ATA: వర్జీనియాలో ఆటా ‘మీట్ & గ్రీట్’… నాగేశ్వర రావు పూజారి సినీ ప్రయాణంపై ఆసక్తికర చర్చ

అమెరికన్ తెలుగు అసోసియేషన్ (ATA) వర్జీనియాలోని స్టెర్లింగ్‌లో నిర్వహించిన ప్రత్యేక కార్యక్రమం ప్రవాస తెలుగు వారిని విశేషంగా ఆకట్టుకుంది. ప్రముఖ సోషల్ మీడియా ఇన్‌ఫ్లూయెన్సర్, నిర్మాత, న్యాయవాది నాగేశ్వర రావు పూజారి గారితో ఏర్పాటు చేసిన ఈ మీట్ & గ్రీట్ వేడుక అత్యంత ఉత్సాహంగా సాగింది.

అనుభవాల సారాంశం
ఈ కార్యక్రమంలో నాగేశ్వర రావు పూజారి తన వ్యక్తిగత, వృత్తిపరమైన ప్రయాణాన్ని వివరించారు. ముఖ్యంగా ‘ఈ నగరానికి ఏమయ్యింది – పార్ట్ 2’ వంటి చిత్రాల నిర్మాణ అనుభవాలను, సోషల్ మీడియా ద్వారా సమాజంలో వస్తున్న మార్పులను ఆయన హృదయానికి హత్తుకునేలా పంచుకున్నారు. యువత అడిగిన పలు ప్రశ్నలకు ఆయన సమాధానాలిస్తూ, సృజనాత్మక రంగంలో రాణించాలనుకునే వారికి విలువైన సూచనలు చేశారు.

వారధిగా ఆటా
ఆటా అధ్యక్షులు జయంత్ చల్ల మాట్లాడుతూ.. భారత్, అమెరికా మధ్య సాంస్కృతిక వారధిని నిర్మించడమే ఆటా ప్రధాన ఉద్దేశమని తెలిపారు. తెలుగు సంస్కృతిని పరిరక్షించడంలోనూ, ప్రతిభను ప్రోత్సహించడంలోనూ ఆటా ఎప్పుడూ ముందుంటుందని పేర్కొన్నారు. ఇటీవల తెలుగు రాష్ట్రాల్లో నెల రోజుల పాటు నిర్వహించిన ఆటా వేడుకల విజయవంతమైన ప్రయాణాన్ని ఈ సందర్భంగా ఆయన గుర్తు చేశారు.

19వ ఆటా కాన్ఫరెన్స్ పిలుపు
జులై 31 నుంచి ఆగస్టు 2, 2026 వరకు బాల్టిమోర్ కన్వెన్షన్ సెంటర్‌లో జరగనున్న 19వ ఆటా కాన్ఫరెన్స్ & యూత్ కన్వెన్షన్ గురించి ఈ వేదికపై చర్చించారు. ఈ మెగా ఈవెంట్‌లో తెలుగు వారందరూ పాల్గొని జయప్రదం చేయాలని కాన్ఫరెన్స్ కమిటీ సభ్యులు రవి చల్లా కోరారు. ఈ కార్యక్రమం విజయవంతం కావడంలో రవి చల్లా, జీనత్ కుందూరు, కౌశిక్ సామ, రమేష్ భీమ్ రెడ్డి తదితర కోర్ కమిటీ సభ్యులు కీలక పాత్ర పోషించారు. కార్యక్రమ అనంతరం నాగేశ్వర రావు పూజారి గారిని ఆటా ప్రతినిధులు ఘనంగా సన్మానించారు.