Smart Ration Cards: నాలుగు విడతలుగా స్మార్ట్ కార్డుల పంపిణీకి సిద్ధమైన ఆంధ్రప్రదేశ్ ప్రభుత్వం

ఆంధ్రప్రదేశ్ (Andhra Pradesh) ప్రభుత్వం రేషన్ కార్డుల పంపిణీ విధానంలో పెద్ద మార్పు తీసుకువస్తోంది. రాష్ట్రంలోని అన్ని రేషన్ కార్డులను స్మార్ట్ కార్డులుగా మార్చి ప్రజలకు అందించడానికి ఏర్పాట్లు పూర్తయ్యాయి. ఈ నెల 25వ తేదీ నుంచి ఈ కార్యక్రమం ప్రారంభమవుతుందని మంత్రి నాదెండ్ల మనోహర్ (Nadendla Manohar) వెల్లడించారు.

పంపిణీ మొత్తం నాలుగు విడతలుగా జరగనుంది. మొదటి విడతలో ఆగస్టు 25 నుంచి 30 వరకు ఉత్తరాంధ్ర జిల్లాలతో పాటు ఎన్టీఆర్ (NTR), తిరుపతి (Tirupati), నెల్లూరు (Nellore), తూర్పు గోదావరి (East Godavari), పశ్చిమ గోదావరి (West Godavari), కృష్ణా (Krishna) జిల్లాలలో కార్డుల పంపిణీ జరుగుతుంది. ఈ ప్రారంభోత్సవాలను ఆయా ప్రాంతాల మంత్రులు, ఎమ్మెల్యేలు, అధికారులు ప్రజా వాతావరణంలో చేపట్టనున్నారు.

రెండవ విడత ఆగస్టు 30 నుంచి చిత్తూరు (Chittoor), కాకినాడ (Kakinada), గుంటూరు (Guntur), ఏలూరు (Eluru) జిల్లాలలో కొనసాగుతుంది. మూడవ విడత సెప్టెంబర్ 6 నుంచి అనంతపురం (Anantapur), అల్లూరి సీతారామ రాజు (Alluri Sitarama Raju), పార్వతీపురం మన్యం (Parvathipuram Manyam), డాక్టర్ బీఆర్ అంబేద్కర్ కోనసీమ (Dr. B.R. Ambedkar Konaseema), అనకాపల్లి (Anakapalli) జిల్లాలలో చేపడతారు. చివరి విడత సెప్టెంబర్ 15 నుంచి బాపట్ల (Bapatla), పల్నాడు (Palnadu), వైఎస్సార్ కడప (YSR Kadapa), అన్నమయ్య (Annamayya), శ్రీ సత్యసాయి (Sri Sathya Sai), కర్నూలు (Kurnool), నంద్యాల (Nandyal), ప్రకాశం (Prakasam) జిల్లాలలో ప్రారంభం అవుతుంది.

ప్రస్తుతం రాష్ట్రంలో ఉన్న రేషన్ కార్డుల సంఖ్య సుమారు 1 కోటి 45 లక్షల వరకు ఉందని ప్రభుత్వం తెలిపింది. గ్రామ, వార్డు సచివాలయాల సహకారంతో ఈ స్మార్ట్ కార్డులను ఆయా రేషన్ షాపుల వద్ద పంపిణీ చేయనున్నారు. దీనితో పాటు కొత్తగా 6 లక్షల 71 వేల కార్డులు కూడా అందించనున్నారు. అదనంగా 16 లక్షల 67 వేల 32 దరఖాస్తులను ఆమోదించినట్టు మంత్రి వెల్లడించారు. రేషన్ కార్డుల జారీ ఎప్పటికీ కొనసాగుతూ ఉండే ప్రక్రియ అని, ప్రజలు ఎప్పుడైనా ఆన్‌లైన్‌లో దరఖాస్తు చేసుకోవచ్చని తెలిపారు.

ఈ స్మార్ట్ రేషన్ కార్డులు దేశంలోనే తొలిసారి ఆధునిక డిజిటల్ పద్ధతిలో అందించబడుతున్నాయని మంత్రి వివరించారు. వీటిలో కుటుంబ సభ్యుల వివరాలు, భద్రత కోసం ప్రత్యేక క్యూఆర్ కోడ్, ప్రభుత్వ చిహ్నం ఉంటాయి. అలాగే సమస్యల కోసం ఎవరైనా టోల్ ఫ్రీ నంబర్ 1967 కు సంప్రదించవచ్చని తెలిపారు.దాదాపు రెండు నెలలుగా ఈ ప్రక్రియపై విస్తృతంగా కసరత్తు చేసిన తరువాత ఇప్పుడు ప్రజలకు అందుబాటులోకి తీసుకువస్తున్నామని మంత్రి నాదెండ్ల మనోహర్ తెలిపారు. చివరి మైలు వరకు సేవలను అందించడమే తమ ముఖ్య లక్ష్యం అని, అందరికీ పారదర్శకంగా కార్డులు చేరేందుకు అన్ని ఏర్పాట్లు చేసినట్టు చెప్పారు.