కొడుకు కోసం ధ‌నుష్ మాస్ట‌ర్ ప్లాన్

ఇప్పటికే హీరోగా, డైరెక్ట‌ర్ గా తనదైన ముద్ర వేసుకున్న ధనుష్(Dhanush) ఇప్పుడు మరో కీలక బాధ్యతను స్వీకరించేందుకు సిద్ధమవుతున్నట్లు కోలీవుడ్ వర్గాల్లో జోరుగా ప్రచారం సాగుతోంది. తన పెద్ద కుమారుడు యాత్ర(Yatra)ను హీరోగా పరిచయం చేయడానికి ఆయన ప్రత్యేక ప్రణాళికలు సిద్ధం చేస్తున్నారని సమాచారం. ఈ సినిమాకు ధనుష్ స్వయంగా దర్శకత్వం వహించనున్నారని, యాత్ర సినీ రంగ ప్రవేశాన్ని అత్యంత ప్రతిష్టాత్మకంగా రూపొందించే ప్రయత్నాలు జరుగుతున్నాయని చెబుతున్నారు. ఇప్పటికే ధనుష్ దర్శకత్వంలో తెరకెక్కిన రాయన్ సినిమాలో యాత్ర పనిచేసిన అనుభవం ఉండటంతో, ఇప్పుడు పూర్తి స్థాయి నటుడిగా ప్రేక్షకుల ముందుకు రానున్నాడనే వార్త అభిమానుల్లో ఆసక్తిని పెంచుతోంది.

ఈ ప్రాజెక్ట్‌ను ఆర్ టేక్ స్టూడియోస్(R Take Studios) నిర్మించనున్నట్లు సమాచారం. ఇదే సంస్థ ప్రస్తుతం ధనుష్ నటిస్తున్న డి55(D55) సినిమాను కూడా నిర్మిస్తోంది. యాత్ర తొలి సినిమాను మాస్ కమర్షియల్ ఎంటర్‌టైనర్‌గా తీర్చిదిద్దే ఆలోచనలో ధ‌నుష్ ఉన్నట్లు తెలుస్తోంది. త్వరలోనే చెన్నైలో ప్రత్యేక ప్రోమో షూట్ నిర్వహించనున్నారని, త‌ర్వాత‌ ఘనంగా పూజా కార్యక్రమంతో సినిమాను అధికారికంగా ప్రారంభించే అవకాశాలు ఉన్నాయని సినీ వర్గాలు చెబుతున్నాయి. తొలి సినిమాతోనే ప్రేక్షకుల్లో బలమైన గుర్తింపు తీసుకురావాలనే లక్ష్యంతో కథ, పాత్ర రూపకల్పనపై ప్రత్యేక శ్రద్ధ తీసుకుంటున్నట్లు సమాచారం.

టెక్నిక‌ల్ గానూ ఈ సినిమాకు బలమైన టీమ్ పనిచేయనున్నట్లు వార్తలు వినిపిస్తున్నాయి. ప్రముఖ సినిమాటోగ్రాఫర్ వెల్‌రాజ్(Vel Raja) కెమెరా బాధ్యతలు చేపట్టనున్నారని, సంగీత దర్శకుడు జీవీ ప్రకాశ్ కుమార్(GV Prakash Kumar) స్వరాలు అందించే అవకాశాలు ఎక్కువగా ఉన్నాయని తెలుస్తోంది. ఈ ఏడాది చివర్లో లేదా వచ్చే ఏడాది ఆరంభంలో రెగ్యులర్ షూటింగ్ ప్రారంభం కావచ్చని సమాచారం. అలాగే సినిమాలో పలువురు ప్రముఖ నటీనటులు కీలక పాత్రల్లో కనిపించే అవకాశం ఉందనే ప్రచారం కూడా జరుగుతోంది. అధికారిక ప్రకటన రాకముందే ఈ ప్రాజెక్ట్‌పై భారీ స్థాయిలో చర్చ జరుగుతుండటం విశేషం.