిస్తుండగా, శోభిత మాత్రం తాను ఆ పోటీలో భాగం కావాలనుకోవడం లేదని తేల్చి చెప్పారు. ప్రతి చిన్న విషయాన్ని ప్రచారంగా మలచడం, 24 గంటలు మీడియాలో కనిపించడం తాను అనుసరించే మార్గం కాదని ఆమె పేర్కొన్నారు. ఎప్పుడూ వార్తల్లో ఉండటమే లక్ష్యంగా పెట్టుకోకుండా, తన పనే తన గురించి మాట్లాడాలనేది ఆమె ఉద్దేశం.

సెలబ్రిటీల వ్యక్తిగత జీవితం కూడా పీఆర్ వ్యూహాల్లో భాగమవుతున్న ప్రస్తుత పరిస్థితిపై శోభిత సున్నితంగా స్పందించారు. వ్యక్తిగత జీవితం, వృత్తి జీవితం మధ్య స్పష్టమైన గీత ఉండాలని ఆమె భావిస్తున్నారు. అధిక ప్రచారం కొన్నిసార్లు వాస్తవికతను దూరం చేసే ప్రమాదం ఉందని, అందుకే తాను సహజమైన మార్గాన్నే ఎంచుకుంటానని చెప్పారు. అయితే ప్రతి నటుడికి తమ తమ ప్రాధాన్యతలు ఉంటాయని, ఎవరినీ తప్పుపట్టే ఉద్దేశం తనకు లేదని కూడా క్లారిటీ ఇచ్చారు. ప్రచారం కంటే పనితనమే కళాకారుడిని నిలబెడుతుందని శోభిత‌ అభిప్రాయం.

రీసెంట్ గా ఓటీటీ వేదికగా విడుదలైన చీకటిలో(cheekatilo) సినిమాతో శోభిత మరోసారి నటిగా ప్రశంసలు అందుకున్నారు. తెలుగు సినిమాలపై తనకు ప్రత్యేక అనుబంధం ఉందని, తెలుగు భాషలో నటించడం ఎంతో నేచుర‌ల్ గా అనిపిస్తుందని తెలిపారు. మాతృభాషలో భావాలను మరింత లోతుగా వ్యక్తపరచగలమని, డబ్బింగ్ సమయంలో ప్రతి సన్నివేశాన్ని ఆస్వాదిస్తానని చెప్పారు. గ్లామర్ కంటే నైజం ముఖ్యమని నమ్ముతున్న శోభిత, తన ప్రయాణాన్ని తన సొంత శైలిలో కొనసాగించాలని నిర్ణయించుకున్నట్లు స్పష్టం చేశారు.