Jagan: నెలకు 312 కోట్ల వడ్డీ చెల్లింపులు.. ఆర్థిక ఇబ్బందుల్లో కూటమి ప్రభుత్వం..

ఆంధ్రప్రదేశ్ (Andhra Pradesh) ప్రభుత్వం ప్రస్తుతం భారీ ఆర్థిక ఒత్తిడిని ఎదుర్కొంటోంది. ఆర్థిక శాఖ సమాచారం ప్రకారం, గత వైసీపీ (YSRCP) పాలనలో తీసుకున్న అప్పుల కారణంగా నెల నెలా 312 కోట్ల రూపాయలు వడ్డీ రూపంలో చెల్లించాల్సి వస్తోంది. మొత్తం రాష్ట్ర అప్పులు 4.23 లక్షల కోట్లు ఉంటే, అందులో 2.86 లక్షల కోట్లు వైసీపీ అధినేత జగన్ మోహన్ రెడ్డి (Y. S. Jagan Mohan Reddy) ముఖ్యమంత్రిగా ఉన్న కాలంలోనే తీసుకున్న అప్పులని అధికారులు స్పష్టం చేశారు.

ఈ మొత్తాన్ని ప్రభుత్వ గ్యారంటీతో తెచ్చుకున్నట్లు తెలియజేశారు. అదేవిధంగా, కార్పొరేషన్లు, మద్యం అమ్మకాల లాభాలను చూపించి మరో మూడు లక్షల కోట్ల వరకు అప్పులు తీసుకొచ్చారని వివరించారు. ఈ రకమైన అప్పులపై వడ్డీని ఆయా సంస్థలే భరించాల్సి వస్తుందని కూడా ఆర్థిక శాఖ అధికారులు చెబుతున్నారు. అయినప్పటికీ, ప్రభుత్వం భరిస్తున్న భారం తగ్గలేదని తెలుస్తోంది. నెలకు 312 కోట్ల రూపాయలు అంటే ఏటా సుమారు 3600 కోట్లను కేవలం వడ్డీగానే చెల్లించాల్సిన పరిస్థితి ఏర్పడింది. ప్రస్తుత బడ్జెట్‌లో వడ్డీల కోసం కేటాయించిన నిధులు కేవలం 1200 కోట్లు మాత్రమే కావడంతో.. ఇది సరిపోకపోక ఆర్థిక శాఖ మంత్రి పయ్యావుల కేశవ్ (Payyavula Keshav) తర్జన భర్జన పడుతున్నారని సమాచారం. ఈ సమస్యపై ముఖ్యమంత్రి చంద్రబాబు నాయుడు (Nara Chandrababu Naidu) తో చర్చించి ముందుకు వెళ్లాలని భావిస్తున్నారని చెబుతున్నారు.

ఇక అప్పులు పెరగడానికి ప్రధాన కారణం వైసీపీ ప్రభుత్వ విధానమని ఆర్థిక నిపుణులు అంటున్నారు. అభివృద్ధి పనులకు అప్పులు వినియోగించాల్సిన చోట, ఎక్కువ మొత్తాన్ని సంక్షేమ పథకాలకే వెచ్చించారని వారు పేర్కొంటున్నారు. దీంతో రాష్ట్రానికి వచ్చే ఆదాయం తగ్గిపోవడంతో అప్పులు మరింత పెరిగిపోయాయి. ఎన్నికల ముందు కూడా ఫీజు రీయింబర్స్‌మెంట్ కోసం అప్పులు తెచ్చినట్లు రికార్డులు చూపిస్తున్నాయి. ఇప్పుడు కూటమి ప్రభుత్వం ఈ అప్పుల భారం మోయాల్సి వస్తోంది. అసలు అప్పులను తీర్చే ప్రక్రియ ఎప్పుడు ప్రారంభమవుతుందో తెలియదు కానీ, వడ్డీలు మాత్రం క్రమం తప్పకుండా చెల్లించాల్సిన పరిస్థితి తప్పదని అధికారులు చెబుతున్నారు. ఇప్పటికే వడ్డీలు పేరుకుపోవడం వల్ల రాష్ట్ర ఆర్థిక పరిస్థితి మరింత క్లిష్టతరం అయింది.

మొత్తానికి, గతంలో తీసుకున్న నిర్ణయాలు ప్రస్తుత ప్రభుత్వానికి బరువుగా మారాయి. ఆర్థిక సమస్యలను ఎదుర్కోవడానికి కొత్త వ్యూహాలు అవసరమని ఆర్థిక నిపుణులు సూచిస్తున్నారు. లేకపోతే అప్పులు రాష్ట్రాన్ని మరింతగా కుదించవచ్చని హెచ్చరిస్తున్నారు. ఇప్పుడు రాష్ట్ర ప్రభుత్వం వడ్డీల భారాన్ని ఎలా సమీకరిస్తుంది, భవిష్యత్‌లో అభివృద్ధి, సంక్షేమం మధ్య సమతౌల్యం ఎలా పాటిస్తుంది అన్నదే అందరి దృష్టిని ఆకర్షిస్తోంది.