YCP: కూటమి పై కుట్ర.. పవన్‌పై వైసీపీ మైండ్ గేమ్ ప్రారంభం
- Published By: techteam
- November 10, 2025 / 04:35 PM IST
2024 ఎన్నికల్లో జనసేన అధినేత పవన్ కళ్యాణ్ (Pawan Kalyan) నిజమైన గేమ్ చేంజర్‌గా నిలిచారు. రాష్ట్ర రాజకీయ దిశను పూర్తిగా మార్చిన పవన్, కూటమి ఏర్పాటుకు ఎంతో కృషి చేశారు. తానెంతటి స్టార్ నాయకుడైనా, వ్యక్తిగత లాభాలను పక్కన పెట్టి సీట్లను తగ్గించుకున్నారు. ఏపీలో (Andhra Pradesh) ప్రజలు బలమైన ప్రత్యామ్నాయం కోరుతున్నారనే భావనతో, టీడీపీ (TDP), బీజేపీ (BJP)లతో కలసి పోరాటం చేశారు. ఈ క్రమంలో వైసీపీ (YSRCP) నుంచి ఎన్ని విమర్శలు, ఎన్ని ఎగతాళ్లు ఎదురైనా పట్టించుకోలేదు. పవన్ చూపిన ఆ పట్టుదలే కూటమికి బలం ఇచ్చింది, అదే వైసీపీని అధికారానికి దూరం చేసింది.
ఇప్పుడు కూటమి ప్రభుత్వం ఏడాదిన్నరకు చేరుకుంటోంది. అనుకున్నట్లుగానే కూటమి బంధం మరింత బలపడుతోంది. పవన్, చంద్రబాబు (Chandrababu Naidu)ల మధ్య పూర్తి అవగాహనతో పాలన సాగుతోంది. కానీ ఇదే సమయంలో వైసీపీ కొత్త వ్యూహాలు ఆడుతోంది. 2029 ఎన్నికలకు ఇంకా చాలా సమయం ఉండగానే పవన్‌పై మాటల దాడులు మొదలయ్యాయి. అంబటి రాంబాబు (Ambati Rambabu) వంటి నాయకులు పవన్ పేరు ప్రస్తావిస్తూ మైండ్ గేమ్ ప్రారంభించారు.
పవన్ తరచూ “కూటమితో పదిహేనేళ్లు ఉంటా” అని చెబుతూ వచ్చారు. ఆయన మాటల్లో దాచుడు లేదు, అదే ప్రజల్లో నమ్మకాన్ని పెంచుతోంది. ఈ సందర్భంలో అంబటి “పవన్ జీవితాంతం కూటమిలోనే ఉండాలని ఆశిస్తున్నాను” అని వ్యాఖ్యానించారు. పైకి ఆయన పొగడ్తలా మాట్లాడినా, రాజకీయంగా చూస్తే ఇది ఒక వ్యూహమేనని విశ్లేషకులు అంటున్నారు. ఎందుకంటే 2029లో యాంటీ ఇంకెంబెన్సీ పరిస్థితి వస్తుందని అంచనా. అలాంటప్పుడు పవన్ కూటమిలో కొనసాగితే ప్రభుత్వ వ్యతిరేక ఓటు మొత్తం అక్కడే కేంద్రీకృతమవుతుందని వైసీపీ లెక్కలు వేసుకుంటోందట.
ఇక మరొక వైపు పవన్‌ను సామాజికంగా దెబ్బతీయాలనే ప్రయత్నం జరుగుతుందా అనే అనుమానాలు వ్యక్తమవుతున్నాయి. కాపు వర్గంపై దాడులు, సినీ ప్రముఖులపై వ్యాఖ్యలు వచ్చినా పవన్ స్పందించరని చెప్పడం వెనుక ఉన్న ఉద్దేశ్యం అదేనా అన్నది చర్చనీయాంశంగా మారింది. పవన్ కూటమి నుంచి బయటకు రావాలనే ఒత్తిడి వైసీపీ పక్కాగా ప్లాన్ చేస్తుందా అన్నది రాజకీయ వర్గాల్లో చర్చ.
అయితే పవన్ కనుక ఒంటరిగా బరిలోకి దిగితే పరిస్థితి 2019లా ఉండదని విశ్లేషకులు అంటున్నారు. ఇప్పుడు ఆయనకు పరిపాలనలో అనుభవం ఉంది, ఎమ్మెల్యేలు కూడా ఉన్నారు. అలాంటి నాయకుడు త్రిముఖ పోరులో ఉంటే, అది వైసీపీకి పెద్ద మైనస్ అవుతుంది. వ్యతిరేక ఓట్లు విభజించినా కూడా టీడీపీ మళ్లీ గెలిచే అవకాశం ఉంటుంది. మొత్తానికి, వైసీపీ ఆశించినట్లు 2029 రాజకీయ సమీకరణలు కుదరడం కష్టమే. ఎందుకంటే కూటమిలో చంద్రబాబు లాంటి అనుభవజ్ఞుడు, పవన్ లాంటి నిబద్ధత కలిగిన నాయకుడు ఉన్నారు. ఇద్దరి కలయిక మరోసారి ఏపీ రాజకీయ దిశను నిర్ణయించనుందన్నది స్పష్టంగా కనిపిస్తోంది.
