ఆర్థికం భేష్..

భారత ఆర్థికవ్యవస్థ పురోగమిస్తోంది. ఇన్నాళ్లు ఆసియా ఆర్థికవ్యవస్థల్లో డౌన్ ట్రెండ్స్ లో ఉన్నభారత వ్యవస్థ క్రమంగా పైపైకి ఎగబాకుతోంది. భారత జీఎస్టీ వసూళ్ల వరుసగా ఐదో ఏడాది కూడా లక్షా 60వేల కోట్లు దాటాయి. మేకిన్ ఇండియా నేరుగా కాకున్నా ఎంతోకొంత ప్రభావం చూపిస్తోంది. పెట్టుబడులు కూడా తరలివస్తున్నాయి. ఇలాంటి సమయంలో ప్రముఖ అంతర్జాతీయ బ్రోకరేజ్ సంస్థ మోర్గాన్ స్టాన్లీ భారత దేశానికి తీపి కబురు చెప్పింది. ప్రధాన ఆసియా ఆర్థిక వ్యవస్థల రేటింగ్స్‌ను సవరిస్తూ, భారత దేశ రేటింగ్‌ను ‘ఓవర్ వెయిట్’ కు అప్‌గ్రేడ్ చేసింది. అదే సమయంలో చైనారేటింగ్‌ను ‘ఈక్వల్ వెయిట్‌ కు డౌన్‌గ్రేడ్ చేసింది.

భారత దేశ రేటింగ్‌ను ‘ఓవర్ వెయిట్’ కు అప్‌గ్రేడ్ చేయడానికి అనేక కారణాలు ఉన్నాయని మోర్గాన్ స్టాన్లీ తెలిపింది. రిలేటివ్ వాల్యుయేషన్స్ అక్టోబరులో కన్నా తక్కువ తీవ్రతతో ఉన్నట్లు తెలిపింది. భారత దేశంలో అమలు చేస్తున్న సంస్కరణలు, సూక్ష్మ ఆర్థిక వ్యవస్థ సుస్థిరత ఎజెండా వల్ల మూలధన వ్యయం, లాభాలు పటిష్టంగా ఉంటాయని అంచనా వేసింది. విదేశీ ప్రత్యక్ష పెట్టుబడులు, పోర్ట్‌ఫోలియో ఫ్లోస్ సానుకూలంగా ఉన్నాయని, దీనికి కారణం భారత దేశం సంస్కరణలకు, సూక్ష్మ ఆర్థిక వ్యవస్థ స్థిరత్వానికి కట్టుబడి పనిచేస్తుండటమేనని తెలిపింది.

చైనా ఆర్థిక వ్యవస్థపై మోర్గాన్ స్టాన్లీ విశ్లేషకులు ఆందోళన వ్యక్తం చేశారు. చైనా ప్రభుత్వం ఉద్దీపన ప్యాకేజీలను ప్రకటించడం వల్ల ర్యాలీ జరుగుతోందని, జాగ్రత్తగా వ్యవహరించాలని పెట్టుబడిదారులను హెచ్చరించింది. లాభాలను స్వీకరించాలని సలహా ఇచ్చింది. చైనా ప్రభుత్వం క్రమంగా చర్యలు తీసుకునే అవకాశం ఉందని, అయితే ఇవి స్టాక్ మార్కెట్ లాభాలు స్థిరపడటానికి సరిపోవని తెలిపింది. లోకల్ గవర్నమెంట్ ఫైనాన్సింగ్ వెహికిల్ రుణం, స్థిరాస్తులు, లేబర్ మార్కెట్, భౌగోళిక, రాజకీయ అంశాలు వంటివి చెప్పుకోదగ్గ స్థాయిలో మెరుగుపడాలని తెలిపింది. ఇవి ఫ్యూచర్ ఇన్‌ఫ్లోస్, రీ-రేటింగ్ పొటెన్షియల్‌లపై ప్రభావం చూపుతాయని వివరించింది.

ఇప్పటికే చైనాలో రియల్ ఎస్టేట్ రంగం పీకల్లోతు కష్టాల్లో ఉంది. ఇవికాక కోవిడ్ తర్వాత చాలా కంపెనీలు పడకేశాయి. చైనాతో వ్యాపార సంబంధాలను తగ్గించుకునే దిశగా ఈయూ అడుగులేస్తోంది. దీనికి తోడు అమెరికాతో పరోక్ష యుద్ధం చైనాకు మరిన్ని ఇక్కట్లు తెచ్చిపెడుతోంది. ఇరుదేశాల మధ్య విశ్వాస లేమి కనిపిస్తోంది. దీనికి తోడు చైనాలో నిరుద్యోగిత.. చాల అధికంగా ఉంది. విద్యార్థులు .. గ్రామసీమల్లోకి వెళ్లి ఉపాధి వెతుక్కోవాలని స్థానిక ప్రభుత్వాలు సూచిస్తున్నాయి. ఇలాంటి పరిస్థితులన్నింటినీ కూడా మోర్గాన్ స్టాన్లీ పరిగణనలోకి తీసుకున్నట్లు కనిపిస్తోంది.