Chandrababu: ఎరువుల అక్రమ మళ్లింపు.. బాధ్యులపై కఠిన చర్యలు తప్పవన్న చంద్రబాబు

ఆంధ్రప్రదేశ్ ముఖ్యమంత్రి చంద్ర‌బాబు నాయుడు (Chandrababu Naidu) రాష్ట్రంలో రైతుల కోసం కేంద్రం పంపించిన ఎరువులు దారి మళ్లించబడిన విషయంపై తీవ్ర ఆగ్రహం వ్యక్తం చేశారు. ఢిల్లీలో (Delhi) పర్యటిస్తున్న ఆయన, వీడియో కాన్ఫరెన్స్ ద్వారా వ్యవసాయ శాఖ మంత్రి అచ్చెన్నాయుడు (Achchennaidu), ముఖ్య కార్యదర్శి విజ‌యానంద్ (Vijayanand) లతో మాట్లాడి, ఈ వ్యవహారంపై వెంటనే చర్యలు తీసుకోవాలని ఆదేశించారు.

రైతుల కోసం తెచ్చిన ఎరువులు ఇతర మార్గాలకు మళ్లించడం అసహ్యం అని ఆయన అన్నారు. ఈ వ్యవహారంలో ఎలాంటి దాపరికం ఉండకూడదని, దానికి బాధ్యులెవరో 24 గంటల్లో బయట పెట్టాలని మంత్రి అచ్చెన్నాయుడిని కఠినంగా ఆదేశించారు. రైతుల కోసం కేంద్రం ప్రత్యేకంగా కేటాయించిన ఎరువులు ఆంధ్రప్రదేశ్ (Andhra Pradesh) కి ఇతర రాష్ట్రాల కంటే ఎక్కువగానే వచ్చాయని గుర్తు చేశారు. అయితే వాటిని గోదాముల నుంచి రైతులకు చేరక ముందే నకిలీ పేర్లతో, కట్టుకథలతో దారి మళ్లించడం చాలా పెద్ద తప్పిదమని అన్నారు.

రైతులు ప్రస్తుతం డీఏపీ (DAP) కోసం ఎదురుచూస్తుండగా ఇలాంటి అక్రమాలు జరగడం అసహనీయమని చంద్రబాబు తెలిపారు. ఇటీవలే రైతులకు అన్నదాత సుఖీభవ (Annadata Sukhibhava) పథకం కింద నిధులు అందజేశామని, ఇప్పుడు వారు ఆ సొమ్ముతో ఎరువులు కొనుగోలు చేసుకునే సమయానికే ఇలాంటి సంఘటన జరగడం అన్యాయం అని అన్నారు.

ఈ అంశంపై మీడియా కూడా విస్తృతంగా వార్తలు ప్రచారం చేస్తుండటంతో రైతుల్లో ఆగ్రహం పెరుగుతోందని .. అందువల్ల ఏ స్థాయి వ్యక్తులైనా ఈ అక్రమానికి పాల్పడి ఉంటే వారిపై క్రిమినల్ కేసులు నమోదు చేయాలని ఆదేశించారు. ఎక్కడెక్కడ ఎరువులు మళ్లించబడ్డాయో అక్కడ విస్తృతంగా తనిఖీలు చేసి, తిరిగి వాటిని గోదాములకు చేర్చాలని స్పష్టంగా తెలిపారు.

“ఉపేక్షిస్తే ఆటగా తీసుకుంటారు, కానీ ఈసారి సహించేది లేదు. రైతుల ప్రయోజనం కోసం తెచ్చిన ఎరువులు తప్పనిసరిగా వారికి చేరాలి. ఎవరైనా ఆ మార్గంలో అడ్డంకులు సృష్టిస్తే కఠిన చర్యలు తప్పవు,” అని చంద్రబాబు హెచ్చరించారు. రాష్ట్ర వ్యాప్తంగా రైతులు ప్రస్తుతం విత్తనాల సీజన్ కోసం ఎదురుచూస్తున్నారు. ఇలాంటి సమయంలో ఎరువుల కొరత ఏర్పడితే పంటల దిగుబడులపై తీవ్ర ప్రభావం పడుతుందని ఆయన స్పష్టం చేశారు. అందుకే ఎరువూ వృధా కాకుండా, దారి మళ్లించకుండా రైతుల చేతికి చేరేలా చర్యలు తీసుకోవాలని అధికారులు ఆదేశించారు.

రైతుల కోసం కష్టపడి కేంద్రం నుండి తెచ్చిన ఎరువులను సొంత లాభాల కోసం మళ్లించిన వారికి శిక్ష తప్పదని, ఇది ప్రభుత్వ ప్రతిష్టకు కూడా భంగం కలిగించే అంశమని చంద్రబాబు ఆవేదన వ్యక్తం చేశారు. వ్యవసాయరంగం బలోపేతానికి ప్రభుత్వం కట్టుబడి ఉందని, ఈ అక్రమంపై కఠిన చర్యలు తీసుకుంటామని ఆయన స్పష్టంగా తెలిపారు.