అమెరికాలో కొత్తగా 99వేల కరోనా కేసులు

గత రెండు రోజులుగా అమెరికాలో ఎన్నికలు, ఓట్ల లెక్కింపు ప్రపంచ దేశాలను ఆకర్షిస్తోంది. ఇదే సమయంలో ఆ దేశం కొత్తగా నమోదవుతోన్న కరోనా వైరస్‍ కేసుల విషయంలో రికార్డు సృష్టిస్తోంది. గడిచిన 24 గంటల్లో 99 వేలకు పైచిలుకు కొత్త కేసులు నమోదైనట్లు జాన్స్ హాప్‍కిన్స్ యూనివర్సిటీ వెల్లడించింది. బుధవారం రాత్రి సమయం కల్లా అక్కడ 99,660 కొత్త కరోనా కేసులు నమోదు కాగా, 1,112 మంది వైరస్‍ బారినపడి మరణించారు. అమెరికా అధ్యక్ష ఎన్నికలు జరిగిన మరుసటి రోజు ఈ కేసులు బయటపడ్డాయి. కాగా, ఇప్పటివరకు ఆ దేశంలో 94 లక్షల మంది వైరస్‍ బారిన పడగా 2,33,000 మరణాలు సంభవించాయి. అగ్రదేశం అమెరికా కరోనా వైరస్‍ ప్రభావంతో తీవ్రంగా ఉక్కిరిబిక్కిరి అవుతోన్న సంగతి తెలిసిందే. తాజాగా జరిగిన ఎన్నికల ప్రచారంలో కూడా అభ్యర్థులకు అదే కీలకాంశమైంది.