అయోధ్య‌లో భూమి కొన్న ర‌ణ్‌బీర్

బాలీవుడ్ సూపర్ స్టార్ ర‌ణ్‌బీర్ క‌పూర్(Ranbir Kapoor) ప్రస్తుతం దేశవ్యాప్తంగా అత్యంత ప్రతిష్టాత్మకంగా తెరకెక్కుతున్న మైథలాజికల్ ఎపిక్ రామాయ‌ణ‌(Ramayana) షూటింగ్‌తో బిజీగా ఉన్నాడు. నితేశ్ తివారి(Nitesh Tiwari) దర్శకత్వంలో రూపొందుతున్న ఈ భారీ సినిమాలో రణ్‌బీర్ కపూర్ శ్రీరాముడి పాత్రలో నటిస్తున్న విషయం తెలిసిందే. ఇప్పటికే మొదటి భాగం షూటింగ్ పూర్తవగా, రెండో భాగం షూటింగ్ వేగంగా సాగుతోంది. ఈ నేపథ్యంలో రణ్‌బీర్ తీసుకున్న తాజా నిర్ణయం ఇప్పుడు బాలీవుడ్‌తో పాటు దేశవ్యాప్తంగా హాట్ టాపిక్‌గా మారింది. అయోధ్యలో రూ.3.31 కోట్ల విలువైన భూమిని కొనుగోలు చేసినట్టు వార్తలు వెలువడటంతో అభిమానులు ఆశ్చర్యపోతున్నారు. శ్రీరాముడి జన్మభూమిగా గుర్తింపు పొందిన అయోధ్యతో తనకు ప్రత్యేక అనుబంధం ఏర్పడిందని రణ్‌బీర్ చెప్పిన మాటలు ఇప్పుడు వైరల్ అవుతున్నాయి.

అయోధ్య నన్ను పిలిచింది… నేను ఆ పిలుపుకు స్పందించానంటూ రణ్‌బీర్ చేసిన వ్యాఖ్యలు సోషల్ మీడియాలో పెద్ద చర్చకు దారితీశాయి. శ్రీరాముడి పాత్ర కోసం ఆయన తన జీవనశైలిలోనూ కీలక మార్పులు తీసుకొచ్చినట్లు తెలుస్తోంది. ప్రత్యేక డైట్ పాటించడం, ఆధ్యాత్మిక అంశాలపై ఎక్కువ దృష్టి పెట్టడం, శారీరకంగా మరియు మానసికంగా పాత్రకు తగ్గట్టుగా సిద్ధమవడం వంటి విషయాలు ప్రస్తుతం బాలీవుడ్‌లో చర్చనీయాంశమయ్యాయి. పాత్రలో సహజత్వం కోసం రణ్‌బీర్ చూపిస్తున్న డెడికేష‌న్ చూసి అభిమానులు ప్రశంసలు కురిపిస్తున్నారు.

ఈ భారీ ప్రాజెక్ట్‌లో సాయి ప‌ల్ల‌వి(Sai Pallavi) సీత పాత్రలో నటిస్తుండగా, య‌ష్(Yash) రావణుడిగా కనిపించనున్నాడు. స‌న్నీ డియోల్(Sunny Deol) హనుమంతుడి పాత్రలో నటిస్తుండగా, ర‌కుల్ ప్రీత్ సింగ్‌(Rakul Preet Singh) శూర్పణఖ పాత్ర పోషిస్తోంది. ప్రముఖ నిర్మాత న‌మిత్ మ‌ల్హోత్రా(Namit Malhotra) నిర్మిస్తున్న ఈ విజువల్ వండర్‌పై దేశవ్యాప్తంగా భారీ అంచనాలు నెలకొన్నాయి. తొలి భాగాన్ని ఈ ఏడాది దీపావళి సందర్భంగా రిలీజ్ చేయాలని చిత్రబృందం ప్లాన్ చేస్తోంది.