Pancreatic Cancer: ఈ లక్షణాలను లైట్ తీసుకుంటున్నారా? ప్రాణాలు పోతాయ్!

Pancreatic Cancer: మనకు నిత్యం ఎదురయ్యే చిన్నపాటి ఆరోగ్య సమస్యలే కదా అని కొన్నింటిని నిర్లక్ష్యం చేస్తుంటాం. కానీ, ఆ నిర్లక్ష్యమే ఒక్కోసారి ప్రాణాంతకమైన వ్యాధులకు దారితీయవచ్చు. ముఖ్యంగా నడుము నొప్పి, అజీర్ణం వంటి లక్షణాలు సాధారణ కండరాల నొప్పి లేదా గ్యాస్ సమస్యగా భావించి వదిలేస్తుంటాం. అయితే, ఈ సమస్యలు నెలల కొద్ది వేధిస్తుంటే మాత్రం ఖచ్చితంగా అప్రమత్తం కావాలి. ఎందుకంటే ఇవి క్లోమ గ్రంథి (పాంక్రియాస్) క్యాన్సర్‌కు తొలి సంకేతాలు కావచ్చని వైద్య నిపుణులు హెచ్చరిస్తున్నారు.

లక్షణాలను గుర్తించడం ఎందుకు కష్టం?

శరీరంలో జీర్ణాశయం వెనుక భాగంలో క్లోమ గ్రంథి ఉంటుంది. ఇందులో కణితులు ఏర్పడినప్పుడు ప్రాథమిక దశలో ఎలాంటి స్పష్టమైన మార్పులు కనిపించవు. అందుకే ఈ క్యాన్సర్‌ను ‘సైలెంట్ కిల్లర్’ అని కూడా పిలుస్తుంటారు. ఇది ముదిరిన తర్వాతే బయటపడే అవకాశాలు ఎక్కువ. అయితే శరీరం పంపే కొన్ని అస్పష్టమైన సంకేతాలను గమనిస్తే ప్రాథమిక దశలోనే దీనిని గుర్తించవచ్చు.

లక్షణాలు :

నడుము నొప్పి: క్లోమ గ్రంథిలో కణితి పెరుగుతున్న కొద్దీ అది చుట్టుపక్కల ఉన్న నాడులపై ఒత్తిడిని పెంచుతుంది. దీనివల్ల కడుపు పై భాగంలో మొదలయ్యే నొప్పి క్రమంగా వీపు లేదా నడుము భాగానికి పాకుతుంది. విశేషమేమిటంటే, ఈ నొప్పి పడుకున్నప్పుడు తీవ్రమై, ముందుకు వంగి కూర్చున్నప్పుడు కొద్దిగా తగ్గుతుంది. ఇటువంటి లక్షణం ఉంటే వెంటనే పరీక్షలు చేయించుకోవాలి.

జీర్ణక్రియలో మార్పులు: ఆహారం అరగడానికి అవసరమైన ఎంజైమ్‌లను క్లోమ గ్రంథి ఉత్పత్తి చేస్తుంది. క్యాన్సర్ కారణంగా ఈ ప్రక్రియ దెబ్బతింటుంది. ఫలితంగా తీవ్రమైన అజీర్ణం, కడుపు ఉబ్బరం, తిన్న వెంటనే కడుపు నిండినట్లు అనిపించడం, ఆకలి మందగించడం వంటివి జరుగుతాయి. మల విసర్జనలో మార్పులు రావడం కూడా దీనికి ఒక సూచిక.

క్లోమ క్యాన్సర్‌ను ప్రారంభ దశలో గుర్తిస్తే చికిత్స సులభం అవుతుంది. అందుకే సాధారణ నడుం నొప్పి లేదా అజీర్ణం అని మందులతో సరిపెట్టుకోకుండా, అవి దీర్ఘకాలంగా వేధిస్తుంటే నిపుణులైన వైద్యులను సంప్రదించాలి. సరైన సమయంలో చేసే వైద్య పరీక్షలు ప్రాణాలను కాపాడగలవు.