Nara Lokesh: గాడితప్పుతున్న ఎమ్మెల్యేలపై లోకేశ్ ఆగ్రహం!

ఆంధ్రప్రదేశ్‌లో సంకీర్ణ ప్రభుత్వం కొలువుదీరి దాదాపు ఏడాదిన్నర అయింది. అయినా తెలుగుదేశం పార్టీ (TDP)లో, ముఖ్యంగా తొలిసారి గెలిచిన కొంతమంది ఎమ్మెల్యేల (MLA) పనితీరు, వ్యవహారశైలి పార్టీ అధిష్టానానికి పెద్ద తలనొప్పిగా మారింది. పార్టీ జాతీయ ప్రధాన కార్యదర్శి, మంత్రి నారా లోకేశ్‌ (Nara Lokesh) ఈ అంశంపై పదేపదే అసహనం, అసంతృప్తి వ్యక్తం చేస్తున్నారు. ఇవాళ కేబినెట్ భేటీ (Cabinet Meeting) సమావేశానికి ముందు మంత్రులతో సమావేశమైన నారా లోకేశ్, ఇదే అంశాన్ని మరోసారి లేవనెత్తారు.

“తొలిసారి గెలిచిన కొంతమంది ఎమ్మెల్యేలకు మంచిచెడులు తెలియడం లేదు. అవగాహనా రాహిత్యం, అనుభవలేమితో సమన్వయం ఉండట్లేదు” అని నారా లోకేశ్ నేరుగా చెప్పారు. ఆయన మాటలు పార్టీలోని అంతర్గత సమస్యలకు అద్దం పడుతున్నాయి. కొత్త ఎమ్మెల్యేలకు సీనియర్‌ నేతలు, ఎమ్మెల్యేలు అవగాహన కల్పించాలని, తమ అనుభవాలను పంచుకోవాలని లోకేశ్‌ సూచించారు. కొత్తగా గెలిచిన వారు వరుస విజయాలు కొనసాగించాలంటే లోటుపాట్లు సరిచేసుకోవాల్సిన అవసరం ఉందని ఆయన స్పష్టం చేశారు.

కొంతకాలంగా లోకేశ్‌ తో పాటు ముఖ్యమంత్రి చంద్రబాబు (CM Chandrababu) కూడా ఎమ్మెల్యేల తీరుపై పదేపదే హెచ్చరికలు జారీ చేస్తున్నారు. ఎమ్మెల్యేలు ప్రజలకు అందుబాటులో ఉండటం లేదనేది ప్రధాన ఫిర్యాదు. లోకేశ్ ప్రారంభించిన ప్రజాదర్బార్ కార్యక్రమాన్ని తొలి రోజుల్లో ఉత్సాహంగా నిర్వహించినా, ఆ తర్వాత చాలా మంది ఎమ్మెల్యేలు, మంత్రులు దాన్ని పట్టించుకోవడం మానేశారు. దీంతో ప్రజలు తమ సమస్యలు చెప్పుకోవడానికి పార్టీ కేంద్ర కార్యాలయానికి తరలివస్తున్నారు. ఇది లోకేశ్ కు తీవ్ర ఆగ్రహం తెప్పించింది. నియోజకవర్గాల్లో గ్రీవెన్స్ నిర్వహిస్తే ప్రజలు ఇంతదూరం రావాల్సిన అవసరం ఉండదు కదా అని ఆయన మండిపడ్డారు.

ఇక కొంతమంది ఎమ్మెల్యేలు అధికారాన్ని అడ్డుపెట్టుకుని అవినీతి, అక్రమాలకు పాల్పడుతున్నారు. పలువురు ఎమ్మెల్యేల వ్యవహారశైలిపై ప్రజల నుంచి ఫిర్యాదులు వస్తున్నాయి. ఈ అంశాన్ని కూడా లోకేశ్‌ గతంలోనే బహిరంగంగా హెచ్చరించారు. పనితీరు సరిగా లేని ఎమ్మెల్యేలు పద్ధతి మార్చుకోవాలని, లేదంటే కఠిన చర్యలు తప్పవని మూడు నెలల డెడ్‌లైన్ కూడా విధించారు. పార్టీ కోసం కష్టపడి పనిచేసిన కార్యకర్తలను, సీనియర్‌ నాయకులను కొంతమంది కొత్త ఎమ్మెల్యేలు గౌరవించడం లేదనే ఫిర్యాదులు కూడా లోకేశ్‌ దృష్టికి వచ్చాయి. కావలి ఎమ్మెల్యే కావ్య కృష్ణారెడ్డి విషయంలో సీటు త్యాగం చేసిన సీనియర్‌ నేత మృతి చెందినప్పుడు కనీసం పరామర్శించకపోవడంపై ఆయన తీవ్ర అసంతృప్తి వ్యక్తం చేశారు. పార్టీని బలోపేతం చేసేందుకు, కార్యకర్తలకు భరోసా ఇచ్చేందుకు లోకేశ్‌ స్వయంగా రంగంలోకి దిగుతున్నారు.

ఏడాదిన్నర కాలంలోనే ఎమ్మెల్యేల వ్యవహారశైలిపై అధిష్టానం ఇంత తీవ్రస్థాయిలో స్పందించాల్సి రావడం టీడీపీకి పెద్ద సమస్యగా మారుతోంది. ఒకవైపు ముఖ్యమంత్రి చంద్రబాబు రాష్ట్ర అభివృద్ధి, పాలనపై దృష్టి సారిస్తూ, ఎప్పటికప్పుడు సర్వేలు చేయిస్తున్నారు. అందుకు అనుగుణంగా నేతలకు హెచ్చరికలు జారీ చేస్తున్నా, కొందరు ఎమ్మెల్యేల తీరు మారకపోవడం ఆందోళన కలిగిస్తోంది. శ్రీశైలం ఎమ్మెల్యే ప్రభుత్వ ఉద్యోగులపై దాడి చేయడం, పలువురు ఎమ్మెల్యేలు రౌడీ షీటర్ల పెరోల్‌కు సిఫార్సులు చేయడం వంటి వివాదాస్పద సంఘటనలు ప్రభుత్వ ప్రతిష్టను దెబ్బతీస్తున్నాయి. ఇలాగే వ్యవహరిస్తే వారి వ్యక్తిగత చర్యలకు పార్టీ మూల్యం చెల్లించాల్సి వస్తుందని హైకమాండ్ ఆందోళన చెందుతోంది.

మరోవైపు, మంత్రివర్గ సమావేశానికి ముందు లోకేశ్‌, పార్టీ మంత్రులకు కీలక లక్ష్యాలను నిర్దేశించారు. ఈ నెల 14, 15 తేదీల్లో విశాఖలో జరగనున్న పెట్టుబడుల భాగస్వామ్య సదస్సును విజయవంతం చేయడంపై ఆయన ప్రత్యేక దృష్టి పెట్టారు. ఈ సదస్సు ద్వారా రాష్ట్రానికి దాదాపు రూ.10 లక్షల కోట్ల పెట్టుబడులు రానున్నాయని, లక్షలాది ఉద్యోగ, ఉపాధి అవకాశాలు లభిస్తాయని చెప్పారు. ఈ లక్ష్యాలను చేరాలంటే ప్రతి మంత్రీ తమ శాఖల పరిధిలోని ఒప్పందాలపై బాధ్యతతో వ్యవహరించాలని, 20 లక్షల ఉద్యోగాల కల్పన హామీని త్వరగా నెరవేర్చాలని ఆయన పిలుపునిచ్చారు.

మొత్తంగా చూస్తే, పార్టీలో యువనేతగా లోకేశ్‌ పారదర్శకత, ప్రజా సేవకు ఎక్కువ ప్రాధాన్యత ఇస్తున్నట్లు కనిపిస్తోంది. ఎమ్మెల్యేలు, మంత్రులు ప్రజా సమస్యల పరిష్కారంలో నిర్లక్ష్యం వహించినా, పార్టీ క్రమశిక్షణను ఉల్లంఘించినా, నిర్దాక్షిణ్యంగా పక్కన పెట్టేందుకు కూడా వెనుకాడబోనని ఆయన సంకేతాలు ఇస్తున్నారు. ఎమ్మెల్యేలు తమ పద్ధతి మార్చుకోకపోతే, భవిష్యత్తులో టికెట్ల కేటాయింపు, పార్టీ పదవుల విషయంలో కఠిన నిర్ణయాలు ఉండే అవకాశం ఉందని రాజకీయ విశ్లేషకులు అభిప్రాయపడుతున్నారు.