Chandrababu: ఏపీ అభివృధి కోసం నిర్మలా సీతారామన్ తో చంద్రబాబు భేటీ..

ఆంధ్రప్రదేశ్ ముఖ్యమంత్రి చంద్ర‌బాబు నాయుడు (Chandrababu Naidu) ఢిల్లీలో (Delhi) పర్యటిస్తూ కేంద్ర నాయకులతో వరుస భేటీలు కొనసాగిస్తున్నారు. రాష్ట్ర అభివృద్ధి, పెట్టుబడులు, ప్రాజెక్టులు, కేంద్ర సహాయంపై ఆయన విస్తృతంగా చర్చించారు. ఈ సందర్భంగా కేంద్ర ఆర్థిక మంత్రి నిర్మలా సీతారామన్ (Nirmala Sitharaman) ను కలిసి రాష్ట్ర ఆర్థిక పరిస్థితులపై సమగ్రంగా వివరించారు.

చంద్రబాబు మాట్లాడుతూ జగన్‌మోహన్‌రెడ్డి (Jagan Mohan Reddy) హయంలో రాష్ట్రం తీవ్ర నష్టాన్ని చవిచూసిందని తెలిపారు. కేంద్రం అందించే అనేక పథకాలను సరిగా వినియోగించకపోవడం వల్ల నిధుల రాక ఆగిపోయిందని గుర్తు చేశారు. తాము అధికారంలోకి వచ్చిన తర్వాత 78 కేంద్ర పథకాలను సమర్థవంతంగా అమలు చేస్తున్నామన్న విషయం ఆయన వివరించారు. ఆ పథకాల కోసం రాష్ట్ర ప్రభుత్వం తన వంతుగా మ్యాచింగ్ గ్రాంట్లు కూడా కేటాయించి ముందుకు సాగుతోందని చెప్పారు.

ప్రత్యేకంగా రాజధాని ప్రాంత అభివృద్ధికి సహాయపడే సాస్కి (SASCI – Special Assistance for State Capital Infrastructure) తరహా నిధులు కేటాయించాలని కేంద్రాన్ని కోరారు. అలాగే తూర్పు ప్రాంత రాష్ట్రాల సమగ్రాభివృద్ధి కోసం రూపొందించిన “పూర్వోదయ” (Purvodaya) పథకం నుండి ఆంధ్రప్రదేశ్ (Andhra Pradesh) కూడా లబ్ధి పొందేలా చేయాలని సూచించారు. ఈ పథకం అమలుకు సంబంధించి మార్గదర్శకాలను త్వరగా ఖరారు చేయాలని చంద్రబాబు విజ్ఞప్తి చేశారు.

ఇప్పటికే సిస్కో (Cisco) పథకం కింద రూ.2,010 కోట్లు రాష్ట్రానికి లభించాయని, అయితే ఇంకా పెండింగ్‌లో ఉన్న ముఖ్యమైన మూలధన ప్రాజెక్టుల కోసం కనీసం రూ.5,000 కోట్లు అవసరమని ఆయన వివరించారు. అదనంగా, 2024-25 ఆర్థిక సంవత్సరానికి సంబంధించిన సింగిల్ నోడల్ ఏజెన్సీ (Single Nodal Agency) ప్రోత్సాహక పథకం కింద రాష్ట్రం పంపిన రూ.250 కోట్ల ప్రతిపాదనను వెంటనే ఆమోదించాలని వినతి పత్రంలో అభ్యర్థించారు.

అనంతరం చంద్రబాబు ఆర్థిక సంఘం ఛైర్మన్ అరవింద్ పనగడియా (Arvind Panagariya) తో కూడా సమావేశమయ్యారు. ఆంధ్రప్రదేశ్ ఇప్పటికీ అభివృద్ధి దశలోనే ఉందని, ప్రజల అవసరాలను తీర్చడానికి విస్తృతంగా నిధులు అవసరమని ఆయన వివరించారు. ముఖ్యంగా అమరావతి (Amaravati) రాజధాని ప్రాంతంలో మౌలిక వసతుల ఏర్పాటుకు అధికంగా నిధులు కేటాయించాల్సిన అవసరం ఉందని చెప్పారు.

రాష్ట్రానికి కేటాయించే నిధుల్లో ఆర్థిక సంఘం మరింత వెసులుబాటు కల్పిస్తే ప్రజల అంచనాలను నెరవేర్చేలా అభివృద్ధి కార్యక్రమాలను వేగవంతం చేయగలమని చంద్రబాబు అభిప్రాయపడ్డారు. ఆయన కేంద్ర నాయకులకు ఇచ్చిన సూచనలు, వినతులు అన్నీ రాష్ట్ర అభివృద్ధి దిశగా ముందడుగు వేయించడానికే అన్న స్పష్టత ఇచ్చారు. ఈ పర్యటన ద్వారా ఆంధ్రప్రదేశ్‌కి మరింత నిధుల రాకపై సానుకూల సంకేతాలు లభించే అవకాశముందని రాజకీయ వర్గాలు భావిస్తున్నాయి.