Y.S.Sharmila: జగన్ పాదయాత్ర ప్రకటనపై షర్మిల ఘాటు ప్రశ్నలు .. ఏపీ రాజకీయాల్లో కొత్త చర్చ..

ఇటీవలి కాలంలో ఆంధ్రప్రదేశ్ రాజకీయాల్లో (Andhra Pradesh Politics) కొంతకాలంగా నిశ్శబ్దంగా ఉన్న ఏపీ కాంగ్రెస్ (AP Congress) అధ్యక్షురాలు వైఎస్ షర్మిల (YS Sharmila) మళ్లీ గళం విప్పారు. కేంద్ర ప్రభుత్వం మహాత్మా గాంధీ ఉపాధి హామీ పథకాన్ని (Mahatma Gandhi National Rural Employment Guarantee Scheme – MGNREGS) బలహీనపరిచే ప్రయత్నాలు చేస్తోందని ఆరోపిస్తూ, దానికి నిరసనగా పాదయాత్ర చేపట్టనున్నట్లు ఆమె ప్రకటించారు. ఈ సందర్భంగా ఆమె తన సోదరుడు, మాజీ ముఖ్యమంత్రి వైఎస్ జగన్ మోహన్ రెడ్డి (YS Jagan Mohan Reddy)పై మరోసారి ఘాటు వ్యాఖ్యలు చేశారు.

విలేకరులతో మాట్లాడిన షర్మిల, ఏడాదిన్నర విరామం తర్వాత జగన్ మళ్లీ పాదయాత్ర చేస్తానని ప్రకటించడంపై తీవ్రంగా స్పందించారు. పాదయాత్రలు ప్రజల సమస్యల కోసం కాకుండా కేవలం అధికారం కోసం మాత్రమే చేస్తున్నారా? అని ప్రశ్నించారు. అధికారంలోకి రాగానే దివంగత ముఖ్యమంత్రి వైఎస్ రాజశేఖర్ రెడ్డి (YS Rajasekhara Reddy) ప్రారంభించిన జలయజ్ఞం (Jalayagnam) ప్రాజెక్టులను పూర్తిచేస్తానని చెప్పి, వాటిని నిర్లక్ష్యం చేశారని విమర్శించారు. అలాగే మధ్యపాన నిషేధం చేస్తానని హామీ ఇచ్చి, ఆ తర్వాత కల్తీ మద్యం వ్యవహారాలు, మాఫియాలపై చర్యలు తీసుకోలేదని ఆరోపించారు.

గెలిచిన తర్వాత ప్రజల మధ్యకు వచ్చారా? ప్రజా సమస్యలపై నేరుగా స్పందించారా? అంటూ ఆమె వరుస ప్రశ్నలు సంధించారు. అధికారమే లక్ష్యంగా రాజకీయాలు చేస్తే ప్రజల నమ్మకం నిలవదని వ్యాఖ్యానించారు. పవర్ జగన్‌కు సూట్ కాలేదని, ఆయన తన ఆలోచన విధానాన్ని మార్చుకుని స్వార్థాన్ని తగ్గించుకుంటేనే దేవుడు, ప్రజలు మళ్లీ ఆశీర్వదిస్తారని షర్మిల అభిప్రాయపడ్డారు. ఈ వ్యాఖ్యలు రాజకీయ వర్గాల్లో ఆసక్తిని రేపాయి.

ఇంకా, 2027లో చేయబోయే పాదయాత్రను ఇప్పుడే ప్రకటించడం వెనుక అసలు ఉద్దేశం ఏమిటని ఆమె ప్రశ్నించారు. తాము మాత్రం ఇప్పుడే ఉపాధి హామీ కార్మికుల సమస్యల కోసం పాదయాత్ర ప్రారంభిస్తున్నామని స్పష్టం చేశారు. ప్రజలకు తక్షణ అవసరమైన అంశాలపై పోరాటం చేయడమే తమ లక్ష్యమని చెప్పారు. “మీరు చేసే పాదయాత్ర దేనికోసం?” అంటూ జగన్‌ను ఉద్దేశించి ప్రశ్నించడం రాజకీయంగా హాట్ టాపిక్‌గా మారింది.

షర్మిల చేసిన ఈ వ్యాఖ్యలపై రాజకీయ విశ్లేషకులు స్పందిస్తున్నారు. జగన్‌కు నిజమైన రాజకీయ ప్రత్యర్థి ఎవరు అన్న ప్రశ్నకు సమాధానంగా షర్మిలే ప్రధానంగా కనిపిస్తున్నారని వారు అభిప్రాయపడుతున్నారు. ఒకే కుటుంబానికి చెందిన ఇద్దరు నేతల మధ్య ఈ రాజకీయ దూరం రాబోయే రోజుల్లో ఏ రూపం దాలుస్తుందోనన్న చర్చ సాగుతోంది. ఈ వ్యాఖ్యలపై జగన్ స్పందిస్తారా? లేక మౌనంగా వదిలేస్తారా? అన్నది రాజకీయ వర్గాల్లో ఆసక్తిగా మారింది. మొత్తానికి షర్మిల తిరిగి యాక్టివ్ మోడ్ లోకి రావడం రాబోయే హాట్ పొలిటికల్ డిస్కషన్స్ కి తెరలేపింది అన్నడంలో డౌట్ లేదు.