Pawan Kalyan: ఇచ్చిన వాగ్దానాలు నిలబెట్టుకోక ఇబ్బందుల్లో పవన్..
- Published By: techteam
- August 25, 2025 / 02:15 PM IST
ఎన్నికలకు ముందు జనసేన (Janasena) అధినేత, ప్రస్తుత ఉప ముఖ్యమంత్రి పవన్ కల్యాణ్ (Pawan Kalyan) ఇచ్చిన రెండు ప్రధాన హామీలు ఇప్పుడు ఆయనను ఇబ్బందుల్లోకి నెట్టుతున్నాయి. అధికారంలోకి వచ్చి దాదాపు 15 నెలలు గడిచినా ఆ హామీలపై ఎటువంటి చర్యలు కనిపించకపోవడంతో సంబంధిత వర్గాలు అసహనం వ్యక్తం చేస్తున్నాయి. పవన్‌ను కలవడానికి పలుమార్లు ప్రయత్నించినప్పటికీ, అపాయింట్‌మెంట్ కూడా దొరకకపోవడంతో ఆ వర్గాలు ఆగ్రహం వ్యక్తం చేస్తూ ఉద్యమానికి సిద్ధమవుతున్నాయి.
మొదటి అంశం సుగాలి ప్రీతి (Sugali Preethi) హత్య కేసు. నెల్లూరు (Nellore) జిల్లాకు చెందిన గిరిజన బాలిక 2018లో ఘోరహత్యకు గురైంది. ఆ కేసు అప్పటి ప్రభుత్వం పట్టించుకోకపోవడంతో కుటుంబం న్యాయం కోసం ఎన్నో సార్లు పోరాటం చేసింది. వైసీపీ (YSRCP) ప్రభుత్వ హయాంలో విచారణ ముందుకు కదలలేదని వారు ఆరోపించారు. ఈ సమయంలో పవన్ కళ్యాణ్ వ్యక్తిగతంగా ఆ కుటుంబాన్ని పరామర్శించారు. ఆర్థిక సాయం అందించారు. వారి ఇంటికి వెళ్లి ధైర్యం చెప్పి, తన ప్రభుత్వం ఏర్పడితే మొదటి సంతకం ఈ కేసుపైనే చేస్తానని హామీ ఇచ్చారు.
కానీ, ఇప్పటివరకు ఆ హామీ అమలు కాలేదు. దాదాపు 15 నెలలు గడిచినా కేసు పునర్విచారణ జరగలేదు. న్యాయం దూరమైపోయిందని భావిస్తున్న సుగాలి కుటుంబం ఇటీవల మంగళగిరి (Mangalagiri)లోని పార్టీ కార్యాలయానికి ఎనిమిది సార్లు వెళ్ళినా, పవన్‌ను కలవలేకపోయారు. కనీసం ఒక స్పష్టమైన సమాధానం కూడా లభించకపోవడంతో వారి నిరాశ పెరిగింది. ఇప్పుడు గిరిజన సంఘాలతో కలిసి ఉద్యమానికి సిద్ధమవుతున్నారు.
రెండో అంశం ఉద్యోగులకు సంబంధించిన సీపీఎస్ (CPS – Contributory Pension Scheme) సమస్య. రాష్ట్రంలో దాదాపు నాలుగు లక్షల మంది సీపీఎస్ ఉద్యోగులు పని చేస్తున్నారు. వీరు చాలా కాలంగా తమను పాత పెన్షన్ విధానంలోకి మార్చాలని డిమాండ్ చేస్తున్నారు. ఈ సమస్యపై గతంలో జగన్ (Jagan Mohan Reddy) హామీలు ఇచ్చి నెరవేర్చకపోవడంతో తీవ్ర వ్యతిరేకత ఎదుర్కొన్నారు. ఇదే అంశం ఎన్నికల ముందు పెద్ద చర్చగా మారింది.
అప్పట్లో పవన్ ఆ ఉద్యోగులను కలవడం జరిగింది. తన ప్రభుత్వం ఏర్పడితే 100 రోజుల్లోపే వారి సమస్య పరిష్కరిస్తానని స్పష్టంగా ప్రకటించారు. కానీ ఇప్పుడు ప్రభుత్వం ఏర్పడి సంవత్సరం దాటినా, ఆ హామీపై చర్యలు కనిపించకపోవడంతో ఉద్యోగులలో అసంతృప్తి పెరిగింది. త్వరలోనే పెద్ద ఎత్తున ఆందోళనకు దిగేందుకు వారు సిద్ధమవుతున్నట్లు సమాచారం.
మొత్తం మీద ఎన్నికల ముందు ఇచ్చిన ఈ రెండు హామీలు—ఒకటి న్యాయం కోసం పోరాడుతున్న సుగాలి ప్రీతి కుటుంబం, మరొకటి ఉద్యోగుల పెన్షన్ సమస్య—పవన్ కళ్యాణ్ కు తలనొప్పిగా మారాయి. ఈ రెండు వర్గాల ఆందోళన మరింతగా పెరిగితే, ఆయన రాజకీయ ఇమేజ్‌కి దెబ్బ తగిలే అవకాశం ఉందని విశ్లేషకులు చెబుతున్నారు.మరి పవన్ ఈ హామీల పై ఎలా స్పందిస్తారో చూడాలి..
