TAL: లండన్‌లో మిన్నంటిన సంక్రాంతి సంబరాలు.. తెలుగు సంస్కృతికి తాల్ నీరాజనం

లండన్: ప్రవాసంలో తెలుగు భాషా సంస్కృతులను సజీవంగా ఉంచుతూ, తెలుగు అసోసియేషన్ ఆఫ్ లండన్ (TAL) నిర్వహించిన సంక్రాంతి ఉత్సవాలు అంబరాన్నంటాయి. జనవరి 18, ఆదివారం నాడు లండన్ నగరంలో జరిగిన ఈ వేడుకలకు స్థానిక తెలుగు వారు పెద్ద సంఖ్యలో తరలివచ్చారు. సుమారు 700 మందికి పైగా హాజరై పండుగ సంబరాల్లో ఉత్సాహంగా పాల్గొన్నారు.

ముగ్గుల పోటీలు, బొమ్మల కొలువు, భోగి పళ్లు, వంటల పోటీలు, గాలిపటాల తయారీ వంటి విభిన్న కార్యక్రమాలతో ప్రాంగణమంతా పల్లె వాతావరణాన్ని తలపించింది. ఈ కార్యక్రమానికి ముఖ్య అతిథిగా విచ్చేసిన రెడ్‌బ్రిడ్జ్ మేయర్ కౌన్సిలర్ బెవర్లీ బ్రూవర్ మాట్లాడుతూ, తెలుగు సమాజం పట్ల తాల్ సంస్థ చూపుతున్న అంకితభావాన్ని కొనియాడారు. వైవిధ్యభరితమైన సంస్కృతులను ఒకే వేదికపైకి తీసుకురావడంలో తాల్ చేస్తున్న కృషి ప్రశంసనీయమని పేర్కొన్నారు. యువత తమ మూలాలను గుర్తించి, ఈ సాంస్కృతిక వారసత్వాన్ని ముందుకు తీసుకువెళ్లాలని ఆమె ఆకాంక్షించారు.

మహిళా సభ్యులు..

మహిళా సభ్యులు ఉమ గీర్వాణి, హిమబిందు, సురేఖ, స్వప్న బి, స్వప్న జి, శాలిని, జ్యోత్స్న, షాజ్మా నేతృత్వంలో ఈ కార్యక్రమాలు విజయవంతంగా సాగాయి. వీరికి గిరిధర్, రాయ్ బి, విజయ్ బి, అనిల్ అనంతుల పూర్తి సహకారం అందించారు. నిధుల సేకరణ బాధ్యతలను ట్రస్టీలు వెంకట్ నీల, రవి కుమార్ రెడ్డి మోచెర్ల, కోశాధికారి అనిల్ అనంతుల సమర్థవంతంగా నిర్వహించారు. ఈ వేడుకలకు అండగా నిలిచిన స్పాన్సర్లకు నిర్వాహకులు కృతజ్ఞతలు తెలియజేశారు.

తాల్ చేపట్టిన ప్రతి కార్యక్రమానికి తల్లిదండ్రులు, సభ్యులు, వాలంటీర్లు అందిస్తున్న తోడ్పాటును చైర్మన్ రవి సబ్బా ప్రత్యేకంగా గుర్తుచేసుకున్నారు. తాల్ కల్చరల్ సెంటర్ (TCC) ద్వారా నిర్వహిస్తున్న సంగీతం, నృత్యం, తెలుగు భాషా శిక్షణ తరగతుల గురించి ట్రస్టీ అశోక్ మాడిశెట్టి వివరించారు. ఈ వేదిక అన్ని వయసుల వారు తమ వారసత్వంతో మమేకమవ్వడానికి ఉపయోగపడుతుందని తెలిపారు. మార్చి 21న జరగనున్న తాల్ ఉగాది 2026 వేడుకలకు కన్వీనర్ వాసు మేరెడ్డి అందరినీ ఆహ్వానించారు.

నోరూరించే వంటకాలు..
గిరిధర్ పుట్లూర్ వాలంటీర్ల సేవల గురించి మాట్లాడుతూ మురళి కె, విజయ్ బి, నాగ జి, రవి డి, వాజిద్, క్రాంతి ఆర్, శ్రీ రామ్, ఇతరుల కృషిని కొనియాడారు. బొమ్మల కొలువు అలంకరణ నుండి రంగోలి పోటీల వరకు ప్రతి అంశం వారి నిబద్ధత వల్ల అద్భుతంగా సాగింది. ట్రస్టీలు అనిల్ అనంతుల, రవి కుమార్ రెడ్డి మోచెర్ల, శ్రీదేవి ఆలెద్దుల, వెంకట్ నీల, అశోక్ మాడిశెట్టి, కిరణ్ కప్పెట, సత్య పెద్దిరెడ్డి ఈ కార్యక్రమానికి వెన్నెముకగా నిలిచారు. ఆంధ్రప్రదేశ్, తెలంగాణ రాష్ట్రాల సంప్రదాయ కళలు, పాటలు, నృత్య ప్రదర్శనలు, నోరూరించే వంటకాలతో ఈ సంక్రాంతి సంబరాలు చిరస్మరణీయంగా నిలిచాయి.