ఓటీటీ రిలీజ్ డేట్ ఫిక్స్ చేస్తున్న ధురంధ‌ర్2

బాలీవుడ్ స్టార్ ర‌ణ్‌వీర్ సింగ్(Ranveer Singh) నటించిన యాక్షన్ థ్రిల్లర్ ధురంధర్: ది రివెంజ్(Dhurandhar: The Revenge) ఓటీటీ విడుదలపై నెలలుగా సాగిన ఉత్కంఠకు ఎట్టకేలకు తెరపడింది. డైరెక్ట‌ర్ ఆదిత్య‌ధ‌ర్(Aditya Dhar) తెరకెక్కించిన ఈ భారీ సినిమా జూన్ 4 నుంచి జియో హాట్‌స్టార్ వేదికగా స్ట్రీమింగ్ కానుందని అధికారిక ప్రకటన వచ్చింది. అయితే సాధారణ థియేటర్ వెర్షన్‌కు భిన్నంగా, దాదాపు 3 గంటల 52 నిమిషాల నిడివితో కూడిన ప్రత్యేక ఎక్స్టెండెడ్ ఎడిషన్‌ను భారతీయ ప్రేక్షకులకు అందించనుండటం ఇప్పుడు సినీ వర్గాల్లో హాట్ టాపిక్‌గా మారింది. ఐపీఎల్ ముగిసిన తర్వాతే స్ట్రీమింగ్ ప్లాన్ చేయడం వ్యూహాత్మక నిర్ణయమా లేక ఆలస్యమా అన్న చర్చ సోషల్ మీడియాలో జోరుగా సాగుతోంది.

ఇదిలా ఉంటే, అంతర్జాతీయ మార్కెట్ కోసం మరో పెద్ద ట్విస్ట్ చోటుచేసుకుంది. ప్రముఖ ఓటీటీ సంస్థ నెట్‌ఫ్లిక్స్ ఇప్పటికే ఈ సినిమాకు చెందిన రా అండ్ అన్‌కట్ వెర్షన్‌ను విదేశీ ప్రేక్షకులకు అందుబాటులోకి తీసుకొచ్చింది. భారతీయ సెన్సార్ కారణంగా థియేటర్లలో కనిపించని కొన్ని బోల్డ్ మరియు హార్డ్‌కోర్ సన్నివేశాలు ఈ వెర్షన్‌లో ఉండటంతో ప్రేక్షకుల్లో ఆసక్తి మరింత పెరిగింది. విదేశాల్లో ముందుగానే విడుదల కావడంతో, ఆ వెర్షన్‌కు సంబంధించిన క్లిప్స్ సోషల్ మీడియాలో వేగంగా వైరల్ అవుతున్నాయి. దీంతో భారతీయ ప్రేక్షకుల్లో కూడా ఆసక్తి పెరిగినా, పైరసీ లింకుల ద్వారా సినిమా లీక్ అవుతుందనే ఆందోళనలు వ్యక్తమవుతున్నాయి.

సినిమా అఫీషియ‌ల్ ఇండియ‌న్ డిజిటల్ రిలీజ్ కు ఇంకా సమయం ఉండటంతో, ఈ గ్యాప్ మూవీ హైప్‌పై ప్రభావం చూపుతుందా అన్న ప్రశ్న ఇప్పుడు ఇండస్ట్రీలో చర్చనీయాంశమైంది. ముఖ్యంగా ర‌ణ్‌వీర్ సింగ్ నటనకు సంబంధించిన కీలక సన్నివేశాలు ఇప్పటికే సోషల్ మీడియాలో ట్రెండ్ అవుతుండటంతో, ఓటీటీ రిలీజ్ టైమ్ కు ప్రేక్షకుల్లో సస్పెన్స్ తగ్గే ప్రమాద‌ముంద‌ని ట్రేడ్ వర్గాలు అంచనా వేస్తున్నాయి. అయినప్పటికీ భారీ రన్‌టైమ్, యాక్షన్ ఎలిమెంట్స్, ఇంటెన్స్ డ్రామాతో ఈ సినిమా ఓటీటీలో కొత్త రికార్డులు నమోదు చేసే అవకాశాలు ఉన్నాయని విశ్లేషకులు భావిస్తున్నారు.