Nitin Gadkari: ఏపీలో రూ. 573 కోట్లతో భారీ రహదారి.. ప్రకటించిన గడ్కరీ

ఆంధ్రప్రదేశ్‌లో మౌలిక సదుపాయాల అభివృద్ధికి కేంద్ర ప్రభుత్వం మరో కీలక వరం ప్రకటించింది. కృష్ణా జిల్లాలోని ప్రతిష్టాత్మక మచిలీపట్నం పోర్టుకు (Machilipatnam Port) అనుసంధానతను మెరుగుపరిచేందుకు రూ. 573.77 కోట్లతో 6-లేన్ల ఎక్స్‌టర్నల్ పోర్ట్ కనెక్టివిటీ రోడ్డు నిర్మాణానికి ఆమోదం తెలిపినట్లు కేంద్ర మంత్రి నితిన్ గడ్కరీ (Nitin Gadkari) వెల్లడించారు.

జాతీయ రహదారి-65, జాతీయ రహదారి-216 (కత్తిపూడి-ఒంగోలు) కూడలి నుండి మచిలీపట్నం బైపాస్ మీదుగా పోర్టు వరకు ఈ 6-లేన్ల రహదారిని నిర్మించనున్నారు. ఈ ప్రాజెక్టులో భాగంగా ప్రధాన రహదారితో పాటు సర్వీస్ రోడ్లు, 3 ఫ్లైఓవర్లు, ఒక రైల్వే ఓవర్‌బ్రిడ్జి (ROB) నిర్మిస్తామని గడ్కరీ (Nitin Gadkari) ప్రకటించారు.

దీనివల్ల జాతీయ రహదారుల నుండి నేరుగా పోర్టుకు కనెక్టివిటీ ఏర్పడి, సరుకు రవాణా వేగవంతమవుతుంది. అలాగే మచిలీపట్నం నగరంలో ట్రాఫిక్ సమస్యలు తగ్గి, లాజిస్టిక్స్ సామర్థ్యం పెరుగుతుందని గడ్కరీ (Nitin Gadkari) తెలిపారు.