Revanth Reddy: రేవంత్ తో కమాండ్ కంట్రోల్ రూమ్ లో ఎవరేం మాట్లాడారు…?

కమాండ్ కంట్రోల్ రూమ్ లో ముఖ్యమంత్రి రేవంత్ రెడ్డి (Revanth Reddy)తో సినీ పరిశ్రమ ప్రముఖులు భేటీ అయ్యారు. ఈ సందర్భంగా ఒక్కొక్కరు తమ తమ అభిప్రాయాలను బయటపెట్టారు. అందరు సీఎంలు ఇండస్ట్రీని బాగానే చూసుకున్నారని ఈ ప్రభుత్వం కూడా మమ్మల్ని బాగా చూసుకుంటోందన్నారు సీనియర్  డైరెక్టర్ రాఘవేంద్రరావు. దిల్‌ రాజును ఫిలిం డెవెలప్మెంట్ కార్పోరేషన్ చైర్మన్‌గా నియమించడాన్ని స్వాగతిస్తున్నాను అన్నారు. తెలంగాణ అద్భుతమైన టూరిస్ట్‌ స్పాట్‌లు ఉన్నాయనన్నారు.

గతంలో చంద్రబాబు (Chandrababu naidu) చిల్డ్రన్స్‌ ఫిల్మ్‌ ఫెస్టివల్‌ హైదరాబాద్‌లో చేశారన్ని ఇప్పుడు కూడా ఇంటర్నేషనల్‌ ఫిల్మ్ ఫెస్టివల్‌ను. హైదరాబాద్‌లో నిర్వహించాలని కోరుతున్నామన్నారు. నాగార్జున (Nagarjuna) మాట్లాడుతూ యూనివర్సల్‌ లెవెల్‌లో స్టూడియో సెటప్‌ ఉండాలని కోరారు. ప్రభుత్వం కేపిటల్ ఇన్సెంటివ్‌లు ఇస్తేనే.. సినీ పరిశ్రమ గ్లోబల్ స్థాయికి ఎదుగుతుందని అభిప్రాయపడ్డారు. హైదరాబాద్‌ వరల్డ్ సినిమా కేపిటల్ కావాలనేది మా కోరిక అన్నారు ఆయన. ఇక చిన్న చిన్న విషయాలు పట్టించుకోవద్దని నిర్మాత శ్యాంప్రసాద్‌ రెడ్డి కోరారు.

సీనియర్ నటుడు, నిర్మాత మురళీ మోహన్ మాట్లాడుతూ ఎలక్షన్‌ రిజల్ట్‌ లాగే సినిమా రిలీజ్‌ ఫస్ట్‌ డే ఉంటుందన్నారు. సంధ్య థియేటర్ ఘటన మమ్మల్ని బాధించిందని పేర్కొన్నారు. సినిమా రిలీజ్‌లో కాంపిటిషన్ వల్లే ప్రమోషన్ కీలకంగా మారిందన్నారు. ప్రపంచ వ్యాప్తంగా సినిమా రిలీజ్‌ ఉండడం వల్ల.. ప్రమోషన్‌ను విస్తృతంగా చేస్తున్నామని తెలిపారు. మరో నిర్మాత  సురేశ్ బాబు మాట్లాడుతూ ప్రభుత్వంపై తమకు నమ్మకం ఉందన్నారు. హైదరాబాద్‌ను ఇంటర్నేషనల్‌ ఫిల్మ్‌ డెస్టినేషన్‌ చేయాలనేది డ్రీమ్ అన్నారు.

ప్రభుత్వ సాయంతోనే ఆ రోజుల్లో.. చెన్నై నుంచి ఇండస్ట్రీ హైదరాబాద్‌కి వచ్చిందని సురేష్‌బాబు పేర్కొన్నారు. నెట్‌ఫ్లిక్స్‌, అమెజాన్‌ సహా అన్ని ఏజెన్సీలకు.. హైదరాబాద్‌ కేరాఫ్‌గా ఉండాలని అభిప్రాయపడ్డారు. మర్రి చెన్నారెడ్డి, అక్కినేని వల్లే పరిశ్రమ హైదరాబాద్‌కి వచ్చిందని దర్శకుడు త్రివిక్రమ్‌ (Trivikram Srinivas) పేర్కొన్నారు. నిర్మాత అల్లు అరవింద్ మాట్లాడుతూ ప్రభుత్వాన్ని కలిసే అవకాశం ఇచ్చినందుకు ధన్యవాదాలు తెలిపారు. సంధ్య థియేటర్ లాంటి ఘటనలు పునరావృతంకాకుండా చూస్తామని సీఎంకు హామీ ఇచ్చారు. తెలుగు నిర్మాతలకు ఈరోజు శుభదినమన్నారు. హైదరాబాద్ వరల్డ్ షూటింగ్‌ డెస్టినేషన్‌ కావడానికి.. ప్రభుత్వానికి సహకరిస్తామన్నారు.