టయోటా ఫార్చ్యూనర్ లవర్స్‌కు దిమ్మతిరిగే షాక్.. రూ. 50 లక్షలు దాటేసిన ఎస్‌యూవీ!

భారతీయ ఆటోమొబైల్ మార్కెట్లో ‘టయోటా ఫార్చ్యూనర్‘ (Toyota Fortuner) అనగానే ఒక రేంజ్ క్రేజ్ ఉంటుంది. ఇదొక కారు మాత్రమే కాదు, రాజకీయ నాయకులు, బడా వ్యాపారవేత్తలు, వీఐపీల దర్పానికి ఒక కేరాఫ్ అడ్రస్ లాంటిది. రోడ్డు మీద ఈ భారీ ఎస్‌యూవీ వెళ్తుంటే దారి ఇవ్వాల్సిందే అన్నంత స్ట్రాంగ్ ఇమేజ్ దీని సొంతం. అయితే ఫార్చ్యూనర్ కొని దర్జాగా తిరగాలని ప్లాన్ చేస్తున్న వారికి ప్రముఖ కార్ల తయారీ సంస్థ ‘టయోటా కిర్లోస్కర్ మోటార్’ భారీ షాక్ ఇచ్చింది. ఏమాత్రం కనికరం లేకుండా ఈ ప్రీమియం ఎస్‌యూవీ ధరలను అమాంతం పెంచేసింది.

హాఫ్ సెంచరీ కొట్టిన టాప్ మోడల్!
తాజా ధరల సవరణతో ఫార్చ్యూనర్ (Toyota Fortuner) ధరలు సామాన్యులకే కాదు, ధనవంతులకు సైతం ముచ్చెమటలు పట్టిస్తున్నాయి. ఇప్పటివరకు ఉన్న బేస్ రేట్లను సవరిస్తూ, వేరియంట్లను బట్టి గరిష్టంగా ఏకంగా రూ. 87 వేల వరకు అదనపు భారాన్ని మోపింది. ఈ పెంపుతో టయోటా ఫార్చ్యూనర్ ప్రారంభ మోడల్ ధర ఇప్పుడు రూ. 34.76 లక్షలకు చేరుకుంది. ఇక అన్ని హంగులూ, డ్యూయల్ టోన్ ఆకర్షణతో ఉండే టాప్-ఎండ్ వేరియంట్ ధర అక్షరాలా హాఫ్ సెంచరీ కొట్టేసి.. రూ. 50.46 లక్షల (ఎక్స్-షోరూమ్) అత్యున్నత మార్క్‌ను తాకింది. దీనికి పన్నులు, ఇన్సూరెన్స్ వంటివి కలిపి ‘ఆన్-రోడ్’ ధరకు వచ్చేసరికి ఈ రేట్లు మరింత పెరగడం ఖాయం.

ఏ మోడల్‌పై ఎంత భారం పడిందంటే..
కంపెనీ తన లైనప్‌లోని స్టాండర్డ్, లెజెండర్ (Legender), జీఆర్-ఎస్ (GR-S) తదితర అన్ని ప్రీమియం వేరియంట్లపై ఈ పెంపును అమలు చేసింది. దీనిపై డీప్ అనాలిసిస్ చేస్తే..

జీఆర్-ఎస్ (GR-S 4X4 AT): తాజా ధరల పెంపు ప్రభావం అత్యధికంగా ఈ టాప్-ఎండ్ ఆటోమేటిక్ వేరియంట్‌పైనే పడింది. దీని ధర ఏకంగా రూ. 87 వేల మేర ఎగబాకింది.

లెజెండర్ వేరియంట్లు: స్పోర్టీ లుక్స్‌తో యూత్‌ను విపరీతంగా ఆకట్టుకునే ‘ఫార్చ్యూనర్ లెజెండర్’ (Toyota Fortuner) మోడల్స్‌పై కూడా వాత తప్పలేదు. వీటి ధరలను రూ. 75 వేల నుంచి గరిష్టంగా రూ. 83 వేల వరకు కంపెనీ పెంచింది.

స్టాండర్డ్ వేరియంట్లు: ఇక రెగ్యులర్ ఎంట్రీ-లెవల్ ఫార్చ్యూనర్ అయిన పెట్రోల్ ఆటోమేటిక్ (AT) 4X2, అలాగే డీజిల్ మాన్యువల్ (MT) 4X2 వేరియంట్ల కొనుగోలుదారులపై రూ. 60 వేల మేర అదనపు భారం పడనుంది.

ధరల మంటకు అసలు కారణం ఇదే..
ఒకేసారి ఇంత భారీ స్థాయిలో ధరలు పెంచడానికి ప్రధాన కారణం ‘ఇన్‌పుట్ ఖర్చులు’ పెరిగిపోవడమేనని తెలుస్తోంది. వాహనాల తయారీలో ఉపయోగించే ముడిసరుకులు, అత్యంత కీలకమైన ఆటోమొబైల్ విడిభాగాల ధరలు గ్లోబల్ మార్కెట్లో భారీగా పెరిగిపోయాయి. దీంతో ఉత్పాదక వ్యయం తడిసి మోపెడవుతోంది. ఆ నష్టాన్ని బ్యాలెన్స్ చేసుకునే క్రమంలో భాగంగానే, ఆ అదనపు భారాన్ని అనివార్యంగా వినియోగదారుల పైకి బదిలీ చేయక తప్పలేదని టయోటా (Toyota Fortuner) నిర్ణయాన్ని బట్టి స్పష్టమవుతోంది. ఏది ఏమైనా, ఈ సెగ్మెంట్‌లో ఫార్చ్యూనర్‌కు సరైన ప్రత్యామ్నాయం లేకపోవడంతో.. రేట్లు ఎంత పెరిగినా సేల్స్‌ ఏమాత్రం తగ్గకపోవచ్చని ఆటోమొబైల్ విశ్లేషకులు భావిస్తున్నారు.