Telangana: ఓటు కోసం వినూత్న పాట్లు.. ఒకరు బాండ్ పేపర్ హామీలతో.. మరొకరు పాడె మోస్తూ ప్రచారం!

Telangana: ఎన్నికల బరిలో నిలిచిన అభ్యర్థులు ఓటర్ల మనసు గెలుచుకోవడానికి మునుపెన్నడూ లేని విధంగా వినూత్న దారులను వెతుక్కుంటున్నారు. స్థానిక సంస్థల ఎన్నికల నేపథ్యంలో యాదాద్రి భువనగిరి, పెద్దపల్లి జిల్లాల్లో చోటుచేసుకున్న రెండు ఆసక్తికర సంఘటనలు ఇప్పుడు చర్చనీయాంశంగా మారాయి.

పాడె మోసిన అభ్యర్థుల బంధువులు: యాదాద్రి భువనగిరి జిల్లా భువనగిరి మున్సిపాలిటీలోని 32వ వార్డు ఎస్సీ మహిళకు రిజర్వ్ కావడంతో, అక్కడ పోటీ చేస్తున్న అభ్యర్థులు ఓటర్లకు చేరువయ్యేందుకు సామాజిక బాధ్యతను ప్రచారాస్త్రంగా మార్చుకున్నారు. వార్డు పరిధిలోని తారకరామనగర్‌లో పులి సంపత్ అనే యువకుడు మృతి చెందగా, అతని అంత్యక్రియల్లో కాంగ్రెస్, భారాస, భాజపా , స్వతంత్ర అభ్యర్థుల తరపున వారి కుటుంబ సభ్యులు (భర్తలు, కుమారులు) స్వయంగా పాడె మోశారు. కష్టకాలంలో తోడుంటామని చాటిచెప్పడమే వీరి ఉద్దేశ్యంగా కనిపించింది.

బాండ్ పేపర్‌పై సంక్షేమ హామీలు: మరోవైపు పెద్దపల్లి జిల్లా సుల్తానాబాద్‌ మున్సిపాలిటీ 9వ వార్డులో ఆల్ ఇండియా ఫార్వర్డ్ బ్లాక్ అభ్యర్థి గొట్టం మహేష్ తన ప్రచారంతో అందరినీ ఆశ్చర్యపరిచారు. తాను కౌన్సిలర్‌గా గెలిస్తే స్వంత నిధులతో సంక్షేమ పథకాలు అమలు చేస్తానని న్యాయపరమైన ‘బాండ్ పేపర్’పై రాసి ఇచ్చారు.ఇందులో భాగంగా:

• వార్డులోని యువతుల వివాహానికి రూ. 25,016 అందజేస్తానని,
• ఆడపిల్ల జన్మిస్తే రూ. 10,016, మగబిడ్డకు రూ. 5,016 ఇస్తానని హామీ ఇచ్చారు.

ఒకవేళ ఈ హామీలను నెరవేర్చకపోతే తన పదవికి రాజీనామా చేస్తానని బాండ్ పేపర్ ద్వారా ప్రకటించి, ఇంటింటికీ తిరిగి ఓట్లు అడుగుతున్నారు.

ఎన్నికల సమయంలో ఓటర్లను ఆకర్షించేందుకు అభ్యర్థులు అనుసరిస్తున్న ఈ విలక్షణ పద్ధతులు ప్రజల్లో ఆసక్తిని రేకెత్తిస్తున్నాయి.