రాపో23 షూటింగ్ మొద‌ల‌య్యేది ఎప్పుడంటే?

టాలీవుడ్‌లో ఎనర్జిటిక్ స్టార్‌గా ప్రత్యేక గుర్తింపు తెచ్చుకున్న రామ్ పోతినేని(ram pothineni) ఇప్పుడు తన కెరీర్‌లో మరో కొత్త అడుగు వేస్తూ ఇండస్ట్రీని సర్‌ప్రైజ్ చేశాడు. హీరోగా వరుస సినిమాలతో ప్రేక్షకులను అలరించిన రామ్, ఇప్పుడు డైరెక్ట‌ర్ గా మారుతూ #RAPO23 ప్రాజెక్ట్‌ను అధికారికంగా ప్రకటించాడు. ఈ సినిమాకు సంబంధించిన అనౌన్స్‌మెంట్ పోస్టర్ సోషల్ మీడియాలో వైరల్ అవుతోంది. స్టైలిష్ విజువల్స్‌, మాస్ టచ్‌, డార్క్ థీమ్‌తో రూపొందించిన పోస్టర్ రామ్ నుంచి పూర్తిగా కొత్త కోణాన్ని చూపించింది. ముఖ్యంగా పోస్టర్ డిజైన్‌లో కనిపించిన టెక్నికల్ స్టాండర్డ్స్ అభిమానుల్లో ఆసక్తిని మరింత పెంచుతున్నాయి.

ఈ సినిమాను రామ్ సోదరుడు కృష్ణ పోతినేని(Krishna Pothineni) రాపో సినిమాటిక్స్(Rapo cinematics) బ్యానర్‌పై నిర్మిస్తున్నారు. జూలై నుంచి రెగ్యులర్ షూటింగ్ ప్రారంభం కానుండగా, డిసెంబర్ రిలీజ్ టార్గెట్‌గా మేకర్స్ ప్లాన్ చేస్తున్నారని సమాచారం. కథ, స్క్రీన్‌ప్లే, విజువల్ ట్రీట్‌మెంట్ విషయంలో రామ్ పూర్తిగా కొత్త ప్రయత్నం చేస్తున్నాడని ఇండస్ట్రీ వర్గాలు చెబుతున్నాయి. హీరోగా ఇప్పటికే తన ఎనర్జీ, డ్యాన్స్‌, మాస్ అప్పీల్‌తో ప్రత్యేక గుర్తింపు తెచ్చుకున్న రామ్, ఇప్పుడు మెగాఫోన్ పట్టడంతో ఈ ప్రాజెక్ట్‌పై ట్రేడ్ వర్గాల్లో కూడా భారీ చర్చ మొదలైంది. ముఖ్యంగా యంగ్ డైరెక్ట‌ర్ల తరహాలో స్టైలిష్ యాక్షన్ డ్రామాను రూపొందించే ప్రయత్నంలో ఉన్నాడనే టాక్ వినిపిస్తోంది.

ఇటీవల వచ్చిన కొన్ని సినిమాలు ఆశించిన స్థాయిలో విజయాన్ని అందుకోకపోవడంతో రామ్ కెరీర్‌పై అనేక చర్చలు జరిగాయి. అయితే #RAPO23 మాత్రం అతడి కెరీర్‌కు కీలక మలుపు కావొచ్చని సినీ విశ్లేషకులు భావిస్తున్నారు. ఒక నటుడు స్వయంగా దర్శకత్వ బాధ్యతలు తీసుకోవడం అనేది ఎప్పుడూ రిస్క్‌తో కూడుకున్నదే అయినా, అదే సమయంలో అది పెద్ద బ్రేక్‌థ్రూ కూడా కావచ్చు. మ‌రి రామ్ ఈ సినిమాతో ఎలాంటి మాయ చేస్తాడో, దర్శకుడిగా ప్రేక్షకులను ఎంతవరకు ఆకట్టుకుంటాడో చూడాలని అభిమానులు ఆసక్తిగా ఎదురుచూస్తున్నారు.