కండల బలానికి ప్రొటీన్ ఒక్కటే సరిపోదు.. ఈ పోషకాలు లేకపోతే కష్టమే!

Muscle Strength: సాధారణంగా వయసు పెరుగుతున్న కొద్దీ శరీరంలో కండరాల సాంద్రత తగ్గడం సహజం. కండరాలు క్షీణించకుండా ఉండాలంటే కేవలం గుడ్లు, మాంసం వంటి ప్రొటీన్ రిచ్ ఆహారం తీసుకుంటే సరిపోతుందని చాలామంది భావిస్తుంటారు. అయితే, కండరాల పటిష్టతకు ప్రొటీన్‌తో పాటు ఇతర కీలక పోషకాలు కూడా అంతే అవసరమని ఆరోగ్య నిపుణులు సూచిస్తున్నారు. మలి వయసులో కండరాలు బలహీనపడితే నడకలో పట్టు తప్పడం, ఎముకలు విరగడం వంటి ప్రమాదాలు పొంచి ఉంటాయి. వీటిని నివారించడానికి ప్రొటీన్‌తో పాటు ఈ క్రింది పోషకాలపై దృష్టి పెట్టాలి.

1. పిండి పదార్థాలు (Carbohydrates)..
శరీరానికి ప్రధాన శక్తి వనరులు ఇవే. పిండి పదార్థాలు తగినంత  తీసుకోకపోతే, శక్తి కోసం శరీరం కండరాలనే వాడుకుంటుంది. దీనివల్ల కండర క్షీణత మొదలవుతుంది. కాబట్టి పండ్లు, కూరగాయలు, తృణధాన్యాల ద్వారా నాణ్యమైన పిండి పదార్థాలు తీసుకోవాలి.

2. మెగ్నీషియం..
ఆకుకూరలు, గింజలు, విత్తనాల్లో మెగ్నీషియం పుష్కలంగా ఉంటుంది. కొత్త ప్రొటీన్ల ఉత్పత్తికి, కండరాల సంకోచ వ్యాకోచాలు సజావుగా సాగడానికి ఇది ఎంతో కీలకం.

3. నీరు..
కండరాల్లో దాదాపు 76% నీరే ఉంటుంది. శరీరంలో నీటి శాతం తగ్గితే కండరాల విచ్ఛిన్నం జరిగే ప్రమాదం ఉంది. అందుకే దాహం వేయకపోయినా రోజంతా అప్పుడప్పుడు నీరు తాగుతూ ఉండాలి.

4. ఐరన్,  విటమిన్ డి..

కండరాలకు ఆక్సిజన్ సరఫరా చేయడంలో ఐరన్ పాత్ర కీలకం. ఇది తగ్గితే కండరాల సామర్థ్యం పడిపోతుంది. కండరాల కణాల్లో విటమిన్ డి గ్రాహకాలు ఉంటాయి. వీటి లోపం వల్ల నడకలో వేగం తగ్గడం, కండరాల బలహీనత వంటి సమస్యలు తలెత్తుతాయి.

5. ఒమేగా-3 ఫ్యాటీ ఆమ్లాలు..
చేపలు, అక్రోట్లు, అవిసె గింజల్లో లభించే ఒమేగా-3 కొవ్వు ఆమ్లాలు కండరాల వాపును తగ్గించి, కణజాలాల మరమ్మత్తుకు తోడ్పడతాయి.

సమతులాహారంతో పాటు క్రమం తప్పకుండా వ్యాయామం చేయడం వల్ల వయసుతో సంబంధం లేకుండా కండరాలను ఆరోగ్యంగా కాపాడుకోవచ్చు. కేవలం ఒక పోషకం మీద ఆధారపడకుండా అన్ని రకాల పోషకాలు అందేలా చూసుకోవడమే అసలైన ఆరోగ్య రహస్యం.