Trump: ట్రంప్ దెబ్బ.. కెనడా అబ్బ..పెద్దన్నతో పరాచికాలా..?

వలసలు, డ్రగ్స్ అక్రమ రవాణాను కట్టడి చేయకపోతే అమెరికాకు కెనడా 51వ రాష్ట్రం అవుతుందంటూ డొనాల్డ్ ట్రంప్(Donald trump) మరోసారి వార్నింగ్ ఇచ్చారు. గతంలో సమావేశం సందర్భంగా వార్నింగ్ ఇచ్చిన ట్రంప్.. మళ్లీ అదే స్వరం వినిపించడంతో కెనడా ప్రధాని జస్టిన్‌ ట్రూడో అలర్ట్ అయ్యారు. సరిహద్దు భద్రత కోసం రక్షణ వ్యయాన్ని (defence budget)పెంచుతూ ప్రతిపాదనలు జారీ చేశారు. మినీ బడ్జెట్‌లో భాగంగా ఈ ప్రతిపాదన చేసినట్లు సమాచారం. ఈ నిధులు పబ్లిక్ సేఫ్టీ కెనడా, కెనడా బోర్డర్‌ సర్వీసెస్‌ ఏజెన్సీ, ది కమ్యూనికేషన్స్ సెక్యూరిటీ ఎస్టాబ్లిష్‌మెంట్‌, రాయల్ కెనడియన్ మౌంటెడ్‌ పోలీస్‌ విభాగాలకు వెళ్తాయని ట్రూడో సర్కార్ వెల్లడించింది. అలాగే, ఎగుమతి అయ్యే వస్తువులను తనిఖీ చేసేందుకు కెనడా బోర్డర్ సర్వీసెస్‌లో సిబ్బంది సంఖ్యను పెంచుతున్నట్లు చెప్పుకొచ్చారు. ఇందుకోసం కస్టమ్స్ చట్టానికి సవరణలు చేయనున్నారు.

అయితే, అమెరికా అధ్యక్ష ఎన్నికల్లో గెలిచిన ట్రంప్‌ తాను బాధ్యతలు తీసుకున్న తర్వాత కెనడా, మెక్సికోలపై 25 శాతం పన్ను విధించనున్నట్లు వ్యాఖ్యానించారు. దీంతో వెంటనే అమెరికాకు పయనమైన ట్రూడో.. ట్రంప్‌తో సమావేశం అయ్యారు. వలసలు, డ్రగ్స్‌ అక్రమరవాణా అంశాలపై ఇరువురు మధ్య చర్చలు జరిగాయి. ఈ క్రమంలో వాటిని కట్టడి చేయకపోతే.. కెనడా అమెరికాలో 51వ రాష్ట్రంగా చేరాల్సి వస్తుందని ట్రూడోకు ట్రంప్ వార్నింగ్ ఇచ్చాడు. కాగా, డొనాల్డ్ ట్రంప్ తమపై టారిఫ్‌లు విధిస్తే.. తాము ప్రతి చర్యలకు దిగుతామని జస్టిన్ ట్రూడో హెచ్చరించారు. కెనడా నుంచి వచ్చే ప్రతీ వస్తువుపై సుంకాలు విధిస్తే.. జీవన వ్యయాలు మరింత పెరిగిపోతాయని అమెరికా ప్రజలకు అర్థమవుతోందన్న ట్రూడో.. చివరకు పెద్దన్న దెబ్బకు దిగిరాక తప్పలేదు.

మెక్సికో, కెనడా లనుంచి అంతర్జాతీయ సరిహద్దు ద్వారా ఏటా వేలాది మంది అక్రమంగా సరిహద్దులు దాటి రావడం సాదారణమైపోయింది. వచ్చిన వారిలో శరణార్థులు ఉంటున్నారు. క్రిమినల్స్ కలిసిపోతున్నారు. దీంతో అమెరికాలో ఉగ్రవాద చర్యలు పెరుగుతున్నాయి. దీనికితోడు ఈదేశాలకు ఇస్తున్న రుణాలు, ఇతరత్రా వ్యయంకూడా పెరిగిపోవడం అమెరికాకు భారంగా మారింది. ఈపరిస్థితుల్లో వారికి ఎందుకు రుణాలు ఇవ్వాలన్నది ట్రంప్ వాదన. అంత ఉదారంగా తమనుంచి రుణాలు, ఇతరత్రా సాయం ఆశించే బదులు… అమెరికాలో 51వ రాష్ట్రంగా కలిసిపోతే బాగుంటుందని వ్యంగ్యాస్త్రాలు సంధించారు ట్రంప్.