US Govt Shutdown: అమెరికాకు మళ్లీ ‘షట్‌డౌన్‌’ గండం..
- Published By: techteam
- December 19, 2024 / 03:41 PM IST
US funding bill: అధికార మార్పిడికి సిద్ధమవుతున్న అగ్రరాజ్యం అమెరికాలో మరోసారి ఆర్థిక ప్రతిష్టంభన తలెత్తింది. క్రిస్మస్‌ సమయంలో షట్‌డౌన్‌ ముప్పును తప్పించేందుకు ప్రస్తుత అధ్యక్షుడు జో బైడెన్‌ ప్రభుత్వం తీసుకొచ్చిన ద్వైపాక్షిక ప్లాన్‌ను కాబోయే అధ్యక్షుడు డొనాల్డ్‌ ట్రంప్‌ (Donald Trump) హఠాత్తుగా తిరస్కరించారు. దీనిపై తప్పనిసరిగా చర్చ జరిగేలా చూడాలని స్పీకర్‌ మైక్‌ జాన్సన్‌, రిపబ్లికన్‌ చట్టసభ్యులకు సూచించారు. ఫెడరల్‌ ప్రభుత్వం వద్ద నిధులు తరిగిపోతున్నవేళ ఈ అనూహ్య పరిణామంతో కార్యకలాపాలు స్తంభించిపోయే (us Govt Shutdown) పరిస్థితి నెలకొంది. అయితే, ట్రంప్‌ ఈ నిర్ణయం వెనక ప్రపంచ కుబేరుడు ఎలాన్‌ మస్క్‌ (Elon Musk) ప్రభావం ఉన్నట్లు తెలుస్తోంది.
బైడెన్‌ (Joe Biden) ప్రభుత్వం తీసుకొచ్చిన నిధుల ప్లాన్‌లో ఖర్చులు భారీగా పెరిగాయంటూ మస్క్‌ సామాజిక మాధ్యమాల వేదికగా పోస్ట్‌ చేశారు. 1500 పేజీల ఈ బిల్లు మంగళవారం రాత్రి బయటకు రాగానే టెస్లా అధినేత దీనిపై స్పందించారు. ‘దీన్ని ఆమోదించకూడదు’ అని రాసుకొచ్చారు. ఈ బిల్లు (US Funding Bill)పై ఓటు వేసే చట్టసభ్యులు తీవ్ర పరిణామాలు ఎదుర్కోవాల్సి వస్తుందని పరోక్షంగా హెచ్చరిక చేశారు. ఈ పోస్ట్‌ పెట్టిన కొద్ది గంటలకే ట్రంప్‌ దీనిపై రిపబ్లికన్‌ నేతలకు అల్టిమేటం ఇవ్వడం చర్చనీయాశంగా మారింది.
వాస్తవానికి ప్రభుత్వ కార్యకలాపాలు యథావిధిగా కొనసాగాలంటే ఈ ద్రవ్య వినిమయ బిల్లుకు శుక్రవారం లోగా ఆమోదం లభించాలి. ఈ నేపథ్యంలో బుధవారం దీనిపై ట్రంప్‌, తన కాబోయే ఉపాధ్యక్షుడు జేడీ వాన్స్‌తో కలిసి ఓ ప్రకటన విడుదల చేశారు. ‘రిపబ్లికన్లు చాలా తెలివైనవారు’ అని పేర్కొన్నారు. ఈ బిల్లును ఆమోదించకూడదని, దీనిపై చర్చ చేపట్టాల్సిందేనని స్పీకర్‌ మైక్‌ జాన్సన్‌, ఇతర రిపబ్లికన్‌ చట్టసభ్యులకు గట్టిగా సూచించారు. దీంతో పాటు కొన్ని డిమాండ్లు కూడా తెరపైకి తెచ్చినట్లు తెలుస్తోంది. దీంతో ఇప్పుడీ బిల్లుపై ప్రతిష్టంభన నెలకొంది.
తాజాగా తీసుకొచ్చిన ఆర్థిక ప్రణాళికలో హరీకేన్‌ బాధిత రాష్ట్రాలు, ఇతర ప్రకృతి విపత్తుల బాధితుల కోసం 100.4 బిలియన్‌ డాలర్లు విపత్తు సహాయ నిధి కింద కేటాయించారు. తాజా పరిణామాలపై డెమోక్రటిక్‌ నేతలు తీవ్ర విమర్శలు చేస్తున్నారు. ‘‘ప్రభుత్వ కార్యకలాపాలు స్తంభించిపోవాలని రిపబ్లికన్లు కోరుకుంటున్నారు. అలా జరిగితే యావత్‌ అమెరికన్లు ప్రతిరోజూ ఇబ్బందులు ఎదుర్కోవాల్సి ఉంటుంది’’ అని వారు విచారం వ్యక్తం చేస్తున్నారు.
