మా ఇంటి బంగారంతో సమంత సంచలనం.. తొలి రోజే రూ.13.15 కోట్ల గ్రాస్

సమంత(Samantha) ప్రధాన పాత్రలో, నందినీ రెడ్డి(nandini reddy) దర్శకత్వంలో తెరకెక్కిన మా ఇంటి బంగారం(maa inti bangaram) బాక్సాఫీస్ వద్ద తొలి రోజే అద్భుతమైన క‌లెక్ష‌న్ల‌తో తన సత్తా చాటింది. ప్రపంచవ్యాప్తంగా మొదటి రోజు రూ.13.15 కోట్ల గ్రాస్‌ను నమోదు చేసిన ఈ సినిమా, సమంత కెరీర్‌లో మరో గుర్తుండిపోయే స‌క్సెస్‌గా నిలిచే సంకేతాల‌ను ఇస్తోంది. రిలీజ్‌కు ముందే మంచి అంచనాలు ఏర్పడిన ఈ సినిమా, ఓపెనింగ్ డే నుంచే ప్రేక్షకుల నుంచి విశేష ఆదరణను సొంతం చేసుకుని ట్రేడ్ వర్గాల దృష్టిని ఆకర్షించింది.

ఈ సినిమాకు డైరెక్ట‌ర్ నందినీ రెడ్డి తనదైన శైలిలో భావోద్వేగాలు, కుటుంబ బంధాలు, వినోదాన్ని మేళవించి ప్రేక్షకులను ఆకట్టుకున్నారు. ముఖ్యంగా సమంత నటన సినిమాకు ప్రధాన బలంగా నిలిచిందని ప్రేక్షకులు, విమర్శకులు అభిప్రాయపడుతున్నారు. అలాగే కీలక పాత్రలో కనిపించిన శ్రీముఖి(Sree mukhi) తన సహజమైన నటనతో ప్రేక్షకులను మెప్పించి ప్రత్యేక గుర్తింపు పొందింది. టెలివిజన్ యాంకర్‌గా గుర్తింపు తెచ్చుకున్న ఆమెకు ఈ సినిమా నటిగా మరిన్ని అవకాశాలకు మార్గం సుగమం చేసే అవకాశం కనిపిస్తోంది.

మరో ఆసక్తికర అంశం ఏమిటంటే, ఈ సినిమా కథను సమంత భర్త రాజ్ నిడిమోరు(Raj nidimoru) అందించడం. ఫ్యామిలీ ఎమోష‌న్స్ తో కూడిన కథను ప్రేక్షకులకు చేరువ చేసే విధంగా ఆయన రూపొందించిన కథకు మంచి స్పందన లభిస్తోంది. మొదటి రోజు వసూళ్లు, పాజిటివ్ టాక్‌ను బట్టి చూస్తే మా ఇంటి బంగారం రాబోయే రోజుల్లో మరింత బలమైన కలెక్షన్లను నమోదు చేసే అవకాశాలు ఉన్నాయని సినీ విశ్లేషకులు భావిస్తున్నారు. సమంత కెరీర్‌లో మరో స‌క్సెస్‌ఫుల్ చాప్ట‌ర్ గా ఈ సినిమా నిలిచే సూచనలు స్పష్టంగా కనిపిస్తున్నాయి.