డైలాగ్ సెన్సారుని పూర్తి చేసుకున్న పెద్ది

మెగా పవర్ స్టార్ రామ్ చ‌ర‌ణ్(Ram Charan) హీరోగా డైరెక్ట‌ర్ బుచ్చిబాబు సాన(Buchi Babu Sana) తెరకెక్కిస్తున్న భారీ పాన్ ఇండియా సినిమా పెద్దిపై అంచనాలు రోజురోజుకీ పెరుగుతున్నాయి. గ్రామీణ క్రీడల నేపథ్యంతో మాస్, ఎమోషనల్ అంశాలను మేళవిస్తూ రూపొందించిన ఈ సినిమాలో బాలీవుడ్ బ్యూటీ జాన్వీ క‌పూర్(Janhvi Kapoor) హీరోయిన్‌గా నటిస్తోంది. ఇప్పటికే విడుదలైన పోస్టర్లు, గ్లింప్స్‌లు ప్రేక్షకుల్లో మంచి హైప్ క్రియేట్ చేయగా, జూన్ 4న ప్రపంచవ్యాప్తంగా విడుదలకు సిద్ధమవుతున్న ఈ సినిమాకు సంబంధించి ఇప్పుడు పోస్ట్ ప్రొడక్షన్ పనులు ఫుల్ స్పీడ్‌లో కొనసాగుతున్నాయి. ముఖ్యంగా విడుదల తేదీ దగ్గరపడటంతో చిత్ర యూనిట్ అన్ని విభాగాల్లో ఫినిషింగ్ టచ్‌లపై దృష్టి పెట్టినట్లు సమాచారం.

తాజాగా పెద్దికి సంబంధించిన డైలాగ్ సెన్సార్ ప్రక్రియ పూర్తైనట్లు ఇండస్ట్రీ వర్గాల్లో టాక్ వినిపిస్తోంది. అన్ని భాషలకు సంబంధించిన మెయిన్ సెన్సార్ పనులను కూడా ఈ వారంలోనే పూర్తి చేయాలనే ప్లాన్‌తో మేకర్స్ ముందుకు సాగుతున్నారని తెలుస్తోంది. తెలుగు మాత్రమే కాకుండా తమిళ, హిందీ, కన్నడ, మలయాళ భాషల్లో కూడా భారీ స్థాయిలో విడుదలకు సిద్ధమవుతున్న ఈ సినిమాకు పాన్ ఇండియా మార్కెట్‌లో మంచి బజ్ ఏర్పడింది. ముఖ్యంగా రామ్ చరణ్ లుక్, బుచ్చిబాబు టేకింగ్, సినిమాకు సంబంధించిన ఎమోషనల్ కంటెంట్‌పై ట్రేడ్ వర్గాల్లో భారీ అంచనాలు కనిపిస్తున్నాయి.

ఇక సినిమా ఫైనల్ రన్‌టైమ్ విషయంలో కూడా కీలక చర్చలు జరుగుతున్నట్లు సమాచారం. ప్రస్తుతం పెద్ది నిడివిని మూడు గంటల ఒకటి లేదా రెండు నిమిషాల పరిధిలోకి తీసుకురావాలనే ప్రయత్నాలు జరుగుతున్నాయని తెలిసింది. కథలోని ఎమోషనల్ ఫ్లో దెబ్బతినకుండా, కమర్షియల్ పేస్ మెయింటైన్ అయ్యేలా ఎడిటింగ్ టీమ్ ప్రత్యేకంగా పని చేస్తున్నట్లు తెలుస్తోంది. క్లైమాక్స్ మరియు ఎమోషనల్ ఎపిసోడ్స్ ఈ సినిమాకు ప్రధాన బలం కానున్నాయని, రామ్ చరణ్ కెరీర్‌లో మరో గుర్తుండిపోయే పాత్రగా పెద్ది నిలుస్తుందనే నమ్మకంతో అభిమానులు ఎదురుచూస్తున్నారు.