Chrystia Resign: కెనడా ప్రధాని ట్రూడో పని అయిపోయినట్లేనా..? రాజీనామాకు పెరుగుతున్న డిమాండ్లు..

కెనడా రాజకీయాల్లో కీలక పరిణామం చోటుచేసుకుంది. ఆ దేశ ఉప ప్రధాని, ఆర్థికశాఖ మంత్రి క్రిస్టియా ఫ్రీలాండ్‌(Chrystia Freeland) తన పదవికి రాజీనామా చేశారు. జస్టిన్‌ ట్రూడో (Justin Trudeau) కేబినెట్‌లో అత్యంత శక్తిమంతురాలిగా గుర్తింపు పొందిన ఆమె రాజీనామా తర్వాత, ప్రధాని ట్రూడో ప్రజాదరణ కోల్పోతున్నారని ఆరోపించారు. అయితే, ఆమె నిర్వహిస్తున్న ఆర్థిక శాఖను మారుస్తున్నట్లు ట్రూడో చెప్పిన నేపథ్యంలో క్రిస్టియా రాజీనామా చేసినట్లు తెలుస్తోంది.

‘‘మన దేశం ప్రస్తుతం తీవ్ర సవాళ్లను ఎదుర్కొంటోంది. మరోవైపు అమెరికా అధ్యక్షుడిగా ఎన్నికైన ట్రంప్‌(Trump) 25శాతం టారిఫ్‌లు విధిస్తామని హెచ్చరిస్తున్నారు. అటువంటి ముప్పును మనం తీవ్రంగా పరిగణించాలి’’ అని తన రాజీనామా లేఖలో క్రిస్టియా ఫ్రీలాండ్‌ పేర్కొన్నారు. గత కొన్ని వారాలుగా ఉత్తమ మార్గాల కోసం అన్వేషించామని, ఈ క్రమంలో ట్రూడోతో భిన్నాభిప్రాయాలు వ్యక్తమయ్యాయన్నారు. లిబరల్‌ పార్టీ(liberal) సభ్యురాలిగా కొనసాగుతానన్న ఆమె.. తదుపరి ఎన్నికల్లో టొరంటో నుంచి మళ్లీ పోటీ చేస్తానన్నారు.

2013లో తొలిసారి పార్లమెంటుకు ఎన్నికైన క్రిస్టియా.. అనంతరం అధికారం చేపట్టిన ట్రూడో కేబినెట్‌లో చేరారు. వాణిజ్యం, విదేశాంగ మంత్రిగా పనిచేశారు. ఆగస్టు 2020 నుంచి ఆర్థికమంత్రిగా కొనసాగిన ఆమె.. అమెరికా, ఈయూలతో స్వేచ్ఛా వాణిజ్య చర్చలకు నాయకత్వం వహించారు. అయితే, దేశ ఆర్థిక సవాళ్లకు సంబంధించిన విషయాలను పార్లమెంటుకు నివేదించనున్న కొన్ని గంటల్లోనే క్రిస్టియా తన పదవికి రాజీనామా చేయడం గమనార్హం.

అమెరికా అధ్యక్షుడిగా ఎన్నికైన డొనాల్డ్‌ ట్రంప్‌.. సరిహద్దులో వలసలు, డ్రగ్స్‌ అక్రమ రవాణాను కట్టడి చేయకుంటే కెనడాపై టారిఫ్‌లు విధిస్తామని హెచ్చరిస్తున్నారు. ఇందులో విఫలమైతే అమెరికాలో 51వ రాష్ట్రంగా చేరాలని ట్రూడోకు చురకలు అంటించారు. అయినప్పటికీ ఈ విషయాల్లో సరిగా స్పందించడం లేదని సొంత పార్టీ నేతల నుంచే జస్టిన్‌ ట్రూడో విమర్శలు ఎదుర్కొంటున్నారు. ఇదే అంశంపై కొన్ని వారాలుగా ఉప ప్రధాని క్రిస్టియా.. ప్రధాని ట్రూడో మధ్య భేదాభిప్రాయాలు వచ్చినట్లు తెలుస్తోంది. తాజాగా ఆమె రాజీనామా లేఖలోనూ ఇవే అంశాల్ని ప్రస్తావించారు.