Nitin Nabin: బీజేపీకి నూతన సారథి నితిన్ నబీన్..!

భారతీయ జనతా పార్టీకి నూతన సారథి వచ్చారు. పార్టీ జాతీయ అధ్యక్షుడిగా నితిన్‌ నబీన్‌ సిన్హా ఏకగ్రీవంగా ఎన్నికయ్యారు. ప్రస్తుతం అధ్యక్షుడిగా ఉన్న జేపీ నడ్డా పదవీకాలం ముగియడంతో ఈ ఎన్నిక జరిగింది. మంగళవారం ఉదయం 11 గంటలకు ఆయన పార్టీ అధ్యక్షుడిగా ప్రమాణస్వీకారం చేయనున్నారు.

బిహార్‌కు చెందిన 46 ఏళ్ల నితిన్‌ నబీన్‌ (Nitin Nabin)ను బీజేపీ కార్యనిర్వాహక అధ్యక్షుడిగా నియమిస్తూ గతేడాది డిసెంబరులో పార్టీ అనూహ్య ప్రకటన చేసింది. ఆయన్ను పార్టీ నూతన అధ్యక్షుడిగా ఏకగ్రీవంగా ఎన్నుకోవాలని అధిష్ఠానం భావిస్తున్నట్లు అప్పుడే వార్తలు వచ్చాయి. కాయస్థ సామాజికవర్గానికి చెందిన నబీన్‌ సిన్హాకు ఆరెస్సెస్‌ నేపథ్యం ఉంది. గతేడాది జరిగిన బిహార్‌ అసెంబ్లీ ఎన్నికల్లో బాంకీపుర్‌ నుంచి నాలుగోసారి ఎమ్మెల్యేగా ఎన్నికయ్యారు. బిహార్‌ నుంచి పార్టీలో అధ్యక్షుడి స్థాయికి చేరిన తొలి నేతగా నబీన్‌ గుర్తింపు పొందారు.

వరుసగా నాలుగుసార్లు ఎమ్మెల్యేగా గెలుపొందిన ట్రాక్ రికార్డు నితిన్ నబీన్ సొంతం. బిహార్ రాజధాని పట్నాలోని బాంకీపుర్‌ నియోజకవర్గం ఆయనకు కంచుకోట. విద్యార్థి దశ నుంచే సంఘ్ పరివార్‌తో అనుబంధం పెంచుకున్న ఆయన, పార్టీలో వివిధ హోదాల్లో పనిచేశారు. గతంలో బిహార్ ప్రభుత్వంలో మంత్రిగా పనిచేసిన అనుభవంతో పాటు, ఛత్తీస్‌గఢ్ వంటి రాష్ట్రాలకు పార్టీ ఇన్‌ఛార్జ్‌గా వ్యవహరించి సంస్థాగత నిర్మాణంలో తనదైన ముద్ర వేశారు. తండ్రి నబీన్ కిషోర్ సిన్హా నుంచి రాజకీయ వారసత్వాన్ని పుణికిపుచ్చుకున్నప్పటికీ, తన సొంత కృషితో జాతీయ స్థాయి నేతగా ఎదిగారు.

హిందీ బెల్ట్ రాష్ట్రాల్లో పార్టీని మరింత పటిష్టం చేయడంతో పాటు, దేశవ్యాప్తంగా యువతను ఆకర్షించే వ్యూహంలో భాగంగానే బీజేపీ అధిష్ఠానం ఈ నిర్ణయం తీసుకున్నట్లు విశ్లేషకులు భావిస్తున్నారు. ప్రధాని నరేంద్ర మోడీ, కేంద్ర హోంమంత్రి అమిత్ షా ఆశీస్సులతో ఆయన పగ్గాలు చేపడుతున్నారు. రాబోయే అసెంబ్లీ ఎన్నికలు, సంస్థాగత బలోపేతం ఆయన ముందున్న తక్షణ సవాలు. మంగళవారం జరిగే బాధ్యతల స్వీకారోత్సవ కార్యక్రమానికి కేంద్ర మంత్రులు, బీజేపీ పాలిత రాష్ట్రాల ముఖ్యమంత్రులు, సీనియర్ నేతలు భారీగా హాజరుకానున్నారు.