“బొద్దింకలం ఒక్కటవుదాం”.. భారత Gen Z తిరుగుబాటు

Indian Youth: భారతదేశంలో గత కొన్ని వారాలుగా జరుగుతున్న పరిణామాలు చూస్తే ఈ మాట నిజమే అనిపిస్తుంది. ఒక పరీక్ష రద్దు, కొన్ని పరిపాలనా తప్పిదాలు, ఒక న్యాయమూర్తి వ్యాఖ్య… ఇవన్నీ కలిసొచ్చి లక్షలాది మంది  Gen Z  యువతలో పేరుకుపోయిన అసంతృప్తికి రూపం ఇచ్చాయి. నిశ్శబ్దంగా బాధపడుతూ,మౌనంగా భరిస్తున్న యువత ఇప్పుడు మాట్లాడుతోంది. భావోద్వేగాల రాజకీయాలు పక్కనపెట్టి, బతుకు దెరువు కోసం సరికొత్త పంథాలో సాగుతున్న ఒక అపూర్వ ‘యువ విప్లవం’ ఇది.

పరీక్షల వ్యవస్థలో ‘లీకులు’.. విద్యార్థుల బతుకుల్లో ‘చీకట్లు’..

పెద్ద చదువులు చదివి, పెద్ద ఉద్యోగాలు సాధించాలనేది ప్రతి మధ్యతరగతి యువత కల. కానీ, ఆ కలల పునాదులనే కదిలించేలా జరిగాయి వరుస వైఫల్యాలు.

నీట్ (NEET) నిప్పులు: మే 3న జరిగిన నీట్ పరీక్ష, పేపర్ లీక్ ఆరోపణలతో కేవలం తొమ్మిది రోజుల్లోనే రద్దయింది. 22 లక్షల మంది విద్యార్థుల శ్రమ, 1 లక్షా 30 వేల సీట్ల కోసం సాగిన పరిశ్రమ ఒక్కసారిగా గాల్లో కలిసిపోయింది.

సిస్టమ్ తెచ్చిన కష్టం: సీబీఎస్‌ఈ (CBSE) తీసుకొచ్చిన ఆన్-స్క్రీన్ మార్కింగ్ (OSM) విధానం, సీయూఈటీ (CUET), ఎస్‌ఎస్‌సీ (SSC GD) పరీక్షలలో తలెత్తిన గందరగోళం దాదాపు కోటి మంది యువత భవిష్యత్తును ప్రశ్నార్థకం చేసింది. ఈ కథనంలో అత్యంత బాధాకరమైన కోణం ఆత్మహత్యలు. పరీక్షల ఒత్తిడి, ఫలితాల అనిశ్చితి, భవిష్యత్తుపై భయం… ఇవన్నీ కొంతమంది యువ ప్రాణాలను బలితీసుకున్నాయి. ప్రతి సంఖ్య వెనుక ఒక కుటుంబం ఉంది. ప్రతి మరణం వెనుక ఒక కల ఉంది. బొద్దింకలం అదే కారణంగా ఈ ఉద్యమం కేవలం పరీక్షల గురించి కాదు, యువత మానసిక ఆరోగ్యం గురించి కూడా మాట్లాడుతోంది. 2021 నుండి 2026 మధ్య కాలంలో దాదాపు 93 మంది విద్యార్థులు ఆత్మహత్యలకు పాల్పడ్డారు. ఈ ఏడాదిలోనే, పరీక్ష రద్దయిన కొద్ది రోజుల్లోనే 14 మంది తనువు చాలించడం గుండెల్ని పిండేసే నిజం. మార్కులు రావాల్సిన చోట మరణాలు రావడం వ్యవస్థ పతనానికి నిదర్శనం.

ఆ ఒక్క మాట.. రేపింది మంట..

నిప్పుకి గాలి తోడైనట్టు.. గాయపడిన గుండెలపై సుప్రీంకోర్టు ప్రధాన న్యాయమూర్తి చేసిన వ్యాఖ్యలు ఉప్పుని చల్లాయి. కోర్టు విచారణలో భాగంగా ఆయన అన్న ఒక మాట “పనిపాటా లేకుండా, సరైన గుర్తింపు లేక సోషల్ మీడియాలో, ఆర్టీఐ (RTI) యాక్టివిజంలో తిరిగే యువత ‘బొద్దింకల లాంటివాళ్లు'” అని అనడం తీవ్ర దుమారం రేపింది. ఆ తర్వాత వివరణ ఇచ్చుకున్నప్పటికీ, జరగాల్సిన నష్టం జరిగిపోయింది. చదువుకున్నా కొలువుల్లేక అలమటిస్తున్న తరానికి, ఆ ‘బొద్దింక’ అనే పదం ఒక తీవ్రమైన అవమానంగా, వ్యవస్థ చూపిస్తున్న అహంకారంగా అనిపించింది.

పుట్టుకొచ్చింది ‘బొద్దింక జనతా పార్టీ’ (CJP)..

బాధను వ్యంగ్యంగా మార్చడం యువతకు కొత్త కాదు. అవమానాన్ని ఆయుధంగా మార్చడం కూడా కొత్త కాదు. అలా ఆ అవమానాన్నే ఆయుధంగా మార్చుకుంది ఈ తరం. బోస్టన్‌లో ఉంటున్న అభీజీత్ దిప్కే అనే 30 ఏళ్ల యువకుడు సోషల్ మీడియాలో విసిరిన ఒకే ఒక్క ప్రశ్న”ఈ బొద్దింకలం ఒక్కటైతే ఎలా ఉంటుంది?”. యువతను కదిలించింది. ఎంతటి విపత్తినైనా తట్టుకుని బతికే ‘బొద్దింక’ను తమ మనుగడకు, ప్రతిఘటనకు చిహ్నంగా మార్చుకున్నారు.

“అన్ని బొద్దింకలు ఒక్కటైతే?”

ఆ ప్రశ్నలో వ్యంగ్యం ఉంది. ఆ ప్రశ్నలో వేదన ఉంది. ముఖ్యంగా ఆ ప్రశ్నలో ఒక తరం కోపం ఉంది. అలా మే 16న పుట్టుకొచ్చింది ‘కాక్‌రోచ్ జనతా పార్టీ’ (CJP). అధికార పార్టీ పేరును పేరడీ చేస్తూ పెట్టిన ఈ పేరు సోషల్ మీడియాలో దావానలంలా వ్యాపించింది. కేవలం నెల రోజుల్లోనే ఇన్‌స్టాగ్రామ్‌లో 2.2 కోట్ల మంది ఫాలోవర్లు, వీరు చేసిన రీల్స్‌కు 40 కోట్ల వ్యూస్ వచ్చాయంటే.. యువతలో ఎంత కసి ఉందో అర్థం చేసుకోవచ్చు.

డిజిటల్ స్క్రీన్ల నుండి.. సిటీ వీధుల దాకా..
ఈ ఉద్యమం కేవలం లైక్‌లు, షేర్లకే పరిమితం కాలేదు. ఢిల్లీలోని జంతర్ మంతర్ వద్ద 2 వేల మందితో చిన్నగా మొదలైనా.. ఆ తర్వాత పుణే, అమృత్‌సర్, బెంగళూరు, హైదరాబాద్, జైపూర్ నగరాల్లో వేలాది మందితో వీధుల్లోకి వచ్చింది. జైపూర్ ర్యాలీలో ఉద్యమ నేత అభీజీత్‌పై కొందరు దుండగులు దాడి చేసినా.. “భౌతిక దాడులు భయానికి నిదర్శనం, మా పోరాటం శాంతియుతంగానే సాగుతుంది” అని ఆయన ప్రకటించడం ఈ తరం ఆలోచనా పరిపక్వతకు అద్దం పడుతోంది.

వీరి ప్రధాన డిమాండ్లు ఇవే..

మంత్రి రాజీనామా: పరీక్షల వైఫల్యాలకు బాధ్యత వహిస్తూ కేంద్ర విద్యాశాఖ మంత్రి ధర్మేంద్ర ప్రధాన్ తప్పుకోవాలి.

లీకులకు జరిమానా: పేపర్ లీక్ అయిన ప్రతిసారీ అభ్యర్థుల ప్రయాణ, కోచింగ్ ఖర్చుల కోసం ₹10,000 నష్టపరిహారం ఇవ్వాలి.

పారదర్శకత: ప్రైవేట్ ఏజెన్సీల కాంట్రాక్టులపై స్వతంత్ర ఆడిట్ జరగాలి, ఆన్-స్క్రీన్ కాకుండా భౌతికంగానే పేపర్లు దిద్దాలి.

• కానీ ఈ ఉద్యమం అసలు బలం డిమాండ్లలో కాదు… దాని సందేశంలో ఉంది.
• “హిందూ-ముస్లిం చర్చల కంటే ఉద్యోగాలు ముఖ్యం.”
• “రాజకీయ నినాదాల కంటే విద్య ముఖ్యం.”
• “ప్రచారాల కంటే భవిష్యత్తు ముఖ్యం.”
• అనే భావనను ఇది ముందుకు తీసుకువస్తోంది.

అయితే ఈ ‘బొద్దింకల విప్లవం’పై భిన్నాభిప్రాయాలు ఉన్నాయి. కొందరు మేధావులు, రాజకీయ విశ్లేషకులు దీన్ని కేవలం సోషల్ మీడియా హంగామాగా కొట్టిపారేస్తున్నారు. పెద్ద పెద్ద పౌర సమాజ సంస్థల మద్దతు దీనికి లేదని, ప్రభుత్వానికి దీనివల్ల వచ్చే ముప్పేమీ లేదని పెదవి విరుస్తున్నారు. ప్రధాని మోదీ కూడా నేరుగా ఈ పేరు ఎత్తకుండా.. తమది “యువత నేతృత్వంలోని అభివృద్ధి” అని ట్వీట్ చేయడం గమనార్హం.

నిజం చెప్పాలంటే, కాక్రోచ్ జనతా పార్టీ విజయం సాధిస్తుందా లేదా అనేది ఇప్పుడే చెప్పలేం.

• కానీ ఒక విషయం మాత్రం స్పష్టంగా కనిపిస్తోంది.
• ఇది కేవలం ఒక పార్టీ కథ కాదు. ఇది కేవలం ఒక పరీక్ష కథ కాదు.
• ఇది కేవలం ఒక వ్యాఖ్య కథ కూడా కాదు. ఇది వినిపించని గొంతుల కథ.
• ఇది వాయిదా పడిన కలల కథ. ఇది నిరీక్షణతో అలసిపోయిన ఒక తరం కథ.

ఎన్నో సంవత్సరాలుగా యువత మనసుల్లో పేరుకుపోయిన నిరాశ ఇప్పుడు ఒక రూపం దాల్చింది. ఆ రూపం బొద్దింక కావచ్చు, వ్యంగ్యం కావచ్చు, ఉద్యమం కావచ్చు. కానీ దాని వెనుక ఉన్న సందేశం మాత్రం చాలా స్పష్టంగా ఉంది.

• యువతను చిన్నచూపు చూడొచ్చు… కానీ వారి సమస్యలను చిన్నచూపు చూడలేరు.
• ఎందుకంటే ఒక బొద్దింకను అందరూ పట్టించుకోకపోవచ్చు.
• కానీ లక్షల బొద్దింకలం  ఒక్కటైతే… వ్యవస్థ కూడా ఒక్కసారి వెనక్కి తిరిగి చూడాల్సిందే.