Team India: టీమిండియా విశ్వరూపం.. ముచ్చటగా మూడోసారి టీ20 వరల్డ్ కప్ కైవసం!
- Published By: Phanindra
- March 9, 2026 / 06:56 AM IST
నరేంద్ర మోదీ స్టేడియంలో 2023 వన్డే వరల్డ్ కప్ ఫైనల్ ఓటమి మిగిల్చిన పీడకలను చెరిపేస్తూ, టీమిండియా (Team India) సరికొత్త చరిత్ర సృష్టించింది. వంద కోట్ల మంది భారతీయుల కలను సాకారం చేస్తూ, న్యూజిలాండ్ను ఏకపక్షంగా చిత్తు చేసి 2026 టీ20 ప్రపంచకప్ విజేతగా అవతరించింది. ఫైనల్లో కివీస్పై ఏకంగా 96 పరుగుల భారీ తేడాతో గెలుపొంది పొట్టి ఫార్మాట్లో ముచ్చటగా మూడోసారి (2007, 2024, 2026) విశ్వవిజేతగా నిలిచింది. అంతేకాకుండా టీ20 వరల్డ్ కప్ చరిత్రలో తమ టైటిల్ను విజయవంతంగా కాపాడుకున్న (Defend) తొలి జట్టుగా సూర్యకుమార్ యాదవ్ సేన రికార్డులకెక్కింది.
అభిషేక్ అరాచకం.. శాంసన్ శివతాండవం..
హిస్టరీ చూస్తే 2010 నుంచి ఫైనల్లో టాస్ ఓడిన జట్టు టీ20 వరల్డ్ కప్ గెలవలేదన్న సెంటిమెంట్ను బద్దలుకొడుతూ.. టాస్ ఓడి తొలుత బ్యాటింగ్కు దిగిన భారత్ (Team India) నిర్ణీత 20 ఓవర్లలో 5 వికెట్ల నష్టానికి 255 పరుగుల (టీ20 వరల్డ్ కప్ హిస్టరీలో ఇది మూడో అత్యధిక స్కోరు) భారీ స్కోరు సాధించింది. టోర్నీ ఆసాంతం నిరాశపరిచిన యువ ఓపెనర్ అభిషేక్ శర్మ ఫైనల్లో విశ్వరూపం ప్రదర్శించాడు. కేవలం 19 బంతుల్లోనే హాఫ్ సెంచరీ బాది, టీ20 వరల్డ్ కప్ నాకౌట్స్ చరిత్రలోనే అత్యంత వేగవంతమైన అర్ధశతకం సాధించిన ప్లేయర్గా సరికొత్త రికార్డు నెలకొల్పాడు. అద్భుత ఫామ్లో ఉన్న సంజూ శాంసన్ (89) అద్వితీయ ఇన్నింగ్స్తో చెలరేగగా.. ఇషాన్ కిషన్ (54), శివమ్ దూబే (26 నాటౌట్) కివీస్ బౌలర్లను ఉతికారేశారు.
ఇవి కూడా చదవండి
బుమ్రా మాయ.. కివీస్ విలవిల..
అనంతరం 256 పరుగుల భారీ లక్ష్య ఛేదనలో న్యూజిలాండ్ దారుణంగా తడబడి 19 ఓవర్లలో 159 పరుగులకే కుప్పకూలింది. కివీస్ ఇన్నింగ్స్లో ఓపెనర్ టిమ్ సీఫెర్ట్ (52), కెప్టెన్ సాంట్నర్ (43) మాత్రమే పోరాడారు. మిగతా బ్యాటర్లంతా భారత (Team India) బౌలర్ల ధాటికి పెవిలియన్కు క్యూ కట్టారు. ‘లోకల్ బాయ్’ జస్ప్రీత్ బుమ్రా తన తొలి బంతికే కివీస్ స్టార్ రచిన్ రవీంద్రను ఔట్ చేసి కోలుకోలేని దెబ్బతీశాడు. 4 ఓవర్లలో కేవలం 15 పరుగులిచ్చి 4 వికెట్లు పడగొట్టి కివీస్ పతనాన్ని శాసించాడు. అక్షర్ పటేల్ సైతం 3 వికెట్లతో మెరిశాడు. ఫైనల్ హీరో బుమ్రాకు ‘ప్లేయర్ ఆఫ్ ది మ్యాచ్’, టోర్నీ ఆసాంతం అదరగొట్టిన శాంసన్కు ‘ప్లేయర్ ఆఫ్ ది టోర్నమెంట్’ అవార్డులు దక్కాయి.
(adsbygoogle = window.adsbygoogle || []).push({});
రికార్డుల రారాజుగా భారత్..
ఈ మ్యాచ్తో భారత జట్టు (Team India) ఎన్నో అరుదైన మైలురాళ్లను చేరుకుంది. స్వదేశంలో (Host) టీ20 వరల్డ్ కప్ గెలిచిన తొలి జట్టుగా, వరుసగా నాలుగు ఐసీసీ టోర్నీల్లో (2023 వన్డే కప్, 2024 టీ20, 2025 ఛాంపియన్స్ ట్రోఫీ, 2026 టీ20 వరల్డ్ కప్) ఫైనల్ చేరిన ఏకైక జట్టుగా చరిత్ర సృష్టించింది. ట్రోఫీని డిఫెండ్ చేసుకున్న తొలి జట్టు కూడా భారతే కావడం గమనార్హం. అలాగే పొట్టి ప్రపంచకప్లలో మొత్తం 39 వికెట్లతో బుమ్రా.. భారత్ తరఫున అత్యధిక వికెట్లు తీసిన బౌలర్గా (అర్ష్దీప్ను దాటేసి) అగ్రస్థానానికి చేరుకున్నాడు. ఈ చారిత్రక విజయం పట్ల తెలంగాణ సీఎం రేవంత్ రెడ్డి హర్షం వ్యక్తం చేస్తూ, కెప్టెన్ సూర్యకుమార్కు, జట్టు సభ్యులకు హృదయపూర్వక శుభాకాంక్షలు తెలిపారు.
ఇవి కూడా చదవండి
